Crítica al panorama social, con especial pricuru pa col mediu ambiente.
22/11/2007
Son muitos más de 30, seique, pero éstos son los que pueden vese agora na web de "El Pais", qu'acaba d'abrir too'l sou archivo a consulta de baldre. Ya agora que tamos na puerta de salir, outra vuelta, a la cai, ta bien cha-y una güeyada a esas noticias que pasaron un día pol "diario independiente de la mañana". Yia curioso ver qu'hai muitas cousas (demasiadas) que nun cambian. Vense las mesmas discusiones, los mesmos errores, por supuesto los mesmos "actores". Cambia, si acaso, el trato al asturianu: enantias chamában-y bable, agora vese más lo d'asturianu ou "llingua asturiana".
Dalguna de las nuevas que más me prestaron foron éstas:
-"El polémico renacimiento del bable", del ano 79. Ehí vense a los Alarcos, Bueno, Xuan Xosé (yá avise que los protagonistas nun cambiaron).
-"Falemos galego, los bables y el caló", de un tal Eduardo Barrenechea, que parezme que foi un conocío economista.
-La creación de l'Academia ya, cumo non, las críticas d'un tal Chus Neira
En fin, too un recital de lo que, 30 anos despuós, tamos fartos de sentir. A ver si, d'una puñetera vez, somos quien a facelos zarrar esa bocona que tienen.
P.D.: chisbando pol archivu, enteréime d'una cousa bien graciosa. A X.X. Sánchez Vicente echáronlo del PSOE por dicir "¿Qué haz esi paisanu ahi faciendo ginasia colos brazos en cruz?" refiriéndose, na menos, qu'a una figura de Cristo na cruz. Hai X.X., esa boca piérdenos.
11/06/2007
Ésti post iba ponelo va unos días, pero por problemas cola rede nun pude fasta güei. Da lo mesmo, pienso que sigue valiendo. La cousa yia qu'a mi las cuentas nun me cuadraban. Veía que, nas elecciones, el PSOE ya'l PP tenían unos 250.000 votos ca ún, nun censu de cuasi qu'un millón de personas (¿votantes?). Vamos, que sumando los votos d'ambos, costába-ys tener mayoría absoluta. Pero miro'l resultáu, ya'l reparto d'escaños-cuartos, ya veo que ca ún d'el.los ta bien cerquina de tener, sólos, mayoría absoluta. ¿Cómo? ¿250.000 personas, d'ente un millón, son mayoría absoluta? ¿Yia ésto democracia?.
Claro, l.lei d'Hont (que no sou día promovióu'l PCE pa evitar qu'espuxigaran partíos pequenos pola sou izquierda, ya qu'anguanu ta mayándolos pol votu in-útil), esixencia de porcentaxes mínimos pa cuntar los tous votos, circunscripciones inventadas pa favorecer al PP ya'l PSOE, votos en blancu que se cuntan namás pa lo qu'interesa (pa calcular el porcentaxe mínimu d'esixencia sí, pero pa repartir diputaos non)... Ya inda tenemos los santos coyones de dar leiciones de democracia.
Pa facelo más visible, vou comparar el repartu actual col d'un sistema que seique iba ser más xusto, más axustáu a lo que fai la xente el día de las votaciones, ya non a lo que dicen que fai la xente que nun fai lo quieren que faigamos. Vamos ver cumo sería Asturias ensin circunscripciones, %mínimos, l.lei d'Hont (aplico un métodu proporcional votos-escaños, anque tamién podía aplicase'l métodu Sainte-Laguë) ya ,sobre tou, cuento la xente que nun quier votar ya la que vota en blanco cumo "votos pa naide" (escaños vacíos, aforro de cuartos, menos gochos qu'aguantar).
CENSO ELECTORAL: 981.802
NULOS: 4.844
VÁLIDOS: 976.958
Nº. votos Reparto modificáu (% ya diputaos)
Naide---- 391.578 (40.2%) 18
PSOE----- 252.201 (25.9%) 12
PP------- 248.907 (25.5%) 11
IU-BA-LV- 58.114 (6.0%) 3
PAS-URAS- 13.314 (1.4%) 1
UNIDÁ---- 4.119 (0.4%)
AA------- 2.770 (0.3%)
PCPE----- 2.001 (0.2%)
IR------- 1.707 (0.2%)
¡Vaya cousas!. La xente n'Asturias, mayoritariamente, quiso votar a NAIDE, porque nun creemos no qu'hai. 18 escaños vacíos iban tar bien p'aforrase perras enforma. 18 Mercedes menos.
