Categoría: actualidá Blog Asturies GuGara.com

esfarrapando'l mundu

Crítica al panorama social, con especial pricuru pa col mediu ambiente.

Categoría: actualidá

Yá tamos n'agostu, mes nel que tamos avezándonos a oyir pola tele que ye'l mes del fuéu. Na rialidá, n'Asturies suelen producise más nos meses de Marzo-Abril (ver semeya d'enriba, del incendiu que nos arrampló unas 2000 ha de monte nel Conceyu Valdés en Mayu). Pero paezme necesariu falar agora d'incendios pola polémica entamada en Galicia , ¿cuáles son las causas de los incendios?. ¿Dellos agricultores que faen quemas non controladas? ¿Bomberos ya retenes que quieren que-ys paguen horas extra? ¿Domingueros que nun saben facer una fouguera?. Ye perfácil señalar col deu a una persona, pero lo cierto ye que'l númberu d'incendios vien medrando desbocadamente dende van 40 años, una dómina carauterizada, ente outras cousas, pol entamu de la migración del campu a la ciudá. Anguanu los nuesos pueblos tan desolaos, semi-abandonaos; los trabayos qu'enantes se facíen nel monte güei nun se faen (recoyer piñas, leña, ganzo, toxos...). Too ésto fai que s'acumule combustible nos montes ya sía más fácil la espansión d'un fuéu. Conque l'acumulación de xente en torno a poucos núcleos ya'l despreciu pa cola vida más apegada a la tierra, nos nuesos pueblos, puede considerase quizás como la causa principal de lo que ye'l mayor problema ambiental nas zonas rurales d'Asturias (nas ciudaes ta la contaminación del aire, el ruiu...). A esto hai qu'amesta-y la mala política forestal, onde se favorecen masas homoxéneas de cultivos arbóreos (pinos, ocalitos) frente a esplotaciones sostenibles de bosques autóctonos, sindo las primeras más fácilmente atacadas pol fuéu. Eiquí tien muitu que dicir la "papelera de Navia", ENCE-CEASA, de la que yá falaremos outru día. Por agora, col.lacios, namás dende este requeixín del mundu. Siguiremos en contautu, y recordái que las cousas hai que las analizar dende los pegol.los, non dende´l teyáu. Salú ya Puxa