bona agua p'aselar la cansera
10/01/2006
- II -
Malpenes tenía doce años. Aquella mañana nun
m'apetecía dir a la escuela. Non ss', yera un dii de
primavera tan guapu... Manolin tampocu andaba pola
llabor, asina que nun entremos na escuela. ¿A u dir?
Poro, alluego teniemos de calletar un sitiu pa
abellugamos. Nun tenía de vemos naide. Yo
propunxe los argaxos de la vieya ilesia de S. Pedru. Pero enantes, chisgue-y un güeyu a
Manolin, habiemos de mercar carraca, o seya
"impedimenta oralis". Nun yera 'l nuesu
maxinamientu pasar fame naquelles hores felices.
La mio güela diereme 5 pesetes el díi enantes. ¡Que
meyor que fundiles nos pastelos per-ricos que facía
La Imperial!
Dos cais enantes d'aportar a la escuela, colé pa la
pastelería. Diez portales primeru de ver el
colgadiellu que ruxía a la pasteleria La Imperial, ya
notabase'l ricu arume a masa pastelera. Ebriagáu
pel arrecendor de fornu pasteleru, cutí al
establecimientu. Mande-y a Manolin que m'esperara
un portal mas pella'. Nun cuadraba que mos vieren
a dos guajes a aquelles hores de tar en clase. Si
m'entrugaben, podía dicir que yera un recáu de mió
má, que tinia visita. O daqué asina. De toes formes
nun diba esmoleceme pol bilordiu o trola, que-yos
diba meter. Xuru que Xuacu taría mediu tresveláu,
brugáu de tar trabayando tola nueche nel obrador y
matáu d'alguardar por Sinda, la dependienta, que
por aquellos intres xuru taba al momentín d'aportar
al negociu.
Empurré la puerta y sonó la campanina. Di los
bonos díes, mui politu, y con cara suañu, en sin
llevantar muncho la voz. Nun comenía que
s'enterare l'amu, D. Cosme, que tinia fama de
chiplateru ente les muyeres y demás clientes, y al
que nin un res se-y esmucia col cuentu de da-y a la
parpayuela cola parroquia pa nun tar a mal con
naide. Güei camento que bramente, lo que facía yera
curiar el so negociu. Pero ye que falaba abondo.
Abondo pa ser home, digo yo.
Asina que yera pelligrosu que mos viere. Si mos
nortiaba, en menos de 10 minutos lo sabrien les
nueses más. Y d'elli, a tar col culu calentino por un
par de diis, y en sin una perrina por un mes, lo
menos.
-Bonos dis, Xuacu. ¿Ponesme un durin pastelos
variaos? Ye que mio ma' va tener visita.
-Home, Tinín, tu perequí. Cuantayá que nun te
vía...lo menos un dii.....
-Anda hom, entaina, qu'aporto sero a clase...
-Ya va, hom.....pero son abondos pastelos, voy
tener facete dos bandexes...
Un duru d'aquella, o seya, cincu pesetes de 1940,
yera la de dios. Xuacu punxome dos bandexes a
espampanar. Desurdí de la pastelería
trabayosamente, con aquel lladraláu de pastelos.
-¡Vaya estrobada pastelos! -esclamó Manolín.
-Ná, palos dos nin p' entamar -dixi arrechu.
¡Qué razon tinia Manolin!
Manolin carretaba coles enciclopedies y los preseos
escolares. Yo diba rellambiendome col arume los
pastelos. Evitamos pasar pola plaza la Casa
Conceyu -l'Axuntamientu- asina que fuimos pola cai
la Colexata y entamamos correr comu alma que
lleva'l diañu pol Campu les Monxes, camín
l'atroxaderu piedres que yera la ilesia de S. Pedru.
Toudios diba ellí a pañar piedra pa iguar les cases.
Más qu'un vieyu llugar santificáu, semeyaba una
cantera caliza.
La vieya ilesia de S. Pedru, del muru S. Llorienzu de
Xixón españare pelos aires durante la guerra incivil.
Col bombardéu del cruceru Cervera y los trimotores
"heinkel" de los "nacionales", tola zona de Cimavilla
taba fecha una llaceria. Poro, cuandu vía estos
meses d'atrás lo de Sarayevu, nun me chocaba.
Aquello la xente de la nuesa antexeneración viviolo
bien, pa vergoña de tous.
