Crítica al panorama social, con especial pricuru pa col mediu ambiente.
21/11/2006
Pues sí, esa semeya d'enriba, anque mala, yia del puntu l.limpiu de L.luarca. Non, nun yia un eufemismu, lo qu'un día foi puntu l.limpiu yia anguanu un vertederu ilegal. Según COGERSA l'ampliación ta en proyeuto , eso quier decir que sigue furrulando.
Decían unos anus p'atrás qu'el nivel de vida d'un país puede conocese pola cantidá de basura que xenera. Debe ser qu'el Oucidente d'Asturias, cola vil.la de L.luarca a la cabeza, ta tan deprimíu que tien qu'esparcer la de sou, pa que los turistas vean lo evolucionaos que somos. Por se nun fuora abondo col vertederu, esti branu discurrieron los nuesos cabezaleros políticos una bien buona: a imaxen d'Uviéu, ocurrióuse-ys quitar los contenedores de la cai. Claro que a éstos nun-ys da pa muitu'l cerebru, conque decidieron que nun se ponían cubos pa la nueite, asina la xente tien que tirar la basura, en bolsas, nel medio las aceras, haya calor, chueva o anque la plaga de gaviotas vea cumo-ys apurren comida na cai. Con el.lo los turistas, al atapecer, pueden ver cumo xorrez basura polas cais del pueblu, ya a nos quítasenos el miéu de que vayan pensar que nun somos del "primer mundu". La peor parte, eso sí, l.leváronla los trabayadores de COGERSA, qu'agora tienen de recoyer la basura bolsa a bolsa.
Too sía pol bien del país, pola comodidá del turista, ya pola miedra de la propia autoestima.
13/11/2006
L'osu ya´l l.lobu. Melandru, roballiza ya sapaguera. Artos, andaricas, humeiros ya salgueiras. Escayos ou l.lóndrigas. Una xaronquina. Las fayas. El carbayón. Cuervu marín, venáu ya xardón. Ablanos, raposas, truitas, xulias, xabalíes, fuinas, esperteyos, rezcayeiros, l.lámparas, tolinas, mures, ñoclas... La naturaleza tamién entiende de l.linguas.
Alcordáivos que dempuós de la manifa hai un pouco de musiquina, peime que de "Santi Caleya", "Rubiera" ya "Los gatos del Fornu". Ya dempuós espicha na cai Gascona.
06/11/2006
Nun podía ser d'outra manera, cuando a ENCE (empresa productora de pasta de celulosa) van pesl.lái la fábrica que tien en Pontevedra por problemas ambientales (hai cuatro años tuvo que pagar más de 600000€), cuando nun-y dexan abrir la que tenía pensáu entamar en Fray Bentos (Uruguay), ¿qué faen? Yia perfácil, facer medrar la que tienen en Navia, que n'Asturias paez que dexamos que nos faigan lo que quieran. Namái qu'un 66%, van pasar de producir 300000t/año a 500000t/año en sólo tres años, convertíndola na más grande de la UE. ¿Ya qué dicen en Navia?. Pues que de puta madre, que vien Marshall colas perras (ya'l azufre, el golor...). La empresa promete yá 1000 puestos de trabayu, eso sí, indirectos (roncai los coyones), ya de los que se crearán directos, muitos, probablemente, tengan que dalos a empleaos despedíos n'outras plantas. Amás, la empresa ta escomenzando a aplicar un plan d'aforro, con recorte de gastos (esto yia, despidos), colo que peime qu'el ouro prometío nun va ser talo.
¿Ya los efeutos ambientales? Emisiones de gases cumo'l CO2, SO2 o metil-mercaptanos, efluentes a la ría de Navia, sema d'ocalitos de manera masiva... paecen nun importa-y más qu'a del.los ecoloxistas
o a políticos oportunistas (IU de Navia esixe-ys "trasparencia ambiental").
Seguiremos atentos pa ver qué pasa col tema éste, pero a mí, nun se por qu'e, güelme mal.