Ya tou ésto fáigolo porque dicen qu'Asturias yia "socialista". Non, mious nenos, Asturias yia abstencionista. Si garramos a 8 asturianos al azar, namás dous d'el.los votaron al PSOE, outros 2 al PP ya 3 NUN votaron. Asturias nun cree na representatividá d'estos fartones. Polo que parez, tampouco na d'outros minoritarios que cuntan con salvar el país con una papeleta ca cuatru años.
Fuente: Elecciones Asturias
31/05/2007
Estractu del artículu "Hacia un campo sin agricultores", espublizáu por Daniel López García (miembro de BAH) nel númaru 55 del periódicu Diagonal
(...)
Ruralidá destinada al ociu
Basáu na idea de ‘multifuncionalidá’, tán impulsándose modelos de ruralidá destinaos al folgar, segunda residencia ou ciudades dormitoriu, ya con una actividá económica cada vuelta más arreyada a los mercaos globales, al traviés del turismu rural ou de los servicios a la población urbana.
La doctrina de la UE, dende la reforma de la Política Agrícola Común (PAC) de 1996, plantega que la función de l'agricultura yá nun yia tanto la producción d'alimentos cumo la “custodia'l territoriu” con tintes ambientalistas. Por embargo, cuesta creer que la diversificación económica que plantega vaya compensar la desaparición de millón y medio de puestos de trabayu nel seutor agrariu dende los ‘80, ou la conservación del territoriu ya los recursos naturales que éstos realizaban. Demientras, nel mediu rural caltiénse'l sou procesu de desarticulación, énte l'avance del desiertu demográficu; la falta d'equipamientos ya servicios públicos; la degradación del mediu ambiente arreyada a la industrialización de la producción agraria ya al abandonu de los espacios menos rentables; la especulación urbanística ya del suelo; ya la sou condición de sumideru de los residuos urbanos.
(...)
16/04/2007
Por pura imposibilidá física, nun podemos nin medrar nin tampouco decrecer indefinidamente, poro, lo más lóxicu yia pensar que despuós de 150 años d'una medra grande na población ya nos consumos de recursos naturales (arreyáu al problema de la contaminación) ya despuós d'acabar colos combustibles fósiles, vei cheganos una época d'axuste.
L'oxetivu yia qu'esi axuste sía lo menos traumáticu posible, ya sobre too, que ponga los pegol.los necesarios pa que nun vuelva a pasanos lo mesmo: que vayamos sobrepasar la capacidá del planeta pa alimentanos ya ofrecenos aire ya augua l.limpia pa la nuesa vida ya la de los demás seres vivos que tan acompangándonos.
El “decrecimientu sostenible” yia una manera de xestionar la transición a un mundu de baxa enerxía, pero nun quier dicir que nun haya crecimientu. En dalgún situ habrán siguir medrando, anque con outro xeitu porque inda quedan muitas desigualdades pa iguar. Lo que ta claro yia que no primer mundu gastamos muito más de lo que nos toca. Habíamos tener en cuenta amás que n'una recesión económica causada por una crisis enerxética, ¡yá se da un decrecimientu!
Lo que postula'l decrecimientu yia entamar el camín pa un sistema muito más estable no sou consumu material, ya pa el.lo yia necesario, enantias, que mengüen sustancialmente las nuesas necesidades materiales. Nun sabemos si yia una solución viable, pero pareznos muito más racional ya humana qu'una fuxida p'alantre de resultaos inciertos.
Éste yia un problema global, mui enguedeyáu, pero que se soluciona polo local: cada zona, según la su situación xeográfica, recursos, clima, tien unas necesidades ya unos recursos enerxéticos diferentes. A lo meyor no vamos poder comer zreizas pol Avientu (nel hemisferiu norte), ya embede'l coche priváu vamos tener qu'ir en tren, pero eso son sacrificios bien pequenos comparaos col peligru d'un colapso enerxéticu que nos garre despreveníos.
Parte d'una entrevista feita pola xente de "Alasbarricadas" a la xente de "Crisisenergetica". Entrevista completa (en castel.lanu) eiquí.
03/04/2007
Yá faléi eiquí hai un tiempu de la "trampa" de los "bio"combustibles. Güei atoupéi un artículu bien interesante na revista Ambientum, nel que se fai una chamada a un uso racional d'esta fonte d'enerxía, que nun ponga en peligru al pequeñu agricultor nin a las grandes selvas.
Yia curtiu pero recomiéndase cha-y una güeyada.