El casu ye qu'entóncenes lo que quedaba la ilesia
yera un peña piedres afondigañá nel so centru,
comu si d'un crater volcanicu se tratare. Munches
de les muries la ilesia taben mazapilaes, con
pelligru d'argayase. Pero pa nos, nun hebia
problema dalu. Asina que tres xubir pela costanina,
aportabemos a un furacon au podriemos tar en sin
que mos viere naide. Podriemos xugar,
xintar....facer cualaquier tracalexada o sanxuanada
ensin mieu a que mos pillaren los vieyos. Yera un
abellugu perfechu....
.......perfechu pa.....
09/01/2006
Grande ye'l duelgu que nun tien dueñu,
que vien,
que va ensin desafuegu,
que tá dayundes
mas nu' afayase nenyures:
invivible llocura la inorancia d'esti fechu.
Rempuestes nun aporten a la tiesta
sacantes
lo dual, el yo cafiante...
Caminos que nun tienen bona miesta.
Depués d'una vida bien lloquera
invocando a la ciencia sofitante
qu'embuya tolos males xamasquera,
ábresemos la muerte xixilante.
Y pa esi camín,
manín,
magar tenten fuxilu trapichante,
(camín que nadie nun burlla),
nun hai home enforma apuante:
la vida ye mesmo purlla.
Escaecemos (eso creyemos)
faininos esi tragu,
mas pal duelgu que trai tala ignorancia
nu' hai reblagu.
09/01/2006
==================
Dende la perda de la soberania nacionalasturiana nel medioevu (suponiendo que se pudiera emplegar términu talu pa falar d?aquelles dómines), siempres foi lo mesmo cola Castiella Imperial: esborriamientu y esforonzamientu de les diferencies que pudieren tener aquellos territorios incorporaos al so reinu. Y facelo, bien a lo roncha, bien a espetaperru. Asina, la fama rapiega de la Castiella Imperial percorrio? ceo ente los reinos de la península. ¿Que? d?estraño podemos atopar en que los reinos de Portugal, Aragón y Navarra tovieren rocea del grandonismo hexemónicu de Castiella?
La hestoria diz lo que diz
Los "acausos" del destín, que diria un falante mirandés, fainmos güei a los asturianos parte d?España. Y otru territoriu del antigu reinu asturianu, parte de Portugal. Interesante sedría facer comparances ente dos realidades y los resultaos hestóricos d?eses realidaes. Esaminemos que? foi dempues de 1.000 años d?esfarrapamientu y vides paraleles nel territoriu hestóricu del antigu reinu asturianu (o asturlleones, si ye qu?hai perende callos delicaos o xente susceptible)
La cosa ta claro. Demientres en Portugal la Assambleia Portuguesa apreba, a iniciativa del Partíu Socialista, por mayoria absoluta, la oficialida? del la manifestación llinguistica del asturianu naquel territoriu, (vg. el mirandés), equi?, nes Asturies del Reinu d?España, los socialistes (tan isquierdosos y esmolecios ellos, polos pueblos del mundu mundial primios, y les situaciones sociales llaceriantes ya inxustes) nun solo refuguen plantegar la oficialización de la llingua asturiana, sinon que s?amesten cola drecha reaicionaria, cristianisima y antialbortista (esta ta? un pocu a desmanu, pero queda bien) pa dar la espalda a una situación oxetiva, incontestable y bien tanxible, cuala ye, que l?Asturies Cultural ESISTE, que l?Asturianu YE, y que masque-yos pesie, tan enquivocaos de mediu a mediu si creyen que por empozar la tiesta (y poro, nun ver l?asuntu) les reivindicaciones culturales de los asturianos, van fincar nel escaezu. Porque lo que YE, evidentemente, YE. ¿Que? se-y va facer, hom?
Nun soi ver que? fai al asturianu de Miranda de mayor valir que?l d?Asturies, o de Lleon y alrodios. A nun ser que la cosa seya que la República Portuguesa ta habitada por xente de muncho xaciu común, que ve? nes diferencies culturales dientru ?l so pais, una oportunidad gozosa d?arriquecer el propiu patrimoniu cultural portugués, masque motivu d?enfrentamientu y veléa.
Los politicos españoles n?Asturies (güeyu al datu, que diz l?otru), en cambeu, desllumanos pola tradición imperial de la España de los Católicos, los Austrias, o la de la ?unidad de destino en lo universal? de D. Jose? Antonio Primo de Rivera, fain oyíos sordos a un clamor evidente del pueblu asturianu que dicin representar (bueno, val, digamos que de parte del pueblu, aproximao d?unos 200.000 falantes), ciudadanos que pretenden facer valir el drechu humanu fundamental a vivir la propia cultura en sin esclusiones nin discriminances. Asina que los señores políticos españoles fain, de lo que ye cívica actitud, lexítima y comprensible aspiración d?un pueblu que quier falar la so cultura, un motivu d?enfrentamientu y resistencia.