30/10/2006
En del.las ocasiones, la naturaleza déxanos pasmaos con noticias que nun somos a esplicar. El sábadu 28, una pareya de buceadores, que taban 2 millas mar adientru, atoupábanse con una especie cola que nun contaban, ya la cousa yia qu'alcontraron nada menos qu'un robecu (Rupicara rupicapra parva), especie qu'ocupa las altas cumbre asturianas (suel tar por enriba los 800-1000 metros). L'exemplar taba nalando, cumo la cousa más natural del mundu, ya los buceadores chamaron al CEPESMA, onde s'alcuentra agora pa recuperase del estrés del viaxe.
Taba claro, los espertos bromean pensando en cómo fexo l'animal pa chegar a tan estrañu hábitat pa los de so. Quiciabes una riada que lo arrastróu (anque sería un milagru que sobreviviera), un "paséu" en un camión de, por exemplu, madera (tan difícil cumo lo de la riada)... Luis Laria, presidente del CEPESMA, decía con sorna que lo único claro yia qu'esta vez pueden asegurar que lo asocedío nun tien que ver col cámbeu climáticu. You nun tou tan seguru: ¿o yia que nun puede un robecu, aproveitando las sendas que tan faciéndose nos espacios protexíos d'Asturias ya los 25 ºC que marcan los termómetros -a pesar de tar a finales d'Ochobre-, ir a pasar el fin de semana a la playa? Ya home, una vez al.lí, el robecu pensaría que por qué nun seguir, ya tirase a la mar cual David Meca. Seguru que, pa cuando torne al sou l.lugar de nacencia, tien una hestoria bien prestosa pa contar. Los buceadores, tamién.
20/10/2006
Asina s'entitulaba güei una noticia en "La Nueva España", na que facíen referencia a las reuniones qu'esta semana hebo'n Taramundi, cola participación d'altos representantes de "la tribu la corbata", cuyo fin yara l'alderique sobro'l tema del desarollu nas zonas rurales. Las conclusiones, a lo que paez, foron d'una l.luminosidá casi cegadora, "el mantenimiento de las actividades agrarias es vital para preservar las zonas de montaña" o "se constata algo que realmente todos sabemos, un problema común que se repite en distintos territorios: la pérdida de la población activa agraria" , dan bona cuenta de pa qué sirven los políticos de nueso, pero a mi la frase que más me presta soltóla Eduardo Lastra, direutor del Instituto Asturiano de Desarrollo Rural: "Tenemos que lograr el equilibrio. Que el ganadero tenga una renta suficiente que le permita vivir en la zona. Se consigue con distintos elementos que se van sumando unos a otros". Yá, Eduardo, el día que nos digas cuáles son los elementos, ya'l orden de la suma, entós igual nos vales pa daqué.
Yia'l tema de la vida nas zonas rurales un de los qu'a mi más m'esmolez, ver cómo señorones de ciudá pónense a esbabayar sobre lo que tienen o non que facer nos pueblos, mientras nun-ys faen caso a la xente'l pueblu nas sos peticiones, como déspotas del sieglo XXI; demientras los pueblos quédanse ermos, a la búsqueda, como muitu, d'ese turismu rural tan embriagador, tan embaucador. Diz el mio col.laciu Iago, nun mensaxe n'esta páxina, que si la vida nos medios rurales nun s'aprecia, por algo será. Quiciabes el vese dirixíu por estos combayones del capital pueda ser una d'esas esplicaciones.
La xente afuxe del sou pueblo, los políticos quieren facenos creer que con vulgares l.leis como la futura l.lei de Desarrollo Rural van engañanos, que van conseguir parar la migración. Nun me faigáis reir.
Un sistema, trabayáu dende sieglos, de braeru "desarrollu sostenible", vásenos d'ente las manos nel momento nel que más se fala d'ese "desarrollu sostenible", cumo bona muestra de lo hipócrita que yia esta sociedá. Con él, vásennos un puñao d'usos tradicionales del tarrén, de mous de vida, un tipo de paisaxe, un paisanaxe, un cachín d'hestoria, una relación col medio muitu más agradecía ya espiritual de lo qu'un burgués (nel sentíu orixinal de la palabra) pueda suañar... Merecémoslo.
