Crítica al panorama social, con especial pricuru pa col mediu ambiente.
23/09/2006
Quizás el títulu sía enforma pretenciosu, pero uno fártase d'escuitar babayadas nos medios de comunicación sobre mediu ambiente'n xeneral, ya sobre'l cámbeu climáticu en particular. Periodistas que s'autonoman "espertos en mediu ambiente" porque falanon con un becariu (con tol respetu'l mundu pa los nuesos precarios) faen las delicias de los sos grupos corporativos ya de las empresas que los controlan. Da igual que la mayor parte de los científicos tean d'alcuerdu nel calentamientu global, ya qu'en parte de la culpa sía de nueso (asina lo dicen el 100% de los artículos asoleyaos nos 5 caberos años en "Science" ya'n "Nature", ya cuyo oxetivu yara saber pa'ónde va'l nuesu clima), da igual que los rexistros d'este sieglo falen del calentamientu más rápido producío en toda la época conocía de la humanidá (ehí ta la clave'l problema, na velocidá d'ese calentamientu, porque los seres vivos nun son capaces d'adautase a esos cámbeos), da igual, siempre aparecerá quien, con un oxetivu político ya ensin basase n'estudios de nengún tipu, criticará a la comunidá científica. Veamos dous exemplos:
- El primeru ía del "Libelu dixital", basa las sos críticas nos fallos que tuvienon outros científicos nel sieglo XX, cuyos badagüechos nun se cumplienon, ya na mentira de dicir que la teoría del calentamientu ta basada sólo en "estudios realizados con un ordenador, si, un ordenador como el que tiene usted en casa pero algo más potente". Vamos, qu'escaez los rexistros, los esperimentos en laboratoriu... Yá se sabe, los científicos son llocos col pelu blanco que xuegan col ordenador. Pero delátase al final, cuando diz que "el ecologismo (nun diferencia ente ecoloxismu ya ciencia) es marxismo simplificado, remozado y pasado por la turmix para hacerlo más digerible a las nuevas generaciones. Se vale de lo mismo, de la mentira, de la desinformación y de la propaganda". Qu'estraño qu'esto espublícese nel libelu dixital.
- El segundu inda ía más graciosu. L'home enfótase en dous cuestiones. La primera, qu'en rialidá tamos nuna época d'enfriamientu, lo cual, sigún la ciencia, podría ser verdá, si nun fora pola nuesa contaminación, claro. Na segunda, cola que tamién refuga'l furacu de la capa d'ozono, diz que las moléculas más pesadas nun pueden ir pa la estratosfera (la capa qe ta per enriba de la troposfera, que ía la más baxa): "el más liviano de los CFS contaminantes pesa 4, 10 veces más que el aire, por lo que es difícil que, siendo más pesado que el hierro (¡¡¡¡¡!!!!!), puedan subir hacia la estratosfera". Yá sabéis, cuidáu cuando salgáis a la cai, que vais tar respirando un potingue de CFC's, CO2, ozono, óxidos d'azufre ya de nitróxenu... ya sobre too Argón (el 1% de la atmósfera ía d'este gas), toos el.los más pesaos qu'el O2 ya, cuando menos, pouco recomendables de respirar. Por últimu, diz tamién que "Greenpeace se esta forrando desde que en 1988 estalló la fiebre del calentamiento; tiene más beneficios que el Real Madrid", polo cual, supuestamente, tienen muita influencia ya interés en que se fale d'estos temas. Escaezse el mio amigu de que la mayoría de las "teorías" anti-calentamientu nun foron sinon parte del marketing d'empresas intreresadas como Ford, Texaco, Shell o Exxon, que nel 88 fundaron la "Global Climate Coalition (GCC)", col envís de desprestixiar el trabayu de los científicos ya que tien, ente los sos méritos, el financiar la campaña del asesín Bush fíu a cámbeu de qu'éste nun firmara el Protocolu de Kyoto (lleer "Hegemonía o supervivencia", de Noam Chomsky).
Por desgracia, los medios progres tamién ponen el mesmo enfotu pa favorecer a los de so. Sólo así puede ún esplicase qu'un periodista de la BBC (qué triste) diga que la tierra de Groenlandia vese por primera vez en millones d'años. Lo mesmu puede dicise del "Polanco's crew company" (El Pais, SER, Cuatro...)
Del.los ecoloxistas tampoco nun s'esfuercian muitu. Ridícula foi la campaña de Greenpeace que s'aprovechó de la película "El día de mañana" pa facer apoloxía del cámbeu climáticu, lo cual provocóu más desconfianza ya desinformación col tema. Peor ía'l feitu de velos na tele chando-y la culpa al cámbeu climáticu de cualaquier iviernu fríu, tormenta, branu secu o seronda con vientu (ía imposible saber si un fenómenu concretu débese al cámbeu climáticu). Hai del.las escepciones, como la de SEO/Birdlife, que s'encarga de facer estudios etolóxicos n'aves pa saber cómo-ys afecta el calentamientu.