28/03/2007
A ríu revueltu, ganancia de pescadores. Eso seique tan pensándolo las productoras de enerxía qu'apuesten pola nuclear: "agora que la xente escomienza a preocupase pola emisión de CO2, vamos meté-ys la nuclear", col pretextu de que nun emite esi gas.
Pero parez que si facemos un someru análisis del ciclu de vida d'una central nuclear, ya del sou xeitu de producir enerxía, nel camín emítese bien de CO2. Asina lo defienden nun artículu de "el mundo". Emítese CO2 na construcción de la planta, no sou desmantelamientu, na estracción del uraniu, no tratamientu, no trasporte ya no tratamientu de los residuos. Asina tenemos qu'usando uraniu (non renovable) de calidá, emítese una cantidá de CO2 equivalente por kWh similar a un 30-40% de lo qu'emite una térmica. Col tiempu vei haber qu'usar uraniu de peor calidá, lo qu'aumenta las emisiones nel sou tratamientu.
Outro argumentu más contra las nucleares.
02/03/2007
Los científicos parecen tar d'alcuerdu en que tamos viviendo la sesta gran estinción (la última foi la de los dinosaurios, hai 65 millones d'años). Pero esta tien daqué d'especial: produzse mui rápido (fálase de fasta 30000 especies al anu) ya ta producida por outra especia que yia consciente d'el.lo. ¿De qué manera provocamos esta estinción?. Las principales causas son, de más a menos importante:
- Estrozu del hábitat: tala de viesca, agricultura intensiva, construcción d'infraestructuras (autopistas, embalses...) que menguan l'hábitat de bien d'animales ya plantas.
-Contaminación ya cámbeu climáticu: degradan los hábitat, amás faise a una velocidá qu'impide a los seres desplazase ou adaptase. Outras estinciones produxéronse por estas causas, cumo la de los mamuts (por cambio brusco del clima).
-Introducción d'especies esóticas, que compiten colas propias del sitiu.
-Sobreesplotación, por caza ya pesca.
N'Asturias, seique por aquel.lo del feitu diferencial, tamos aplicando las estinciones tamién a los medios de comunicación. Los que desaparecen son los que menos s'adapten, que diría Darwin, ya asina al que nun combaye col todopoderoso van escorrelo fasta estrapal.lalo.
Los exemplos más conocíos son los de Radio Sele ya, agora, Teleasturias.
Nun sei, pamidea que Radio Sele tien bien d'hábitat ente los asturianufalantes, ya Teleasturias tien más audiencia que la TPA. El cámbeu climáticu ya la pesca nun me parez que-ys afecte, demientras que las especies esóticas nun parecen ser invasoras.
El problema vei ser qu'eiquí entovía nun s'estinguieron especies qu'habían dexar pasu a las nuevas, si ho, n'Asturias, cumo paraísu natural que yia, inda viven mamuts ya dinosaurios. A ver si somos quien a escorrelos, ya facemos qu'esta nun sía una Zona Especial de Proteición pa la l.libertá d'espresión.
25/12/2006
Un de los temas más comunes por estos días, que suel aparecer nos editoriales de los periódicos a la vera del discursu del rei, yia'l de la locura consumista qu'entafarra "l'espíritu la navidá". Polas cais vese xente a esgaya de tienda en tienda, corriendo nun vaya ser que nos piesl.len ya nos quedemos ensin el trapín de fin d'añu. Cumo nun iba ser d'outra manera, los medios faen qu'una crítica se torne n'alabanza, ya paez que nun iba haber navidá ensin esi consumu, esa comilona ou esas tarranchas que vamos tener que garrar.
Pero la navidá nun yia más qu'el espeyu, unu más, d'esta sociedá tercermilenaria. Toos sabemos qu'estas fechas celebrábanse muitos años anantes del cristianismu, pero entós facíase porque al fin, despuós de seis meses de mengua, los días escomenzaban a medrar, la l.luz ganaba a la escuridá, la vida abríase camín, añu tres añu.
¿Yia esto asina? Seique sí, na metá'l mundu. Na outra metá, nel hemisferiu sur, pasa al revés, qu'agora los días van ir menguando. La iglesia nun se decatóu d'esto (más bien importó-y bien pouco), ya obligóu a los pueblos del sur a tresformar unas celebraciones que falaban de lo contrariu, del fin del día yia'l entamu la escuridá, en celebraciones sobro la vida, la esperanza.
Quero dicir que si la navidá pierde tol sentíu agora, los primeros que fixeron por perdelu foron los propios miembros de la iglesia. Qu'agora obedecemos a outro dios, que yia un dios que sabemos qu'esiste porque podemos tocalu, porque lo vemos, porque dependemos de él. Que sabemos que él sí, tráenos la felicidá, que por él paga la pena facer una guerra ou, por qué non, esfarrapar el mundu.
