Quasimodo
14/11/2009
"Nun ye eso, nun ye eso". Repiten los que tan en desalcuerdu con daqué arreyao o emparentao coles sos idegues.
Repítenlo dellos cristianos que piensen que l'actual iglesia católica nun ta realmente colos probes nin espeya l'evanxeliu de Cristu.
Repítenlo dalgunos ecoloxistes que refuguen de les actividaes de ciertes organizaciones d'esta mena arreyaes a partíos nel poder.
Repítenlo xente d'izquierda y de drecha que consideren que los partíos hexemónicos d'eses ideoloxíes nun representen en realidá lo que pregonen.
Repítenlo dellos nacionalistes que consideren que los partíos qu'asina se denominen nun actúen acordies a como ellos piensen que deberíen facelo.
Y asina un llargu etcétera.
Pero la realidá ye la que ye, non la que caún quixere que fuera. Y, magar fadie a dellos (a min, por exemplu), la ilesia ye la que tenemos, la derecha tamién ye la que tenemos, la izquierda lo mesmo, l'ecoloxismu neto a lo anterior, y el nacionalismu el que funciona anguaño.
Porque, en realidá: "Sí ye eso, sí ye eso".
28/10/2009
Esta vegada llantáron-yos 12.000€ al PCPE por un asusntu de cartelos. Otres veces los multaos foron Darréu. Y otres cualquier organización, siempre minoritaria, onde hasta-yos meten penes de cárcel como a sindicalistes de la CSI. Y la mayoría de les veces por exercer la llibertá d'espresión con esos medios qu'utilicen los que nun tienen fortunes pa controlar diarios, radios, y televisiones:cartelos, pintaes, pegatines, manifestaciones... La desproporción ente'l castigu aplicáu y la infracción supuestamente cometida ye pa echalo a gritos. Una vergoña. La venganza del tiburón sobre'l pexe ñarru.
Pero casualmente les organizaciones onde militen y faen carrera pa resolvese la vida más que de sobra esos que tantu gustu tienen por reprimir, multar, y encarcelar, son les mesmes que tolos díes salten a los medios de comunicación por robar a embozaes les perres de toos. Por saquear mafiosamente les arques públiques. Los escándalos y corrupteles sucédense ensin tiempu pa garrar aliendu y a velocidá de vértigu. Y too ello en plena crisis y cola xente apolmonao pa ver cómo se les arregla pa llegar a fin de mes, conseguir que nun los afuegue la hipoteca, o penitenciar pa da-y una vida digna a los fíos.
Estes son les coses podres que pasen nuna sociedá cada vegada más apodrentada. Más facistoide. Cola fuérciga de les diferencies sociales agrandado per minutos. L'imperiu de los lladrones que s'entretienen, mientres se faen ricos, reprimiendo a los demás, porque dexalos na ruina paez-yos poco.
Cada día que pasa, cuando m'asomo al torruxón a nortiar siento más ascu y más voltura de lo que veo. Y mañana más de lo mesmo. Veremos a quien-y toca llevar multes y palos y cuál va ser l'ultimu escándalu de lladroniciu políticu.
15/10/2009
Agora ya entamen a encaxar meyor les pieces del rompecabeces. Va desbloquear tol asuntu de la financiación del superpuertu d'El Musel.Acaba de danos l'anuncia y la clave la UE. Pero la condición ye que va destinase a abellugar a aquellos barcos víctimes de catástrofes con abondu impactu ecolóxicu. O seya, que si un barcu cargáu de petróleu empecipia a perder a golfaraes la carga, pues p'Asturies. El futuru de les nuestres costes yá sabemos el que va ser: un basureru. La trampa rescampló. Lo de "paraísu natural" nun ye que suene a chiste, que yá sonaba cuantayá, agora yá ye pa mexase de risa.
13/10/2009
Menuda ximuestra de democracia la que tenemos. Equí'l que se ximielga llévalo crudo. Ehí ta esi emperramientu por encaxotar a Cándido y Morala. Tien que ver con cualquier cosa menos cola seguridá ciudadana. Equí y en tol Estáu manda un entramáu policial-xudicial-políticu. Y tenemos exemplos a mamplén. Acosu a representantes vecinales, a militantes polítcos, a reivindicadores llingüísticos, a sindicalistes. Tolo que nun ta col réximen que sustituyó al otru réximen ta contra él. ¿A ónde vamos llegar asina?. Pues a la criminalización de cualquier ciudadanu que quiera exercer llibremente los sos drechos. La disyuntiva ta clara: o calles y achantes, o te frayen.
06/10/2009
Ves coses rares perende. Paecen indicar que la realidá va per un llau y dalgunos per otru. Noticies qu'abren la puerta al discutiniu políticu o a les teorizaciones abstractes tienen abondos comentarios. Noticies relatives al paru o la cultura tan ermes d'ellos. El mundu virtual y el real tan bien dixebraos, polo menos pa esta mano del mundu internáuticu.
Qué lloñe paez quedar el mundu d'ehí fuera.
Indecencia y desvergüenza. Mujer Sigo sin entender como pudieron dar tantisimo dinero [...]
Equí multando y ellí robando. Mujer Y pensar que son muy pocos los casos [...]
Coherencia y mázcares fuera. Mujer Si muchas personas se quitaran las mascaras veriamos [...]
Puerta pesllada y puerta entornada. Mujer Esperemos que esto sea el primer paso para [...]
Los mínimos yá nun se cumplen. Quasimodo Reculamos a los tiempos preconstitucionales de la transición. Salú.
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
