Quasimodo
04/06/2009
Dictó'l xuez y dalgunos metieron el pie hasta'l todiyu na moñolada. Esto ye la bircha, nin. Tanto glayar, tanto esprecetar, tanto esguedeyar clamando por xuntances y de focicos escentellaos contra esta xarra d'agua frío. Vamos, más que frío, xelao. A lo qu'opine la xente que-y dean. A lo más afayadizo p'avanzar que lo h.odan. Una vuelta más, l'embeligru maraviyosu y el partidismu tochu y más curtiu que'l desarollu una berza impónense. El panoyismu mental nun estrema lo que debiere facese de lo que pudiere ser xudicialmente correcho. Y ehí ta la trampa y l'artu qu'una vuelta más fai zapicar no de siempre a los de siempre. Si nun ven el precipiciu allá ellos. Si se quieren esfocicar no fondero'l sotambiu ye la so decisión soberana. Si se dediquen a la xera política porque se-yos entama mui mal xugar a la rana o a la llave pues que lo faigan y que-yos preste. Si tanto-yos pruye cavar la so propia tumba política pues que se tiren de cabeza a ella y alón. En pasando les prósimes elecciones europees y dempués de facer un nuevu ridículu espantosu, a ver quien ye'l babayu que tovía tien la poca xixa d'atrevese a xuxuriar que representa a una opción de referencia y de futuru.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