"Ensin vacas nun hai futuru". Dexando que nos gobiernen, tampouco.
12/10/2006
El día 6 d'ochobre, toos los que nos esmolecemos pola natura recibíamos una buena noticia. Paecía qu'al fin la xusticia actuaba a tiempu, ya cinco pareyas de cigüeña negra (en peligru d'estinción) valían pa qu'un xuez aparara una urbanización de luxu, d'esas de las que tienen abondos proyeutos p'Asturias. Por muitu qu'el alcalde dixera que "El golf es bueno para el monte. La urbanización favorecía el medio ambiente porque el golf es zona verde", la urbanización nun tenía permiso. Pues non, porque'l promotor, Francisco Hernández, un chorizo d'esos qu'enchenan la construcción "made in Spain", movéu pieza; en 24 horas ya, aproveitando qu'inda nun tenía la sentencia (según dixo), l.lantóuse nel l.lugar cola maquinaria ya esfarrapóu too monte cuanto pudo.. Pa más tocar güevos, la Junta de Castilla y León da-y el sou sofitu a... el promotor. Asina tamos, asina tan las cigüeñas, ya asina seguirá, porque dempués de dous días nos que los medios de comunicación falanon sobro'l tema, güei, 12 d'ochobre (día nel qu'entamóu la masacre a los pueblos indíxenas americanos), ya naide s'alcuerda del asunto. Hasta que vuelva toca-y a outro sitio, vuelvan decir dúas pih.adinas na tele, volvamos chevar las manos a la tiesta, ya volvamos a escaecer too.
Salú ya puxa.
03/10/2006
Dous noticias muitu de distintas chegaron a las mías oreyas estas semanas.
Per un l.láu, la noticia de qu'ENCE (empresa percontaminante, emisora de mercaptanos -golor a güevo podrío-, dioxinas o cloro), la mayor productora de papel n'Europa ya segunda nel mundu, abandonaba el so proyeutu de creación d'una gran papelera na frontera ente Uruguay ya l'Arxentina (ver eiquí). Una papelera qu'enfrentó a dous pueblos hermanos, Fray Bentos n'Uruguay (onde s'iba a instalar) ya Gualeguaychu n'Arxentina, dous pueblos separtaos pol rigu Uruguay ya xuníos pol puente de San Martín. Éste puente convertíuse nun barriu más de la ciudá arxentina, ya que foi cortáu pola xente, que fexo una acampada permanente nel medio'l propio puente, permitiendo'l pasu sólo a enfermos, médicos, periodistas... Ensin embargo, en Fray Bentos la xente sí quería la papelera. Las razones, las de siempre: EL PROGRESU -falacia como poucas-, salarios más del doble de la media... Nos años 60, la mesma empresa ENCE prometióu en Pontevedra qu'iba xenerar 5000 puestos de trabayu, güei trabayan 270 personas (enxamás lo fixeron más de 500), los casos de cáncer o los problemas de respiración son "estrañamente" altos, la ría, antanu chena mariscu, nun da anguanu pa comer... Un estudio independiente concluíu que, de desapaecer la empresa ya recuperase'l medio, ganaríanse 9 o 10000 puestos de trabayu. El propio alcalde reconoz qu'aquel.lo foi un eror (ver este docu).
Anque la empresa argumenta outros problemas ayenos al conflictu social, anque a ésta xente quéda-y inda que l.luitar contra outra papelera (de Botnia), ésta noticia puede ser un pequeno álitu d'esperanza pa toa la xente que s'aconceyó, tamién n'acampada, contra'l banzáu de Caleao, nel Parque Natural, LIC, ZEPA ya Reserva de la Biosfera de Redes. Las razones pa esta obra suénanme: EL PROGRESU, falta augua (si falta nun faigas una lámina con esa superficie, qu'evapórase más. Si'l problema yia que ta mal aprovechada, aprovéchala bien), hai que facer 15 térmicas ya del.los praos de golf... Anque nas protestas d'eiquí nun se cortara carretera nenguna, l'actuación de las fuercias de seguridá, a la orde del delegáu Trevín, foi propia d'una dictadura "tercermundista". Pero si seguimos glayando, tendrán qu'acabar escuitándonos. Quiero ser optimista, ya pensar qu'este banzáu tien que pasar una piedrona: ¿permitirá la UE un proyeuto así n'una Reserva de la Biosfera? Apuesto que non.
