Quasimodo
30/07/2009
Un madrilanu llega a Candás y siéntase nun chigre. Llama al camareru y diz:
-Chico, ven aquí-.
El camareru llega y contésta-y:
-Equí n'Asturies nun se diz "chico", así que nun me vuelvas llamar asina. Pues llamame Xefe, Camareru, Tíu... pero chico... nun lo vuelvas facer-.
El madrilanu entama a mosquease y diz:
-Vale, Tíu, no pasa nada. Ponme un vasito de cerveza-.
Y'l camareru respuende:
-Equí n'Asturies nun tenemos "vasitos de cerveza", puedo ponete una cerveza, una caña, una xarra, un quintu, una birra, una garimba... pero un "vasito de cerveza"... non-.
El madrilanu, yá permosqueáu, diz:
-¡Vaya!. Pues ponme una caña, Tíu, y de camino tráeme unas olivitas-.
El camareru mira al "madriles" con despreciu y xingando la cabeza pa los llaos retruca:
-Equí n'Asturies nun tenemos "olivitas". Puedo ponete unes aceitunes si quies-.
El madrilanu, yá aguantándose pa nun se tirar al camareru, va y diz:
-Manda cojones el Tíu, pues ponme unas aceitunas-.
El camareru va y torna colo que-y pidieren.
A la hora de pagar, el madrilanu apúrre-y les perres al camareru y cuando-y trai'l cambiu diz:
-Un segundo, tú, que tengo curiosidad, aquí en Asturias, ¿Cómo se les llama a los Gilipollas?-.
Y contésta-y el camareru:
-Equí nun los llamamos. Vienen ellos solos pela autopista dende Madrid...-.
27/07/2009
Llámase Manuel Busto y ye maliayés. Apocayá llograre'l so quintu títulu européu de maratón en piragüismu consecutivu. A ello hai qu'amestar los nueve títulos mundiales qu'acollecha nesti deporte. Un historial que muestra, fuera de toa dulda, que nos alcontramos ante un deportista fuera de serie y arguyu pal deporte asturianu. Eso sí, la condición de deporte non mayoritariu del piragüismu y la catalogación de natural d'una provincia escaecida del deportista faen entrambes que la so impresionante trayectoria quede tapecida peles informaciones y los aponderamientos a practicantes d'otros deportes mayoritarios y que tienen la "suerte" de pertenecer a comunidaes con abonda más reconcocencia y mayor pesu nel estáu (casi toes anguaño). Pero ehí ta la descomanada xesta deportiva de so y que tien toles traces de vese aumentada nel futuru, pues tovía tien correa pa siguir algamando triunfos per bien de tiempu. ¡Norabona, campeón!
11/07/2009
Si yes gochón. Si te gusta arrollicate no porcaz. Si disfrutes como un gorrín fozando na folla tas de suerte estos díes. Yá tienes en Xixón allugada la gochonada correspondiente a esti añu. Subvencionada coles perres de toos pa igua-yos la vida a cuatro fartones vividores que, pa detrás, lleven mui a gala eso de considerar la llingua asturiana como dalgo que da arcaes. La feria de la fumareda sarteniza que se t'apega a la ropa como si fuere cola. De lo cutre. De lo barriobaxero y de la incultura marutada d'intelectualidá yá ta en marcha. La so esllava fiede que tira p'atrás. Dalgunos tan de norabona.
05/07/2009
En qué tarán pensando dellos cuando falen o escriben. Qué estrañu trepe tendrán pela cabeza. Qué rara realidá ven tolos díes al abrir los güeyos pela mañana.
D'ónde pañarán les sos teoríes como manzanes del sapu. Cuántos años más tendrán que pasar zapicando na mesma piedra pa comprender lo evidente. O a lo meyor lo evidente nun-yos importa un res. Impórta-yos el so ego, el so endiosamientu. Sí, debe ser eso. Onde debieren dicir "patria" dicen "yo". Y onde debieren dicir "proyectu de futuru" dicen "lo que me sal de los güevos".
25/06/2009
Póneste a almorzar pela mañana y empapíceste tolos díes colo mesmo. La lletanía de calabres empresariales que van pal desguace o la deslocalización y la penitencia de los respectivos trabayadores. Les dos que toquen estos díes son Albo y Coveisa. Dos gargaxaes na cara en dos sectores distintos. D'un llau la industria conservera. D'otru llau una concesión d'automóviles. Y otra montonera más de trabayadores arrecostinando coles consecuencies d'una malfadiada crisis que yá suena más de la cuenta a coartada pa que ciertes utres lleven alantre los sos planes especulativos. Y lo peor ye qu'inda nun toquemos fondu y que vamos almorzar munchos más díes golifando'l tufu d'un esbarrumbe que provoquen unos y que paguen otros. Cada vegada más llarga la llista de los que nun saben de qué van vivir. Y cada vez más llarga la llista de los vividores...
Indecencia y desvergüenza. Mujer Sigo sin entender como pudieron dar tantisimo dinero [...]
Equí multando y ellí robando. Mujer Y pensar que son muy pocos los casos [...]
Coherencia y mázcares fuera. Mujer Si muchas personas se quitaran las mascaras veriamos [...]
Puerta pesllada y puerta entornada. Mujer Esperemos que esto sea el primer paso para [...]
Los mínimos yá nun se cumplen. Quasimodo Reculamos a los tiempos preconstitucionales de la transición. Salú.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
