Quasimodo
14/06/2009
Esa sociedá asturiana d'ehí fuera dista muncho d'otres sociedaes asturianes d'abenayá, combatives, solidaries, lluchadores. Anguaño los rescaldos d'aquelles otres sociedaes asturianes son eso, rescaldos. Sigue habiendo xente lluchadora y solidaria que se mueve n'ámbitos minoritarios y marxinales.
Pero anguaño la sociedá asturiana ye la de les prexubilaciones, les de la xente que se pon la zancanía pa consiguir un puestu de trabayu probetayu a costa'l compañeru d'al llau, la de los que, apocayá, pedíen un créditu pa dir de vacaciones bien lloñe y tornar enchipaos na so grandeza y poderíu. La sociedá asturiana mayoritaria de güei ye la de l'apariencia, la de mirar al otru penriba'l costazu pa se sepa que tú tienes más bayura qu'él, anque seya xusto lo contrario. Y el reflexu políticu de too esto tenémoslu ehí delantre los focicos. Votando siempre a los mesmos, pase lo que pase, y truene o faiga sol. Hasta cuando dalgunos que se denominen nacionalistes y d'izquierda alternativa algamen la Xunta Xeneral fálta-yos tiempu pa voltiar la espalda a lo que dicíen defender pa echase en brazos de la vidorra y la faltriquera bien enllena d'euros. Nesti país nuesu crió muncho la boroña y los resultaos son los que son. Esa sociedá asturiana de tolos díes tien muncho más que ver col sálvese'l que pueda y el desear que l'otru quede ciegu anque a ti te cueste un güeyu que con nada asemeyao a la collaboración , la comuña y la solidaridá. Y el problema pa los asturianistes ye esi, que tienen qu'actuar y tratar de sacar alantre les sos propuestes semando nun tarrén social que ta más averáu a un ermu que a una llosa fértil y bien cuchada. Y cuanto primero esi asturianismu s'entere de cuála ye l'auténtica realidá social d'anguaño, meyor pa él y pa toos. Porque si se trata d'actuar nuna sociedá que namás qu'esiste na imaxinación de los asturianistes/nacionalistes los resultaos son
los que se vienen acollechando dende hai abondos años. Anque se vean agravaos enforma polos enfrentamientos y dixebres, qu'eso tamién tien bona parte de culpa, por supuesto. Pero a la hora d'analizar los porqués de tantu fracasu y tanta desconexón, hai que s'enterar, d'una vegada por toes, que la sociedá asturiana actual tá más cerca de lo acomodaticio y insolidario que d'otra cosa.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
