Porque del amor al odiu hai namás un pasu, por una Asturies enllena de ciudadanos y non de de votantes
09/08/2006
Güei voi dedicar esti espaciu a tou esi garrapiellu d'inxenieros de chigre que tantu abunden nel nuesu país. Esos espertos en tou y en na, que tienen la gran facilidá de criticar tolo que faen los dema´s mientres ellos nun mueven un deu por na.
Na mio corta vida, tuve que llidiar con munchos políticamente, tanto dientru la mio "organización" como d'otres. Tamién tócame llidiar con ellos nel tarrén cultural, dende un par d'asociaciones nes que teo'l gustu y el placer de ser fundador y ún de los responsables.
Ye tremendu esi afán de protagonismu, d'enmierdar el trabayu de los demás y d'esbabayar ensín argumentar namás pol meru fechu de tener envidia de que yes tú, xunto con otra xente, el que ta moviendo coses que poco a poco van saliendo bien.
Nesti sen voi comentavos un asuntu. Resulta que nel mio conceyu, como munchos de los mios "compatriotes", veo con vergoña'l maltratu cultural que recibe'l mio pueblu y más en concretu la "desasturianización" de les folixes locales. Quicias por esto, llanceme a l'aventura con otros collacios de montar una asociación pa tornar al carauter tradicional y asturianu de les folixes y, a la vez, entamar otru tipu d'actividaes al añu con un toque asturianu. Pos bien, resulta que ta teniendo esitu, tenemos 140 socios, una cantidá bastante envidiable pa una asociación que tien pocos meses de vida. Pero claro, nunca nun orbaya al gustu de toos y nestes coses menos.
Dende que ficimos esto tamos recibiendo los ataques de la xente de siempre, que nun mueve un deu por nada y que namás sabe aprovechar el tiempu sacando la llingua a pacer. Tamién de quienes ver nel dineru'l so oxetivu principal y ven amenazau'l negociu pola nuesa oferta cultural (curiosu tener mieu a perder perres porque unos mozos faigan actividaes meramente culturales). Pero les coses funcionen asina, siempre foi asina y siempre sedrá, que pa eso somos asturianos y lo d'esbabayar ye cosa de nuesu.
Esto sirveme pa enllazar cola política. Los que me conoceis (sois pocos), sabeis que nun soi nacionaliegu, nin asturianu nin español, y que nun siento especial gustu por nengún de los dos polos. Pero sí ye ciertu qu'a la hora votar suelu tender más hacia'l nacionalismu asturianu como rempuesta al ultranacionalismu español de la FSA y el PP. Pos bien, al igual que nos chigres, na política tamién hai muncho inxenieru. Munchu llistu que diz llevar la razón y representar les esencies y elixires del asturianismu verdaderu y les pocimes que van solucionar tolos nuesos problemes. Hailos que llamen al Bloque por Asturies apoltronaos, yo nun lo creo. Tamién qu'ataquen a IAS por virtuales, conozco munchos, polo que lu rechazo dafechu. O los que dicen qu'Andecha Astur nun faen más qu'enmierdar y dir a la contra de tou, cosa que pongo en dulda que seya un monopoliu de los de Rivas namás sinon más bien un elementu unificador del tol asturianismu.
Resulta que nuna España enllena de nacionalismos más o menos fuertes, más o menos independentistes, más o menos federalizantes (estos prestenme más), pos resulta que n'Asturies somos tan llistos y prestosos que tenemos un arcoiris d'ellos. En tolos llaos consiguiose algamar coaliciones o partíos fuertes que representaren a un sector de población fasta entonces non representau. En tolos llaos menos n'Asturies y dame a mi que vamos siguir igual. ¿De quién ye la culpa? De xuru que tolos asturianos tenemos un poco, tampoco hai qu'echa-y tola culpa de los nuesos problemes a los que gobiernen, sinon a nos que los aupamos ehí y a tolos que nun tamos satisfechos con ellos y nun somos quien a xuninos pa baltialos.
