Crítica al panorama social, con especial pricuru pa col mediu ambiente.
09/02/2007
Apurro una riestra noticias espublizadas esta semana que me paecieron enforma curiosas:
-Cámbeu climáticu: el vienres 2, el IPCC espublizaba un entamu de lo que vei ser l'informe de 2007. Pa mi, una de las peores noticias yia que nel meyor panorama que presenten, la temperatura media iba medrar más de 1ºC. Nos outros informes, falábase de la posibilidá de parar el cámbeu, agora yá non. Eso nun quier dicir qu'haya que cruzar los brazos, too lo malu puede empeorar. L'hidróxenu abúltame una posibles alternativa cada vez más seria.
-José Couso: l'asesinatu del cámara de telecinco inda nun se resolvéu. L'Audiencia Nacional declarárase non competente pa pidir los datos de los militares a EEUU, pero un recursu fexo que sí lo tuvieran que pidir (seguru que nun-ys prestóu un res). Pero agora EEUU niégase a dar estos datos, colos que la Interpol habría declarar la busca ya captura d'esos asesinos. Da igual, anque EEUU diera los datos, con nun salir del sou país nun-ys iba pasar nada, porque EEUU nun reconoz la Corte Penal Internacional.
Curioso país de l.libertades.
-Cooperantes fugaos: por del.los medios de comunicación más o menos alternativos, sabemos que Cuba ya Venezuela l.levan cuatro anus de cooperación: petróleo baratu por médicos ya educadores. Pola sou cuenta, gracias a los medios de "comunicación" clásicos sabemos que 45 de los 20.000 cooperantes cubanos, fugáronse pa Colombia, pidiendo asilu. ¡Qué cousas!, el 0,25% merecen portada en "El Pais", el miércoles 7 de febreiru, el 99,75% nun merecen nin una noticia.
Por si fuora pouco, vamos a la páxina 9 del diariu ya lo primeiru que vemos yia una semeya d'una manifa contra Evo Morales. La relación con Cuba ya Venezuela, perniciosa. Na pía de la semeya, dícennos que 8000 mineros manifestáronse en Bolivia. Tou esperando a qu'una manifa pola oficialidá, con un númaru mayor de personas, merezca un requeixín nesti diariu "progre".
-Oleguer: al fin, un futbolista d'élite sabe enriestrar dous frases, ya amás falando dún tema controvertíu, cumo yia'l demencial sistema xudicial español. Eso sí, yá aparecióu la censura capitalista, el.lo yia que Kelme, marca cola que tenía un contratu, dixo que si bien "abogan por la defensa de los derechos de la libertad de expresión y de libre pensamiento", francéu'l contratu col catalán.
Pa esplicalo, nada meyor cumo facer alcordanza de The Clash:
You have the right to free
Speech as long as youre not
Dumb enough to actually try it.
-Policía infiltráu: sí mious nenos, nun fai falta ser terrorista, val con tener ideas que nun-y presten al que manda, pa que te metan un policía no tou grupu, qu'amás incita a la violencia, fai estrozos de los que van inculpate ya, por si nun fuera abondo con eso, el día que tengas un xuiciu vei declarar contra tí, diciendo que nun tien relación nenguna pa contigo. Lo más curiosu yia qu'esti policía tuvo infiltráu en manifas onde había xente d'IU (¿taría vixilándolos?), los mesmos qu'agora lo usen pa cargar contra Cándido ya Morala.
Concentración de sofitu no segundu xuiciu a Candido ya Morala el l.lunes a las 9:30 la mañana.
P'acabar, daqué buono: a dalgún l.loucu ocúrrese-y facer cousas pol asturianu, pierden la medrana ya atrévense a doblar cachinos de El Rei Llión al asturianu. La verdá que la voz suéname, pero lo más importante yia ver cumo, con esfuerzu ya capacidá, dous personas son a facer lo que la TPA, con tolos sous cuartos, se niega. Bien por el.los.
01/02/2007
Nun tengo una respuesta mui clara pa esta entruga que ta faciéndome muita xente, pero yia que me presta l.levar la contraria, nadar pol ríu p'arriba. La campaña p'apagar la l.luz cinco minutos anantes de las ocho la nueite entamóu con oxetivos bien humildes, pero internet propagólo cumo un regueiru de pólvora: güei periódicos, radios, tele... toos falan d'el.lo.
Pamidea estos amaños namás valen pal l.laváu de cara de dalgún políticu ya pa desvirtuar l'auténticu debate: ¿cumo facemos pa baxar las emisiones de gases con efeuto invernaderu?
El consumu de la xente supón un 15%, el de las empresas un 85%. Claro que tenemos que conciencianos de baxar los nuesos niveles de consumu, pero eso nun se fai en cinco minutos de campaña chachi guai pa quedar de super progre. Ou lo tomamos en serio, ou esto nun vei tener igua nenguna.
01/02/2007
¿Cumo puede ser qu'inda nun me diera por falar de la especulación?. Pues fácil, yia un tema que m'enrita tanto que prefiero nun falar d'él. Pero güei sentí la noticia d'una nueva l.lei anti-corrupción que nun vei iguar muitu (cumo too lo que faen los políticos) pero que vei permitir que quien financie a los partíos desgrave na declaración (vamos, que por pouco que nos gusten los partíos, ou'l sistema en sí, vamos financialos ente toxs).