Muncho fadia a los españoles, cuandu salen pel mundu alantre, que-yos saquen lo de la ?Leyenda Negra?. Pero, coñu, ye que ye verda?, hom. Tolos pueblos que fueron a facer valir les sos aspiraciones culturales o polítiques dientru l?imperiu español, fueron machucaos. Que si los moriscos de les Alpuxarres, que si los Guaranies, que si los Araucanos...y llueu los Catalanes y Valencianos de la Guerra de Sucesión. La hestoria del Reinu d?España ye hestoria de claroscuros (comu toles hestories, claro), y no que cinca a los pueblos con cultures diferentes, ye hestoria de resistencies y violencia. Y xusto los que ficieron valir aquella, güei arrecueyen los frutos políticos en forma d?Estatutos d?Autonomia xenerosos y bien apinaos de competencies.
O seya, parez que n?España, nel añu de 1998, a les puertes del añu 2.000, el sieglu de les lluces-lluceres y la conquista del espaciu, pa facer valir un drechu fundamental hai que dir poles vies del tremendismu y la llocura. Ta? claro, que?l ?cafe? para todos? que predicare el güei rescamplante presidente de la empresa d?ellectricida? Endesa, el Sr. Martín Villa, y ex-ministru d?UCD fincó obsoletu y demode?. Agora tenemos Comunidades Autonomiques de primera, a la carta y a la basoria. Obvio ye dicir qu?Asturies, y dalgunes otres que llevaren pel camín del artículu 143 de la Costitución Española de 1978 ta? mui mal situada nesi escalafon. De fechu, nun tien nin taza pa tomar el famosu cafe?.
Mal pescancien los políticos españoles lo que ye la reivindicación de la cultura asturiana. Mal fain en sofitar les diferencies estatutaries que consagren fueros y privilexos nunes partes del estau español (eufemismu d?España), y la nada, notres.
La hestoria ya ta escrita. Agora namai fai falta adeprendela o reescribila. O executala, que tamien pue? ser.
Siempres prestome Portugal, y nunca supe bien el porque?. Les poques veces que fui, nunca sentime estranxeru ellí. Xusto a la escontra de lo que dicin los portugueses que vienen pa esta España de fin de sieglu. Fortunosamente, Aljubarrota foi victoria portuguesa (y de los arqueros ingleses del ?long-bow?)
Nun m?importaria ser asturianu de Miranda, o mirandés d?Asturies. En cualquier casu, sabria que taría viviendo nun bon pais. Nún pais, Portugal, que paga la pena vivise.
Una España, con políticos portugueses, diba ser mas llevadero, peme a min.
---
pa espurrir en conocencia:
http://diariodetrasosmontes.com/cronicas/cronicas.php3?id=451&linkCro=1
05/01/2006
============================
Cunta una lleenda asturiana, tan vieya y aneya comu lo ye l'alcordanza
humana, que la xana mayor de la fonte La Nalona, col pruyimientu
d'ispecionar los sos dominios máxicos, dexo al cuidu de la fonte
mentada a dos xanines nueves: Llarina y Xeles. Y encamento-yos dafechu
que curiaren de non facer migayes colos mortales, n'especial colos
homes, que melgueros y amistosos nun teníin otru enfotu qu'engañifales
pa algamar les riqueces que llindiaben xunto coles sos hermanes, les
ayalgues.
Y nun pasare nin una nuechi del máxicu viaxe de la xana mayor faza les
tierres da la etenra humedanza , pa qu'aportare a la fonte La Nalona
un guapu mozu, de pelu roxu y enguedeyau, papón y nachu, gueyos zules,
de bon porte y franca sorrisa, que dixo llamase Xandru. Aquel mozu,
coles artes llinguateres que trai tener abondo mundiu triao, y la bona
conocencia del universal coral femenin, tiro' d'afalagos y gasayos,
apaterando con moroses y mansulines pallabres los oyíos de les xanes
nuevines. Y con duces -si, duce comu namai pue' ser el meyor de los
postres que'l deseyu carnal alliña- desplicaciones, poesía y cancios,
saco-yos el secretu de les riqueces de les xanes y les ayalgues.
