Crítica al panorama social, con especial pricuru pa col mediu ambiente.
30/11/2006
En verdá que n'Asturias tenemos abondas cousas polas qu'esmolecenos anantes que pol nome que-y ponga una empresa privada a la su mayor atracción. Pero lo del Acuariu de Xixón yia sangrín.
Lo d'esti centru foi entamar entamándola: situáu a un pasu de los astilleros, col fin d'especular colos terrenos, fexo qu'el primer día tuviéralo movidín.
Despuós de visitalo, quedáronme tres cousas bien claras: que taba montáu con muitas priesas (falta de personal, carteles ya especies fuora del sou sitiu, 8 pingüinos metíos en 10 metros cuadraos con nenos glayando ya dando güelpes...); qu'embede aproveitar el sitiu pa facer ciencia, dedicáronlo n'esclusiva pal turismu de familia, siendo los nenos los únicos que pueden chegar a disfrutar de la visita; ya que nun pensaban usar l'asturianu más qu'en dous ou tres cartelinos (andarica ya pouco más). Buono, ya que 10 euros abúltanme un robu. Pa mi idea que la gocha tuvo que ver en del.las cousas de las dichas.
Pero, a lo qu'iba, lo del nome del tiburón-toro yia pa mexar ya nun char gota. Paez ser qu'ocurrióse-ys facer una encuesta pa poné-y nome, camiento que cola intención d'atraer a la xente, d'averase a la "plebe". Ésta iba acabáse el 15 de diciembre. Pero a daquién dio-y por buscar un nome asturianu, "Espumeru", qu'ente outras cousas yia un ser mitolóxicu. El nome prestóu yia púnxose no cimeru de las votaciones. A lo qu'el Acuariu respondéu cortándolas ya poniéndo-y el nome que seique iba terceru: Elisa (maxino que dalgún "pez gordu" tenga una fía col nome d'elisa), qu'aparte de ser un nome bien feo pa un tiburón (más que sía hembra), nun yia lo que la xente votóu. Una tomadura de pelo.
Ya digo you, ¿sabiendo lo que representan p'Asturias -especulación, intento d'acabar col sindicalismu combativu...- nun habían tener más cuidáu con estos detalles?
Nun séi si tien igua ou non, pero polo menos convídovos a que, en cuenta de visitar l'acuariu, guardéis los cuartos pa un pouco sidra. Seguru que vais pasalu meyor.
Licencia:Libre Licencia de documentación Libre (Inglés)
Tola razón, yo tamién voté por Espumeru y taba al tantu de les votaciones. Vergoñoso. Y pa rise más entovía de la xente dicen del nome Elisa «...quedando por delante de otros mucho nombres propuestos por nuestros visitantes como Saruki, Spira, Weti...» y ¿d'Espumeru?, nin pallabra. En fin, intenté unvia-yos una suxerencia (vamos, una crítica) dende la páxina web, pero nun me furrula, supongo que deshabilitaríen esa opción pa evitar recibir mensaxinos como'l miu. Pero bono, esperaré unos díes, y tarde o tempranu-yos lu unviaré. Nun va servir pa nada, pero polo menos pa que vean que la xente nun s'escaez del xuegu suciu.
habrá qu'enviái-ys una quexa, anque, cumo dices, vei quedar pa práu. No que dicen del nome d'elisa has decatate que nun dicen mentira, nun ponen que quedara por delantre d'Espumeru... porque na realidá nun quedóu por delantre.
¡Hai qu'esfarrapar, estrociar ya esgorrombar! Ya lo que quede, queimallo
Munches gracies por enllazame. Fai tiempu que lleo el to blog, intentaré siguir entrando cada poco. Agora mesmo pongo un enllaz de Esfarrapando'l Mundu nel miu. Gracies y a siguir asina.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
