Quasimodo
02/10/2009
Inyecten a la banca perres sacaes de los bolsos de toos y dempués pasen coses como la xubilación del dirixente del BBVA que llevantó ronches nos últimos díes. Dempués eches una güeyada a les nómines de tanta xente que trepa compo pue, tranquilizantes incluios, pa llega a final de mes y observes que-yos llanten retenciones que van dende los 300€ a los 600€. Casi nada.
Dempués vien el gobiernu de ZP a vendenos la moto del beneficiu de la xuba d'impuestos que quier aplicar a partir de Xunetu del añu que vien, a lo zorro y pel branu. Y too ello col aplausu de los sos mamporreros asturianos que van dende socialistes, a comunistes y nacionalistes, axuntaos toos ellos na izquierda plural. Xente que nun país de paraos, emigrantes y mileuristes alcagüeta too esto tan feliz.
Y too esto pasa porque tamos somorguiaos na mierda de la indecencia y la desvergüenza ensin llendes. De les cares de cementu y de la desfachatez cimera. Al que-y toque que se h.oda. Esa paez que ye la conseya que fai de finxu guía nesta sociedá de probetayos qu'apocayá se creyíen los más ricos y los reis del mambu.
Pero toles trampes rescamplen. Y l'espeyismu del fontán d'agua fresco camuda a la hora la verdá nel sable caliente del desiertu.
Les élites polítiques gobernantes tán dándonos comu panzorru. Tamos pasándolo mal y vamos a peor. Anguaño la llibertá viéndese nes farmacies en forma de tranquilizantes y nos chigres etiquetada de vinu perronero.
Nun nos queda nada.
28/09/2009
El calandariu reivindicativu nacionalista asturianu tien tres feches destacaes.
La celebración del 25 de Mayu. Los actos del Día de la Nación Asturiana, el 8 de Setiembre. Y la Revolución d'Ochobre del 34, magar nesti casu caberu cinque fundamentalmente al nacionalismu d'izquierda.
Asina que pal prósimu mes d'Ochobre va pesllase'l ciclu correspondiente a esti añu.
El filu conductor de toles celebraciones ye que caún tire pel so llau.
Val. ¿Y agora qué?. ¿Cuál ye'l siguiente pasu?. ¿Cuálos son los oxetivos?. ¿Pa ónde empobinar?.
El ciclu zárrase como un círculu viciosu.Como'l cuentu la bona pipa que siempre xunce'l final col principiu y nunca acaba.
Nun sé qué piensa ehí fuera la xente, porque d'estes coses nun fala. Pa ellos hai PP, PSOE, IU y namás.
Creyese que s'esiste pa los demás y esistir daveres pa los demás son coses estremaes.
Podemos creyer qu'esistimos ehí fuera. Pero eso tien más d'ilusión que de realidá.
(Yo, la mio gorrumba y el mio reuma sabemos que nun esistimos pa naide. Neso llevamos ventaxa).
12/09/2009
La yedra xube peles paredes esboroñaes del torruxón atapándoles de verde y tapando les resquiebres cola so fueya.
Vivimos nun país gris y argayáu de xente amomiao que caleya siempre cola mesma cara como ayenos al acontecer diariu. Por más que la frayadura s'espurra perende siempre la indiferencia y el caminar autómata.
Qué bien pintaría que la yedra tapare'l buxu d'esta tierra y les sos frayadures.
Pero la yedra pa xorrecer y esguilar necesita del agua y somos una xente que cada vegada ama más lo seco y ermo.
03/09/2009
Camín del 8 Setiembre, digo basta. Remóntome. Contra los cabezaleros amantes de la so semeya y adoradores del so embeligru. Contra los que consideren el futuru la so corrada particular. Contra los que prefieren que se funda too enantes de renunciar al so tronu de moñolada. Contra los llambeculos camudaos de cortes pretorianes. Remóntome pa nun empozame hasta la cocorota nel noxu y les arcaes. Dende lo alto d'esti esboroñáu torruxón garro'l turullu y llamo a cnceyu esperando nortiar dalguién, magar seya ún rebalbu namás, nel finxu'l cielu. Faigo un brinde a remontase contra tantu bixorderu, contra tanta poca xixa, contra tantu llevantu y bilordiu utilizaos empara del argumentu razonáu y fondu. Sí, miániques, camín del 8 Setiembre, faigo un brinde a remontase yá, abiertamente, ensin mieu nin prexuicios. Faigo un brinde a La Xuntanza...
25/08/2009
Una anéudota verídica d'unos turistes qu'esti branu foron a un centru d'información turística. Entren y entrúguen-y a la persona ellí encargada qu'ónde puen ver "xanas". L'informador contésta-yos que, con un pocoñín de suerte, puen ver n'Asturies raposos, rebecos, ferres... pero xanes non, porque son unos personaxes mitolóxicos que nun pertenecen a la fauna nin al mundu real.
Un choque cultural típicu del que visita un país distintu al de so. Pero habrálos que sigan aneciando en negar que tenemos una cultura propia.
Indecencia y desvergüenza. Mujer Sigo sin entender como pudieron dar tantisimo dinero [...]
Equí multando y ellí robando. Mujer Y pensar que son muy pocos los casos [...]
Coherencia y mázcares fuera. Mujer Si muchas personas se quitaran las mascaras veriamos [...]
Puerta pesllada y puerta entornada. Mujer Esperemos que esto sea el primer paso para [...]
Los mínimos yá nun se cumplen. Quasimodo Reculamos a los tiempos preconstitucionales de la transición. Salú.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