Cuando les xanes cuidaron del so erru, fixeron-y xurar pola so vida,
que nun sacaria porgueyu d'ello, porque si non, el dios Aernu -el
folixeru- comeríalu vivu, con pataquines y tou, al mou vaqueiru,
cocinau en "payecha" con bon compangu.
Y lo que son les coses. Dos dies dempues, xubieron dende los pueblinos
qu'anguañu conocense comu Blimea y L'Entregu, Sama y Llaviana, y
abondos otros de los que non hai alcordanza güei, mozos y moces con
picachones, pales y abondos preseos amañosos pa esgarabuyar pente les
piedres xelambreres de la fonte La Nalona.
Y vieno a facese lo que s'acordare. Aernu presentose delantre Xandru a
cumplir pa comelu por francer el xuramentu que-yos diere a les
xanines -que foron espulsaes pola xana mayor faza lo que guei ye la
fontona de los Arrudos-
Y diba comelu cuando Xandru dixo en so amparu:
"Non franci xuramentu dalu, porque bien ye que non sacare porgueyu
del secretu que me cuntaren, y esu, y namai qu'esu, ye lo que xurare..
Que sigo igual de probe que d'aquella, y pémeque más probe tovia,
porque los demás arriquecieron y yo non. Namai dixi la verda'. Que non
afalé a naide nin fixe promeses nin enviyón. Yo cumplí, y sábeslo
perbien".
Y Aernu mazapilo'. Dengún requexu del alma los mortales ye enforma
tapeciu o xelambreru o solombriegu pa los gueyos d'un dios. Y Aernu
vio' que Xandru, n'efeutu, cumpliere. Bramente, nun sacare porgueyu
dalu de la falta les xanines.
"Bien dicis, mortal. Cumpliste. Porque non ye falta dicir la verda',
anque duelga. Mas non l'algamaste con bones artes. Poro, teo de comete
un migayin". Sorrio' revolvín.
Y Aernu, dando una esgargayada, saco-y la llingua a Xandru, y
desentrellizándo-ylay metiola na payecha vaqueira que portaba 'l
cintu, pa xintala cola sidre de los dioses y bon compangu. Y aina
glayare al alto la lleva: "Que 'l mal que vieno pela to llingua, per
ella cole". Y de sotrucu, comu viniere, esapaecio', cuando entamaba
tresnar la llingua de Xandru con especies y compangu variao -dicin que
colare tan rápidu porque aportaba sero pa xugar a los bolos col dios
Nuberu, que d'aquella andaba mas folixeru qu'Aernu por mor la
primavera-
Xandru quedo' dolíu, sangrando comu 'n coriu.
Mudu de pallabres ñidies pa siempres.
Vivu, pa cuntalo a quien lo quinxere oyer..
¿Cuala ye l'apegadiella, entrugareis?
Nun basta dicir la verdá pa tar a salvu les responsabilidaes. Nin
siquiera los que fain profesión d'esta, o seya, los periodistes.
Munchos periodicos fain declaraciones "d'independencia" y sopelexense
na "so" verdá pa iguala. Pero ye que nestos xareos que toquen con
conceutos tan astratos sofitaos en valores fondamente suxetivos, nun
basta con decir lo que se ye. Hai que lo amosar con fechos. Daqué que
poca xente y entidaes ye quien a arrecostinar.
Y non siempre la verdá ye condición necesaria y abonda comu pa dar el
pasaporte a la impunida', si p'algamala se tresgreden les ensarañaes
llendes de lo "inocuo".
Aquellos que cuiden dir pola vida adorando a la diosa "Veritas"
-verdá- , bien seya la so personal verdá, bien la socialmente
correcha, que caneyen con abondu procuru.
La verdá ta'n munchos llugares. Y hai tantes comu enfotos, humanos y
divinos. (Tamien ye verdá qu'hai más espedientes "X" de los que
barruntamos :)
Abondes verdaes comu pa xustificar cualaquiera barbarida que se mos
pruya.
En cualuquier llau.
Inda nel vin.
Si. Ya lo dixo 'l poeta: In vino, veritas.
Por exemplu. :)
SS
-II- Mujer Si el titulo es el II capitulo, donde [...]
Los privilexos del Mensaxeru Mujer Muy buena la historia, aunque no se si [...]
gRande yE Mujer Muy bueno el texto y dice una cosa [...]
augua pasao: MIRANDA Descargar Hace tiempo estando en un pueblo de Asturias [...]
Los privilexos del Mensaxeru Descargar A veces tales privilegios no son privilegios, pero [...]
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