Yia un tema que nos afeuta a lxs asturianxs dafeitu: urbanizaciones, especulación urbanística, PGOUs ya POLAs, golf, estaciones d'esquí... son pal.labras qu'apaecen cada día nos periódicos del país. Muitas son las acciones colas que nun tamos d'alcuerdu; seique cumo proyeutos estrel.la, ta'l golf (acompangáu d'urbanizaciones, claro), en Verdicio (Gozón) ya no Cabu Vidio (Cuideiru), la especulación en Xixón ya n'Uviéu, ou l'esquí en "Fuentes de Invierno", que tamién traerá urbanizaciones apegadas ya cuartos pa los bolsos de los que gobiernan. Nin los surfeiros se salvan.
Con tou eso, lo increíble yia qu'haya sitios onde tean peor, pero namás hai que dase un paséu pol mediterráneo pa quedar pasmando: Valencia (lo de la Copa América yia pa suicidase), Baleares (Andratx) ya la redolada de las grandes ciudades son los sitios más dañaos.
Pero, ¿por qué?. ¿Pasa igual n'outros estaos?. Hai quien diz qu'el modelu d'enriquecimientu del franquismu, basáu nun turismu xabaz (Benidorm antes, Benidorm despuós) foi l'entamu de lo que tenemos agora. Dicen que la transición tamién tien daqué d'importancia, porque los partíos financiábanse por mor de las casas conceyu. La clase burguesa española, el empresariáu, siempre queriendo amañar las sus fortunas del xeitu más rápido, ficieron el resto.
Nun sei si la xente de la cai podemos facer por parar ésto, pero polo menos habrá qu'intentar nun andechar con el.los, ya colos políticos que los apoyan. Outru modelu urbanísticu yia pernecesariu.
23/01/2007
Van unos años, un paisanu de la costa Oeste de los EEUU taba faciendo turismu por Asturias. Dio-y por visitar lo qu'anguanu se chama "Comarca vaqueira", ya taba faciendo una ruta en moto polas brañas de los conceyos de Tinéu ya Valdés, cuando, de sópitu, caéu na cuenta de que se perdiera. Nun sabía por ónde tenía que tirar. L'home, claro, escomenzóu a pensar no peor. Taba nunas tierras estrañas, ente unos pueblos bien probes, n'una de las rexiones más atrasadas d'Europa oucidental. La xente (pouca) qu'había falaba nun falaxe bien raru, non entendible nin pa él, que pensaba conocer l'español. Amás, paecía ser xente xabaz.
Despuós de varias horas, días, caleyando ensin sentíu, atoupáronlu unos homes que-y dieron ayuda. Taba salváu.
L'avetura fuora tala, qu'el paisanu discurrióu conmemorar esti día cola celebración d'un rally, que sería anual. Menuda aventura. Tierras de l.lonxe, habitadas por xente probe; too dispuesto pa qu'unos ricachones de los EEUU (ya d'Europa tamién) pasaran unos días d'aventura. Qu'el "stress" de Wall Street yia mui malu.
Col tiempu las cousas fueron virando, las empresas d'automóviles, petróleo, televisiones... pagaban muitos cuartos a los "aventureros", ya éstos tenían tecnoloxías (GPS) que quitaban méritu a la hazaña. Amás, había xente que nun lu veía bien: las muertes d'unos nenos, d'unas muyeres, ya, en menor midía de bien de ganáu tenían la culpa. El feitu de gastar un montón de perras pasando por un sitio tan probe, tampouco nun-y daba mui buona fama.
Ésto que parez una babayada bien siendo lo qu'estos días nos pusieron pola tele, contada cumo la gran aventura del Rally Dakar. Namás hai que cambiar Asturias pol África, ya la comarca vaqueira por dalgún de los países más probes d'África: Mauritania, Mali, Senegal... Por desgracia, lo de las muertes nun hai que cambialu: de 51 muertes na hestoria del rally, menos de 20 yaran pilotos. El restu, mecánicos, periodistas, nenos ya muyeres de los "poblaos" polos que pasen. N'España inda nun tien mutiu puxu'l movimientu contra'l Dakar (sí tien en Francia), pero paez que lu va garrando.
Anque, agora que lu pienso, n'Asturias yá tuvimos una experiencia asemeyada
20/01/2007
Actualizo la noticia con un par d'enlaces:
Pechao Ricardo Lo dicho polos compañeros de Trayasgaya. Dame pena [...]
Pechao TrayasgayA Esperemos que seya un ta lluéu. Un saludu.
Mentiras, manipulación Ricardo Ye cierto que nun ficieron comentariu dalu al [...]
30 anos camín de la oficialidá esfarrapando'l mundu Muitas gracias polos comentarios. Pamidea qu'avances hubo, pero [...]
30 anos camín de la oficialidá El xanu\'l caborniu Una estratexa típica d'esta xente que falais y [...]
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