Por último tarían los científicos, col so problema habitual de ser incapaces de chegar a la xente de la cai.
Lo ciertu ía que la ciencia aceuta, a diferencia de la relixión ya los políticos, la posibilidá del error. Pero básase tamién n'aceutar la teoría meyor fundamentada, mientras nun s'amuese lo contrario. Ya agora mesmo, según el IPCC, el cámbeu climáticu ta producíndose a una velocidá decomanada ya ún de los causantes ía l'actividá humana (lo que nun sabemos ía cómo afeutará a cada rexón del planeta). Si prefieren creer en Dios ya ir contra la ciencia, allá el.los, pero las fogueras que las dexen pa San Xuan.
Un pouco d'información en www.cambioclimaticoglobal.com
17/09/2006
Sí, yá se que nun sou nada orixinal col títulu, tampoco nun lo sou col tema, pero cuando las venas me fierven la orixinalidá quédaseme escondida, arrequeixada en dalgún l.lugar de la mente a la que nun sou a chegar. Ya con este tema, fiérvenme. Resulta que dionos por nacer nun l.lugar del planeta au la xente divírtese clavando cuchiellos afilaos a esos "xabaces" compañeros de travesía que son los toros. Resulta que daquién paga por el.lo, por ver como lo faen outros, resulta qu'aplauden cuando l'animal (el toreru non, el toru) s'esbarrumba, gritan cuando l'animal (agora sí, el toreru) pasa a la vera del asta, xiplan cuando el toru nun "ataca" al toreru (pero si nacéu pa eso, ¿que ía tontu?)... N'Asturias ía ésta una tradición con mui pouco raigaño, pero nun sé'l porqué, los conceyos d'Uviéu ya Xixón empérranse en sobencionar el maltratu a los animales. Éste xueves tenemos una cita n'Uviéu. La concentración nun principio iba ser manifa, pero la Delegación de Gobiernu nun lo permitíu. Da igual, van tener qu'escuitanos, o polo menos sintiránnos. L'espectáculu de tortura, el circu romanu d'anguanu, tien un sofitu del ayuntamientu, 50000€ a mou del 30% de las entradas, que regalan a cambio de votos, claro (inda nun chenarán nin la metá del aforu), precisamente l'añu que quitan la nueche celta del programa, "p'axustar el presupuestu". Dícenlo sin sonroxase, l'añu nel que desapaecen Igor ya Carlos, l'homenaxe que se-y ocurre a la SOF ía quitar la nueche celta, porque nun hai perras, ya a cambeu pagar a unos torturadores. Van 8 o 10 años, l'Asociación "Trisquel", de Candás, protestóu contra la suelta d'unos xatos polas cais del pueblo, qu'acababen colos mamíferos bípedos non rumiantes pegando-ys a los rumiantes. Costó-ys, pero enxamás volvéu a facese una burrada así nel pueblu. Que sirva d'exemplu.
13/09/2006
Esta mañana allevantéme tranquilu. Too paecía indicar qu'iba ser un día más. Pero entós dióme por garrar el periódicu (grave error). Yara "La Voz de Asturias". Veo un titular: "Areces no contempla ni la oficialidad ni una nación asturiana". La noticia refierse al mini-debate que tenemos n'Asturias pal nuéu Estatutu. Digo mini-debate porque entamóu ayeri ya zarráronlu ayeri (van tocanos los güevos col supuestu alderique pol que tou interesadísimu la próxima lexislatura). La verdá qu'el titular nun me sorprende, Tini nun ía un caxa de sorpresas. Pero abro'l periódicu pola páxina onde s'amplía la noticia (segundo error) ya póngome a l.leela. Asturias nun ía una nación (dame igual) sinon una comunidá héstorica (que ía lo mesmu que dicir ¡muuuu!). Sigo l.leendo ya atóupome colo que vien de siguío, textualmente: "conviene dispensar especial respeto y protección en el Estatuto a la fala como una modalidad lingüística de Asturias". L'estómagu dame un blincu, los güeyos quédanseme en blanco ya'l corazón pónseme del revés. Inda nun son las ocho la mañana, conque será meyor ir al W.C. a soltar lo que me sal pola boca embede despertar al vecindariu. ¿De verdá vamos votar a este banduyu outra vez? ¿De verdá tenemos que siguir aguantando que se rían de nos, outros cuatro años más? ¿Que ía que nun sabemos nin caminar p'alantre, facémoslu p'atrás? ¡Vamos a ver, babayu!:
-Lo primeru, paezme que nun ía tan difícil l.lamar a las cousas pol nome de so. Asturianu, nin bables, nin fala, AS-TU-RIA-NU ¡A ver si lu deprendes, que ía perfácil!.