Quizá sedría bon momentu d'entamar a cagar pa tantu inxenieru de chigre, tanto nel mio conceyu como n'Asturies y trabayar por dir meyorando les coses pasu a pasu, criticando lo criticable y dexando facer a la xente que trabaya por cambiar el presente y meyorar el futuru. Anque bono, quizá esi mos quede demasiau lloñe...
13/07/2006
Añu 2006 d.C., toa Europa conderga los crímenes del franquismu, ¿toa? ¡Non! un reducíu grupu polacu resiste a los ataques xudeomasónicos y sodomites bolcheviques. Y estu vien al cuentu de que t'acabante de cellebrase un plenu nel Parlamentu Europeu cola fin de condergar el franquismu. La sorpresa llegó cuando Maciej Giertych, cabezaleru de la ultraderechista Lliga de les Families de Polonia, sacó la llingua a pacer col so instintu llibertaor y democráticu pa xustificar el réximen franquista puestu que "Gracies a la Ilesia española, al Exércitu español y a Francisco Franco l'ataque comunista contra la España católica pudo superase".
Ay, ay, ay, Marciej pillín, que bromista tás fechu. ¿Y cuando los nazis invadieron Polonia diben d'escursión a retozar pel monte con prestoses moces polaques non? Si ye que la ultraderecha tien permala fama, en realidá son toos unos cachondos, solo que nos nun pillamos el so sentíu del humor porque tenemos-yos manía... Aun asina garro la mítica frase de Woody Allen, asina en plan bromina pa él "cuando siento a Wagner durante más de media hora entrenme unes ganes d'invadir Polonia...".
Como nun podía ser menos, la Derechona española nun pudo faltar nesi alderique. L'eternu segundón (nunca nun ganó nenguna elleición a la que se presentó), Jaime Mayor Oreja declaró "la reconciliación, la concordia, nun debe aburrinos (...) y por eso dellos, a munchos españoles, pareznos un error hestóricu que güei se trate d'impulsar una segunda transición, como si la primera quedara vieya y obsoleta". Como puee vese, el Partíu Popular sigue ensin condergar el franquismu a la vez qu'intenta desmarcase de la so vinculación col mesmu, ye dicir, que podemos considerar que lu xustifiquen al nun condergalu. ¿Sedrá que realmente duel-yos condergar el franquismu? Lo curiosu ye que la drecha de ¡ESPAÑA! tanto a través de los sos intelectualinos de tertulia como de los sos medios afines nun tien nengún pudor en condergar "l'intentu de güelpe d'Estáu de 1934" pero vese-yos mui cómodos colos 40 años de dictadura franquista. ¿Sedrá realmente que tán d'alcuerdu? ¿o que tienen mieu enfadar a les sos centristes bases? ¿ye realmente tan dificil que'l Partíu Popular de'l brazu a torcer y dexe d'intentar la cuadratura del círculu?.
Al menos quedanos el consuelu de que la derechona cristiana europea del PPE (nel que s'atopa'l PP español), declaró a traviés del so cabezaleru que “consideramos que los dictadores y los qu'afiten rexímenes totalitarios, ya seyan facistes o comunistes o nacionalsocialistes, nun tán en condiciones de defender los nuesos ideales”. Al menos n'Europa soplen otros vientos, a ver cuando aireen un poco los armarios na derechona española, uy no, qu'ellos d'armarios nun quieren saber un res...
