VI CURSU DE LLINGUA ASTURIANA EN MADRID

Entama en Madrid el VI Cursu de Llingua Asturiana

La Tertulia Asturiana de Madrid entama'l VI Cursu de Llingua Asturiana que se fairá del 17 d'abril al 26 de xunu nel primer pisu del perconocíu Café Comercial de la Glorieta de Bilbáu. La Tertulia Asturiana vien entamando estos cursos gratuítos dende l'añu 2001, los primeros en facese fuera d'Asturies y cuntarán tamién con material gratuíto y diplomes acreditativos pa los asistentes. El cursu tendrá una duración de 35 hores lectives y fairáse tolos martes de 7 a 9 la tarde, amás de práctiques que se fairán per internet. El director de los cursos ye l'escritor Xaviel Vilareyo, profesor tituláu pola Academia de la Llingua Asturiana y entamador de los cursos en Madrid hai yá seis años. El Café Comercial ye un clásicu y vieyu café del centru de la capital d'Hespaña, llar d'abondes tertulies lliteraries, atopable nun de los recantos más transitables de lo que foi la movida nocturna madrilana, pegáu a la cai Fuencarral y al barriu de Malasaña, na Glorieta de Bilbáu. El Cursu tien vocación tanto d'alfabetización llingüística como d'afondamientu oral y escritu mesmo pa asturianofalantes como pa non asturianofalantes ya estranxeros. Tamién quier ser un cursu participativu y abiertu onde toos puedan deprender nun espaciu distendíu ya informal. Pelos cursos pasaron profesores collaboradores como David Rivas o Xosé Bolado. Pa matriculase convién mandar un email a la seña cursu@wanadoo.es