-Lo segundu, bastante más grave ¿qué quier dicir este fartón con eso de "una modalidá l.lingüística d'Asturias"? Una modalidá l.lingüística puede ser una l.lingüa, un dialeutu, una forma de falar nun territoriu, una xerga... Vamos, que pal gochu este, l'asturianu puede ser un dialeutu del castellanu, una forma de falar (el castellanu) propia de Asturias (o d'outro sitio, que yá puestos), o una xerga. Nun m'estraña que nun la quiera oficializar, ¿daquién fairía oficial la forma d'escribir nos móviles, o la xerga los mozos? Yá sabéis, dicir "hey, colegui, voy a dar un pirulo" ía como falar nel nuesu (supuesto) idioma. Quedo pasmáu.
Pues asina tamos n'asturias, con un PSOE que diz cousas como las que refugaban 40 años atrás; un PP... casi que d'éstos nin falo; una Izquierda Xunida que diz qu'el asturianu ía irrenunciable (suéname qu'ésto yá lo dicían cuatru años atrás, ya agora tiene dos conseyerus... será qu'el Mercedes ía más irrenunciable), un amestu estrañu URAS-PAS, pa ver si garran cachu; un Bloque por Asturies que nun se sabe si tá dientro o fora del gobiernín, del.los partíos nacionaliegos que mezclan el nacionalismu, l'independentismu, el socialismu, el comunismu, ochobre'l 34... ya you qué se cuánto más. Espérannos unas el.leiciones apasionantes. Dígovoslu you.
¡Areces, emigra ya tira cola poltrona pa outru l.lau!
A la fin tenía razón pola mañana: foi un día más.P.D.: perdón pos falar de política, intentaré que nun pase muitas veces
13/09/2006
Pues eso ía lo que paez suxerir un estudiu feitu por espertos de la Universidá de Cantabria, ya encargáu pol CSIC. Polo que dicen, el cámbeu climáticu vei traer consecuencias mui negativas pal tan deseáu turismu, ya que la xuba del nivel del mar vei facer que perdamos 16 metros de playa (per enriba de la media d'españa) pal añu 2050. Cada añu perdemos unos 2,5 milímetros, conque si nun tornara el calentamientu, el cálculu sal fácil. Yá sabéis, aprovechái agora pa ir a la playa, qu'en unos años vamos tener qu'emigrar... hasta pa danos un bañín.
25/10/2006
N'una época na qu'el petróleo nun dexa d'incrementar el so preciu (en parte gracias a las guerras d'interés de ciertos personaxes) apaecen nuevas soluciones pa qu'el nueso consumismu siga ensin cambiu. Habría que tener muitu cuidáu colas alternativas que nos ufiertan. Fálase, por exemplu, de la enerxía nuclear, o de los biocombustibles, que ye lo que vou tocar agora. Ésta supuesta solución encubre non solo un negociu pergrande, sinon que tamién del.los problemas, que nos medios de comunicación nun ocupan las primeras páxinas. El problema ye que pa que n'Europa tengamos soja o colza, duas de las plantas más usadas como biocombustible, tan arramplando milenta hectáreas de selva tropical n'Amazonia, ya'l problema medrará si'l consumu d'estas plantas sigue medrando (muy recomendable esta páxina www.portaldelmedioambiente.com). Como n'España nun ye fácil que se cultive en masa, ente outras cousas pola escasez d'un recursu que ta convertíndose en non renovable, l'augua, supónse que lo que fairemos siempre será importalo dende estas rexiones. Amás, una consecuencia "secundaria" ye la medra del preciu d'estas plantas, que a dalgunos da-ys por usalas pa comer. Asina, la margarina encarecióse un 30% no que va d'añu, la soja más del 50% ya l'aceite de palma encarecióse nún 20% nos dos meses que vinienon de siguío a l'anuncia de los gobiernos de Malasia ya Indonesia de dedicar a biocombustible el 40% de las sos producciones. Consecuencia: la xente vei usar más grasas animales, menos saludables.
Too el.lo porque eiquí, n'"Occidente", nel mundu "desarrolláu", nun podemos menguar el nuesu consumu, too el.lo porque'l capitalismu, obsoletu como ta, busca un nuevu parche que tape un de los muitos furacos que-y salen. Nun nos engañen más, la única solución pa sustituir al contaminante petróleo, anguanu, ye diaminuir el consumu.
Pechao Jivana Great job guys!!
Una hestoria que se repite. Restor No no I agree.
Pechao Restor No no I agree.
Una hestoria que se repite. Gerri Chillz Buddy :)
Pechao Ricardo Lo dicho polos compañeros de Trayasgaya. Dame pena [...]
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