10/12/2006
Buceando pola rede unu puede atoupar cousas bien curiosas. Ésta yia una d'el.las, una riestra de pueblos d'España que tan abandonaos, onde naide vive. Más de 2500, siendo Galicia ya Asturias las comunidades con más pueblos desiertos (ente las dúas faen la metá de toa España). Endientru d'Asturias, la cuenca yia la zona más afeutada, Mieres ya Llangréu.
Peime qu'esta páxina da buona idea, yia un buon espeyu, del fenómenu de la migración del pueblu a las ciudades, siendo muitu más marcáu nos sitios onde la economía vénose embaxu (la Cuenca). El fenómenu nóutase menos onde la vida nel pueblu inda yia apreciáu, cumo Euskadi, que, teniendo una xeografía asemeyada a la d'Asturias, namás s'alcuentran once pueblos abandonaos. La cultura de respeto pa colas tradiciones, la dignificación de la vida rural ya una política (que pa outras cousas da noxu)de sofitu pa los pueblos permíte-ys caltener, por agora, formas de vida qu'eiquí esapaecen, culturas que nun van volver enxamás.
Ou deprendemos del.las cousinas d'el.los, ou avezámosnos a ver paisaxes grises enchenos d'un cementu que yá ta pochu.
30/10/2006
Esta carta atoupéla buceando por internet, yia d'un mozu que s'esmolez pola construcción del banzáu d'Itoiz, ya relaciónala col de Riaño. L'orixinal ta en castiel.lanu.
Que sirva d'homenaxe pa el.l@s, pa la xente qu'inda güei tan presos por negase a entregar el sou pueblo, ya pala xente qu'en Asturias ta trabayando contra'l banzáu de Caleao:
Pa cuando l.leais estas rengleras ya naide vei quedar nel val.le d'Itoiz. Las casas ya las cortes, las ilesias ya los puentes, toos los edificios foron tiraos pa evitar que naide vaya quedase n'el.los pa cuando l'augua chegue ya inunde too.
Mios pas nacieron nun pueblo del norte de la provincia de L.león, n'una zona conocida anguano pol turismu que supón lo arrimáu que ta de los Picos d'Europa. La comarca o montaña de Riaño.
El.los nacieron en pueblos pequenos, aldeas, de non más de cuarenta casas, onde la xente ganábase la vida trabayando na tierra, o col ganáu, o nas numarosas minas de carbón qu'afuracaban las entrañas de la tierra onde vivían.
Al.li, paecía qu'el tiempu taba paráu dende sieglos, puesto que los avances propios d'esta dómina nun aportaban sinon con cuentagotas: electricidá, teléfonu... n'ivieru yara fácil tar ensin salir de casa durante semanas pola nieve que s'almacenaba fuera, poro, las cortes colos animales taban comunicadas colas viviendas, de diciembre a febreru la comunicación ente los pueblos yara cuasi imposible.
La tierra que los vió nacer yara dura, pero yara la sou tierra, onde vivieran ya trabayaran xeneraciones d'antepasaos; yia un raigañu difícil d'entender pa daquién que viviera tola vida n'una ciudá, nun paisaxe cambiante ya escasu. El sol l.levaba sieglos asoleyando ya caíndo por un determináu buocu ente las montañas, abrasando los teyaos de las casas durante las mesmas horas ya proyeutando las mesmas solombras sobre las caleyas, el respeto home-naturaleza l.leváu a una convivencia imperturbable al paso'l tiempu.
Tendría you siete ou ocho años pa cuando escomencéi a sentir falar del pantanu, a intuir lo que s'avecinaba.
Poucas cousas n'esta vida pueden ser más tristes ya impactantes cuando sos un neno que ver chorar a tou pa, a tous buelos, cuando ves chorar a la xente mayor el sentimiento más asemeyáu a lo que recuerdo yia'l de la medrana.
You pola miou parte nun entendía nada, falaban de construir un pueblu nueu, de desaloxos, de policías,d'escritores, periódicos ya televisiones.
El pueblu de Riaño foi tomáu l.literalmente pola Guardia Civil, venían en furgonetas, autobuses, incluso dende Asturias. Mas de 400 efectivos pa unos 200 vecinos...
L.legaron tamién unas escavadoras enormes, como las mariel.las de caterpillar colas que you xugaba sindo un guaje, pero monstruosamente grandes, ya la xente escomenzóu a perder los nervios, entamaron los derribos, la xente mozan subía a los teyaos de las casas de las sous familas ya encadenábanse, aventaban teyas dende arriba, facían fuelgas de fame...
