Quasimodo
01/01/2009
Allá pel mes de Payares del añu que yá nos dexó los medios de comunicación al serviciu del Gobiernu Asturianu anunciábennos les ayudes qu'ésti diba ofrecer a más de 300 pequeñes y medianes empreses como midida pa resalvar esta crisis na que tamos somorguiaos. L'aparatu de propaganda, siempre bien engrasáu y sollerte del Gobiernu Arecista entamaba a funcionar una vez más.
Pero foi pasando'l tiempu y les ayudes prometíes nun apaecíen per nengún sitiu. Los despidos que ya entamaren a producise siguieron el so cursu y dalgunos empresarios metieron la llave na pesllera esperando'l momentu de xirar la moñeca y trancar definitivamente.
Y entóncenes, cuando l'añu taba yá dando les boquiaes los medios de comunicación serviles sorprendíennos con una anuncia que respigó a más d'ún. El Gobiernu Asturianu anunciaba que nun tenía lliquidez y polo tanto les cacarexaes ayudes nun se podíen distribuir nenyures.
Esto de la falta de lliquidez yá se sabe que ye como lo de Campoamor, depende del cristal col que se mire, que nesti casu ye del sitiu onde van dir a parar les perres. Pa viaxes de placer marutaos de xestiones político-económiques, pa mantener una carrapotada de xente nomada a deu nes diferentes conseyeríes, direcciones y subdirecciones de la Xunta Xeneral, pa financiar los distintos "parques" de toa frasca que nunca naide sabe pa qué cóime sirven hai perres. Pa otres coses hai una clara falta de lliquidez, faltaría más.
Cuando escribo estes llinies yá tán aprobaos los nuevos presupuestos. Unos presupuestos que taben pendientes de roblar por una simple cuestión de puestos y perres a desquiñonar nun pactu de gobiernu onde se mandaren a tostar guiaes cualquier tipu de reivindicación (llingüística, ecolóxica, etc.) como tol mundu sabe yá a estes altures. A ver si por cuenta d'esto entamen a apaecer los fondos prometíos y, polo menos, dalgún trabayador asalariáu consigue nun empezar l'añu dando vueltes al parque de la so ciudá con una carta de despidu nel bolsu.
10/12/2008
Préstame la pallabra independentista y les sos ximielgues porque son contundentes y poco daes a l'ambigüedá. Y préstame tamién pola so capacidá de llevantar unes ronches enormes na coyonera de los españolistes más encerriscaos.
L'independentismu asturianu actual nun ye cosa del otru día. Yá lu podemos restrexar alrodiu los años 80 del sieglu pasáu. Y al ritmu qu'anguaño lleven les coses ye tiempu enforma allugáu ente nosotros.
Los independentistes asturianos lleven cuantayá realizando la so particular travesía del desiertu. Cuésta-yos atopar el camín afayadizu pel qu'entainar y espolletar. Pa más desgracia ye'l so llar posafuelles frecuentáu por sectarios y yá se sabe que onde éstos medren les perspectives d'algamar daqué mengüen en proporción asemeyada.
Pero tán ehí. Perviven col pasu de los años y nun se sumen nin se dexen apoderar. Y lleven tando presentes bien de tiempu yá, tou un méritu que ye de xusticia reconoce-yos. Faltarán-yos otres coses, pero d'enfotu y ganes de siguir na brecha nun anden nada mal.
Repúname'l poder clientelar qu'hai instaláu n'Asturies cola so rede trupa y onde nada nunca se mueve. Dame noxu a esgaya. Asina que cuando veo a tantu enchipáu españolista tascar los tolanos contra les faroles, los árboles del parque o les peslleres de los coches oficiales por culpa del pruyiciu que les ronches independentistes-yos llevanten, qué queréis que vos diga, disfruto como un verderón, blinco de prestancia como un sidru y méxome de risa como un guah.e
06/12/2008
El sectariu ta ende. Achisba, esbabáyase, nagua. L'embeligu del mundu ye él y la so camaratada. Lo demás qu'esbarrumbe, que s'esñice y se suma.
Los sectarios abeyen per tolos llaos. Nel asturianismu, nel nacionalismu, na llingua, nos blogues...
Les coses son defendibles si encaxen nel ego del sectariu o de la so tribu. Pone-y el güeyu nel cartafueyu: ehí s'alluga'l cáncanu qu'apodrez l'espoxigue de lo propio. Nel sectarismu y los sectarios.
Mentes sigan reinando nel so tronu la puerta del futuru va siguir pesllada. Y ellos tienen la llave.
21/11/2008
Ye sorprendente la capacidá que tien dalguna xente nestes tierres pa garrase a los puestos como les llámpares al pedreru.
Da lo mesmo que lleven les organizaciones que dirixen al despeñaderu. Que nun consigan oxetivu dalu. Que nun construyan nada y lo esgoncien too.
Hai una incapacidá de renovar descomanada. Pasen años a embute y siempre ves les mesmes bisarmes coles sos zunes y discursos tronaos. Colos sos sectarismos y guardies pretorianes dispuestes a frayar cualquier opinión estremada.
Cuánta falta facía pasar el baleu per instituciones y organizaciones de toa triba. Remocicar, camudar, renovar. Dar entrada a xente nuevo con otres mires, enfotos y, sobre too, maneres de facer y capacidá pa llograr alcuerdos y xuntances.
Más mastines que sepan defender con nobleza les causes y menos cocodrilos ciegos de soltar taragaños perdayuri hasta a la so mesma cola.
19/11/2008
Nortio. Nel finxu'l cielu vien el nuberu. El torruxón ta llentu. Esguila la yedra. Rance'l reuma. Solu. Ensin vecín nin fañagüetu. Un bultu escuru que se confunde coles solombres na nueche. Como un mur. De corrigüela d'arriba abaxo, de norte a sur y d'este a oeste.
Unos antroxen. Otros sufren. Unos nalen na bayura. Otros focen na basura. Unos fuelguen. Otros frayen.
Yo nortio.
Independentistes Quasimodo Tas finu: el llar (de los independentistes) ye [...]
Independentistes tas finu Qué llar posafuelles frecuenten independentistes? Ehí nun m'apaez [...]
Independentistes Quasimodo Y pue ser crónica
Independentistes Carlos X. Ficiste un testu guapu. Ye la roncha más [...]
Independentistes Carlos X. Ficiste un testu guapu. Ye la roncha más [...]
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