13/07/2006
Cuenten les males llingües que t'acabante de presentase'l proyeutu de creación de "Leninland". Sí, sí, lleisti bien Leninlandia. Paez ser que va construyise en Ulyanovks, tierra natal del llíder soviéticu, un parque temático dedicau a esta perimportante figura del sieglu XX nel que nun van faltar les atracciones. Adelantase yá que va facese una replica de la Plaza colorada de Moscú y, esto ye lo más friki-siniestru, una estatua xigante parlante de Lenin asina como répliques de los "koljóses" (les granxes cooperatives soviétiques). Paez ser que la población autóctona nun recibe perbien esta propuesta del so gobernador porque vien sofitada por capital norteamericanu. Ye ablucante como medra'l capitalismu, agora símbolos de la contracultura y del anticapitalismu como fueron el Che Guevara o el mesmu Lenin, yá son marques tan rentables como puee ser el payasu de McDonalds (non, Bush non, Ronald McDonald ho).
Con esto plantegaseme una dulda, ¿referirase Tini a daqué asemeyau cuando diz qu'Asturies ye un parque temáticu vivu?. Pongome a tremar imaxinando nun futuru "Tinilandia". Dios, ya toi viendo les atracciones. Per un llau una zona dedicada a los usos y costumes d'Asturies que puee ser mesmamente poner a Jeronimo Granda cuntando chistes o a Vitorin cantando el "Asturias". Llueu, pala xente con ganes d'emociones fuertes taría la "Zona SOMA", onde podríen dar cursos de demagoxia sindical o enseñanos a cortar carreteres y autopistes pa impedir al resto d'asturianos dir a trabayar (¡o mos paguen la prexubilación o nun trabaya nin Dios!). Llueu, palos amantes del cine prieto y les pelicules de mafiosos taría la "Zona Trevin" onde poder vivir nes tos propies carnes lo que ye que te detengan y ostien en nome de la democracia (nin se t'ocurra dicir que yes antifacista eh, que los d'agora nun valen que son radicalonos d'izquierdes, los bonos yeren los de la Transición, nun podemos quita-yos les competencies n'antifacismu a Tini y collacios...).
Na, la noticia de Leninlandia paez de chiste, pero viendo l'afición que tenemos n'Asturies a copiar tolo que vien de fuera, especialmente si son babayaes... nun vos estrañe la futura Tinilandia. Nun quieru comparar a Lenin y Tini, ta claro, a Lenin de xuru que nun-y prestaba la tortiella...
11/07/2006
Bono pos a la fin animeme a esto d'entrar na blogosfera. La verdá, lo d'escribir nun ye que seya lo de mio, vamos nunca nun tuve una inquietú por facelu pero, visto lo visto, agora que tou cristu tien un blog d'estos pa dicir lo que-y pete animeme yo.
Supongo que ye pola famosa y non tan real democratización de la rede, qu'agora cualquiera puee buscar un rinconín pa dicir les coses que más-y esmolezan. Da igual si yes un xaponés que nun sales de casa y busques xente pa suicidate, un folisofu tresnochau amenazando col apocalípsis nacional o, como yo, un mozu bastante descontentu cola sociedá y el mundu que-y tocó vivir, pero siempre vamos tener la oportunidá d'opinar, aldericar a través de la rede de redes.
Nun teo tovia mui nidio como voi facer esti blog, nin de lo que voi falar. Lo que ye normal ye que vaiga tratar los temes qu'anguaño m'esmolecen como mozu asturianu, falaré de política, de sociedá, de tou un pocu pa desfogar y pa dicir toes eses coses que m'atronen día tres día.
Ensín más, convidovos a participar equí, a ver si vamos faciendo una comunidá de blogs n'asturianu cada vegada más grande y algamando una presencia qu'anguañu nun tenemos.
Un abrazu a toes y toos.
Inxenieros de chigre Our Otra que esta de acuerdo contigo en todo, [...]
Europa conderga los crímenes del franquismu ¿toa? ¡NON! Musica Si en el pais en el que vivimos [...]
¡Puxa'l mal, puxa'l capital! Musica Pues tal y como esta el pais hoy [...]
Entamamos que ye bastante Mujer Es la primera vez que veo un blog [...]
Inxenieros de chigre Musica Po r lo que veo, hace tiempo la [...]
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
