Crítica al panorama social, con especial pricuru pa col mediu ambiente.
20/10/2006
Asina s'entitulaba güei una noticia en "La Nueva España", na que facíen referencia a las reuniones qu'esta semana hebo'n Taramundi, cola participación d'altos representantes de "la tribu la corbata", cuyo fin yara l'alderique sobro'l tema del desarollu nas zonas rurales. Las conclusiones, a lo que paez, foron d'una l.luminosidá casi cegadora, "el mantenimiento de las actividades agrarias es vital para preservar las zonas de montaña" o "se constata algo que realmente todos sabemos, un problema común que se repite en distintos territorios: la pérdida de la población activa agraria" , dan bona cuenta de pa qué sirven los políticos de nueso, pero a mi la frase que más me presta soltóla Eduardo Lastra, direutor del Instituto Asturiano de Desarrollo Rural: "Tenemos que lograr el equilibrio. Que el ganadero tenga una renta suficiente que le permita vivir en la zona. Se consigue con distintos elementos que se van sumando unos a otros". Yá, Eduardo, el día que nos digas cuáles son los elementos, ya'l orden de la suma, entós igual nos vales pa daqué.
Yia'l tema de la vida nas zonas rurales un de los qu'a mi más m'esmolez, ver cómo señorones de ciudá pónense a esbabayar sobre lo que tienen o non que facer nos pueblos, mientras nun-ys faen caso a la xente'l pueblu nas sos peticiones, como déspotas del sieglo XXI; demientras los pueblos quédanse ermos, a la búsqueda, como muitu, d'ese turismu rural tan embriagador, tan embaucador. Diz el mio col.laciu Iago, nun mensaxe n'esta páxina, que si la vida nos medios rurales nun s'aprecia, por algo será. Quiciabes el vese dirixíu por estos combayones del capital pueda ser una d'esas esplicaciones.
La xente afuxe del sou pueblo, los políticos quieren facenos creer que con vulgares l.leis como la futura l.lei de Desarrollo Rural van engañanos, que van conseguir parar la migración. Nun me faigáis reir.
Un sistema, trabayáu dende sieglos, de braeru "desarrollu sostenible", vásenos d'ente las manos nel momento nel que más se fala d'ese "desarrollu sostenible", cumo bona muestra de lo hipócrita que yia esta sociedá. Con él, vásennos un puñao d'usos tradicionales del tarrén, de mous de vida, un tipo de paisaxe, un paisanaxe, un cachín d'hestoria, una relación col medio muitu más agradecía ya espiritual de lo qu'un burgués (nel sentíu orixinal de la palabra) pueda suañar... Merecémoslo.
"Ensin vacas nun hai futuru". Dexando que nos gobiernen, tampouco.
Licencia:Libre Licencia de documentación Libre (Inglés)
Contábame un amigu de mio que ye del oriente d'Asturies qu'él asistió munches vegaes a la esfoyaza (o esbilla en dalgunes zones), que vivía eso como un estilu de vida, que yera tou un ritu pel cual se rellacionaben los mozos y moces de los pueblos. Contábame tantes coses que toi por escribir un llibru, por recoyelo too pa que nun s'escaeza eses pequeñes coses, que como dices facíen de los homes y muyeres seres más respetuosos cola naturaleza y que teníen con ésta una rellación más espiritual.
En fin, prestóme'l to blog. Oxalá dalgún día volvamos a esi respetu y rellación más «humana» cola naturaleza.
pues muitas gracias polos comentarios, a mi tamién tocáronme un par d'esfoyazas colos mios buelos, pero cuantayá que se dexaron de facer. Recoyer toas esas tradiciones, toa esa cultura en l.libros nun yia que sía necesariu, yia imprescindible, lo malo yia qu'entovía, con eso, desapeicerá.
Sólo una cousina, dices qu'oxalá volvamos a una rel.lación más humana cola natura, yo casi diría qu'oxalá volvamos a un rel.lación más animal.
Salú!!!
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
