Quasimodo
15/01/2010
Nalando pelos blogues y diarios dixitales nótase'l llamamientu. Hai coincidencia que col entamu d'esti añu 2.010 lleguemos a l'antoxana de les prósimes eleiciones autonómiques.
Llegó entós el momentu d'empecipiar a asitiase nes posiciones.
Dalgunos enfotaránse en dir a los comicios pa facer testimonialismu y darréu quexase de lo poco que los quieren los votantes asturianos sofitándose nes xides más variaes.
Otros camentamos qu'aportó'l momentu de dexar de llau l'amateurismu pa facer política profesional, que ye como dicir qu'hai que poner toles erbíes y tola carne nel asador p'algamar representación na Xunta Xeneral dende les organizaciones polítiques d'ambitu asturianu: nacionalistes y asturianistes.
Como les matemátiques son mui necies, encamiéntennos qu'esto cabero namás que se va llograr per entemedies d'alcuerdos de mínimos y de xuntances.
Yo soi partidariu dafechu d'esos alcuerdos de mínimos y d'eses xuntances que ye la manera que pescancio de facer política profesional y d'arrequexar testimonialismos que namás qu'empobinen a riestres interminables de derrotes.
Asina que güei ye un día tán afayadizu como otru cualquiera pa dicilo alto y claro.
09/01/2010
Al final el Gobiernu ZP y la so xermandía de cata-subvenciones van salise cola suya.
Van encetar Internet baxo'l pretestu de curiar polos drechos d'autor.
Según lo tienen entamao tal paez que quieren daveres que dalgunos nun se pasen nesti tema coles descargues.
Pero ye too mentira. Lo que s'escuende detrás d'esti mazcaritu nun ye sinón una simple xida pa recortar la llibertá d'espresión na rede.
Esti Gobiernu, tán amante de les prohibiciones de toa mena, quier acabar con un mediu que-y resulta incontrolable hasta agora. Y esi ye l'oxetivu final.
Que digan lo que quieran y que vengan coles xustificaciones y argumentaciones que-yos pete:
Yo nun creo nin un res de lo que dicen.
30/12/2009
"Cuando siento falar d'inteleutuales echo mano a la pistola".
Esta ye una frase célebre nacida alrodiu de la cabera guerra civil, dicha en castellano.
Los inteleutuales, los qu'empleguen la lletra y el papel como sospechosos d'antipatriotismu, de foroñu qu'esmigaya los pegollos d'un réximen. Lo deseable y patriótico son la pistola y la bota militar.
Los estremos tóquense. Anguaño hai una xermandía qu'amuesa un criteriu peculiar. Pue facese país, militando equí o ellí, diendo a manifestaciones, pegando cartelos o vendiendo pegatines. Hasta escribiendo en diarios, llibros, o revistes, siempre que la lletra tea claramente impreso, pero...
Hai una esceición. L'equivalente actual a los intelectuales d'antaño. Ye la xente que realiza'l so trabayu al traviés de la rede, del mundu virtual. Precisamente l'ambitu au más rabiosamente se pue utilizar la llibertá d'espresión ensin xuncise a servilismu dalu. Y la llibertá d'espresión manca. Nunos casos a los encerrizaos nes virtudes prusianes al serviciu de llíderes indiscutibles. Notros, a los vendíos por puestos, perres, y prebendes al réximen clientelar y corruptu asturianu.
Y toca entós la criminalización internáutica. El que faiga'l so llabor al traviés d'un tecláu y una pantalla (herederu de los que lu fixeron col papel y la pluma, o cola máquina d'escribir) ye una puxarra asturianista, un escarrapiu: basura inteleutual que non solo nun aporta nada, sinón qu'estorba.
Esa ye la situación "paramilitar facistoide" a la que llegaron ciertos grupos marutaos d'asturianistes, nacionalistes, izquierdistes, y vete tu a saber cuánto más. La so aportación cimera al debate asturianu ye la de concluir categóricamente que'l trabayu intelectual desendolcáu al traviés d'internet ye una rémora y una moñolada qu'atenta contra les más fondes esencies del patriotismu asturianu.
Al final, ye mui fácil reconocer cuándo nos alcontramos delantre d'estos individuos: si-yos xuxuries qu'escribes y sopelexes los tos pensamientos al traviés d'un ordenador, echen por actu reflexu les manes a los cadriles buscando les pistoles.
Porque, vuelvo a repitilo, los estremos tóquense.
21/12/2009
Hai xente que trata de construir un discursu asturianu con mayor o menor fortuna. Un discursu que debiere valir p'actuar na realidá tratando de camudala llevándola hacia finxos cada vegada más asturianos.
Tamién hai xente que se dedica a enredar y pasalo bien iguando discursos imposibles ya surrealistes. Nun-yos importa un res la realidá nin camudala. Afáyense nel alderique sobre'l sexu de los ánxeles como en cá güelu.
Vendríanos bien enfotanos n'estremar a unos y otros.
Y nun entrar al trapu de les espiriques de rapacinos mentales qu'enxamás van escutruxar por más años que pasen.
Porque si perdemos el nuestru tiempu con ellos, enxamás vamos ser pa entainar pel camín de la defensa de lo asturiano.
Vamos dexalos a ellos colos sos trebeyos.
Y nosotros a lo nuestro.
17/12/2009
Critiquemos abondo a Valledor cuando protestaba y siguía ocupando'l so puestu parllamentariu.
Agora toca felicitalu pola coherencia de dexar esi escañu ante l'enfrentamientu cola llinia oficial de la coalición.
Agora a los que lleven les riendes d'IU y BpA esbarrumbárense-yos les xides. Queden ensin mázcara a la vista toos.
El que dicen que va sustituir a Valledor, Roberto Colunga, ye miembru destacáu d'una fuerza política que se define como nacionalista d'izquierda y va tener en bandexa demostrar qu'esto ye asina y que nun nos taben tomando'l pelo.
Ensin la mázcara valledoriana p'amatagar la collaboración vergoñosa col gobiernu clientelar y fondamente antiasturianu, y la sustitución previsible nel escañu, lo que queda de llixislatura autonómica pue resultar anque seya un mizquín más interesante.
Interesante y a cara descubierta.
A ver qué pasa.
Dia del confusionismu. Quasimodo. Nomenón. Nun digo que namás que tenga qu'esistir [...]
Dia del confusionismu. Xuacu Vas permitime que nun tea d'alcuerdu contigo. Paezme [...]
Falta de lliquidez Descargar Pues si falta liquidez es porque algo esta [...]
Sectarios Descargar Hay que andarse con cuidado con este tipo [...]
Independentistes Descargar Tienes razon en bastantes cosas de las que [...]
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
