Quasimodo
18/06/2009
Piesllen empreses milenta anguaño. Y la xente a la cai a fargataes. En tolos sitios a lo llargo de la xeografía asturiana'l ruxerrux ye'l mesmu: "dicen que tal empresa va mal... paez que va trancar". Y el comentariu acierta na diana. Almorzamos tolos díes cola noticia de nueves empreses zarrando y del númberu de xente que van engordar les yá acutralaes bolses del paru. Dempués entéreste qu'un bancu dio un aval pa qu'un equipu de fútbol faiga'l fichaxe más caru de la historia y sales a escape pal WC a echar la raba. Ye la crisis, pero tamién son les trampes amatagaes tres d'esa crisis. Los modernos negreros de la economía y les finances sacando tol porgüeyu que puen d'una economía n'hores baxes. Pescadores sacando ganancia del ríu revueltu y faciendo negociu a costa d'esgoncia-yos la vida a los demás. Trampes per tolos llaos, porque haber, como les bruxes, siempre hai trampes pa facer los que tán arriba y pa padecer los que s'alluguen abaxo. A la cai. A buscase la vida. A emigrar. A malvivir con un puñáu d'euros a manera de beneficencia. Y a engordar como nunca los tiburones que ven na crisis un auténticu bancu de comida pa fartucase hasta reventar. ¿Qué ye una crisis?. Pues una situación onde engorden más los que yá lo taben, y onde aflaquen más los que ya dexaben, pali que pali, a los sos güesos dibuxase so la piel.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