Alcuérdome de los mios primos mayores, los mios tios, conocíos corriendo, siendo golpeaos, salindo en del.las fotos de los periódicos. Del.los vecinos en plena desesperación queimaban las súas casas enantes de ver cumo yaran destruidas, outros nun podían aguantar la deseperación de ver desapaecer lo que pa el.los yara la sou vida, suicidáronse, cumo'l triste caso de Simón Pardo. Yara la desesperación d'una xente que nun saliera en tola sou vida d'un entorno de poucos kilómetros cuadraos metío ente montañas, a los que-ys falaban de pisos de proteccion oficial en Palencia, en Guadalajara ...
Alcuérdome d'un Luis Mariñas pasmáu, presentando'l telediariu de la uno ya sacando imáxenes de lo que nosotros mismos tábamos viviendo nos nuesos pueblos. Casas ardiendo, esfarrapadas, xente chorando, griesca cola Guardia Civil, políticos cobardes falando dende los sous cómodos despachos de solidariá, progresu.
El propio alcalde detenío por resistencia a la autoridá, xunto colos sous vecinos, políticos, ecoloxistas y demás xente que viniera de too'l país n'aquel branu del 87. Imanol Arias l.liendo un manifiestu na plaza del que (anque pareza que-y dea vergoña decilo) foi'l pueblu que lo vió nacer.
Alcuérdome del iviernu'l 87, colos pueblos recién desaniciaos, temperaturas de veintidós grados sou cero, la xente deambulando cumo alucinada polo qu'antanu foran caleyas, rebuscando ente los cascotes de las ruinas, you, agacháu, con miou pa ya miou buelo garrando las teyas de lo que fuera la súa casa ya la de los sous pas ya la de sous buelos, cargando muebles, mesas, siellas, ente l.lamuerga, xelu ya fierros retorcíos.
Too n'una carroceta pa l.levalo pal pueblo miou pa, que libróu'l pantano por tar a una altitú superior a la de los pueblos del restu'l val.le.
Recuerdos yá más personales ya recortes de periódicos, artículos esporádicos, del.los cantares (Celtas Cortos/Riaño vivo) pouco más guardo d'aquel,lo, nun yara más qu'un rapaz al que lo qu'asocedìa parecía-y una película.
Poro, agora, viendo Itoiz, duelme especialmente. El dañu taba feitu va tiempu, el piesl.le definitivu del embalse nun yia sinon el simbólicu final del mal suañu.
L'embalse de Riaño foi un proyecto de 1923 qu'el réximen de Franco durante'l periodo desenrollista recuperóu ya escomenzóu a mover.
La l.lei d'espropiacion forzosa nun aseguraba garantías pa los afectaos,entovía menos reclamaciones. L'embalse entamóu a construíse n'una España yá «democrática», pero siempre quise consuelame pensando que de tar proyectáu unos años dempues esto nun pasaría.
Seguí'l casu d'Itoiz con una cercanía peculiar, cuasi cumo si tratara de daqué propio, hebo un tiempu no que penséi que'iban algamar paralizalo, pero yia evidente que non.
Creo que tenemos los políticos que nos merecemos, el sistema cambió dende treinta años pa güei, pero la mentalidá de la xente va pa peor. Los problemas duran nas nuesas cabezas lo que duran nos telediarios o nas páxinas de los periódicos, darréu, automáticamente, el problema dexa d'esistir.
La opinión xeneral yia vomitiva, argumentos como «cobraron dineru, que dexen de dar la vara» tan a la orden del día.
¿Tan difícil yia entender que n'esta vida hai cousas que nun se mercan col dineru?
L'arraigo apolítico al tou terruño yia difícil d'atalantar na sociedá de los nuesos días, onde too se mueve tras intereses económicos. Esqueicimos los nuesos oríxenes ya convertímosnos en masa blanda multiforme ya moldeable pola opinión de la mayoría.
A mi bástame con alcordame de la cara de miou bisbuelo cuando echaron embaxu la sou casa, ya de la sou lenta agonía nun piso de 60 metros cuadraos nun barriu de la periferia d'Uviéu hasta finar, de tristeza, rabia, impotencia.
Bástame con eso pa nun capitular.
Siento lo mesmo que sentia él al ver de nuéu esta mesma hestoria repetida.
Despacho l'artículo traducío amestándo-y un par de fotos, qu'amuesan esa rabia, esa impotencia, esa pena.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