"Las papeleras van traer trabayu".
Firmáu: L'enterrador.
17/09/2006
Sí, yá se que nun sou nada orixinal col títulu, tampoco nun lo sou col tema, pero cuando las venas me fierven la orixinalidá quédaseme escondida, arrequeixada en dalgún l.lugar de la mente a la que nun sou a chegar. Ya con este tema, fiérvenme. Resulta que dionos por nacer nun l.lugar del planeta au la xente divírtese clavando cuchiellos afilaos a esos "xabaces" compañeros de travesía que son los toros. Resulta que daquién paga por el.lo, por ver como lo faen outros, resulta qu'aplauden cuando l'animal (el toreru non, el toru) s'esbarrumba, gritan cuando l'animal (agora sí, el toreru) pasa a la vera del asta, xiplan cuando el toru nun "ataca" al toreru (pero si nacéu pa eso, ¿que ía tontu?)... N'Asturias ía ésta una tradición con mui pouco raigaño, pero nun sé'l porqué, los conceyos d'Uviéu ya Xixón empérranse en sobencionar el maltratu a los animales. Éste xueves tenemos una cita n'Uviéu. La concentración nun principio iba ser manifa, pero la Delegación de Gobiernu nun lo permitíu. Da igual, van tener qu'escuitanos, o polo menos sintiránnos. L'espectáculu de tortura, el circu romanu d'anguanu, tien un sofitu del ayuntamientu, 50000€ a mou del 30% de las entradas, que regalan a cambio de votos, claro (inda nun chenarán nin la metá del aforu), precisamente l'añu que quitan la nueche celta del programa, "p'axustar el presupuestu". Dícenlo sin sonroxase, l'añu nel que desapaecen Igor ya Carlos, l'homenaxe que se-y ocurre a la SOF ía quitar la nueche celta, porque nun hai perras, ya a cambeu pagar a unos torturadores. Van 8 o 10 años, l'Asociación "Trisquel", de Candás, protestóu contra la suelta d'unos xatos polas cais del pueblo, qu'acababen colos mamíferos bípedos non rumiantes pegando-ys a los rumiantes. Costó-ys, pero enxamás volvéu a facese una burrada así nel pueblu. Que sirva d'exemplu.
13/09/2006
Esta mañana allevantéme tranquilu. Too paecía indicar qu'iba ser un día más. Pero entós dióme por garrar el periódicu (grave error). Yara "La Voz de Asturias". Veo un titular: "Areces no contempla ni la oficialidad ni una nación asturiana". La noticia refierse al mini-debate que tenemos n'Asturias pal nuéu Estatutu. Digo mini-debate porque entamóu ayeri ya zarráronlu ayeri (van tocanos los güevos col supuestu alderique pol que tou interesadísimu la próxima lexislatura). La verdá qu'el titular nun me sorprende, Tini nun ía un caxa de sorpresas. Pero abro'l periódicu pola páxina onde s'amplía la noticia (segundo error) ya póngome a l.leela. Asturias nun ía una nación (dame igual) sinon una comunidá héstorica (que ía lo mesmu que dicir ¡muuuu!). Sigo l.leendo ya atóupome colo que vien de siguío, textualmente: "conviene dispensar especial respeto y protección en el Estatuto a la fala como una modalidad lingüística de Asturias". L'estómagu dame un blincu, los güeyos quédanseme en blanco ya'l corazón pónseme del revés. Inda nun son las ocho la mañana, conque será meyor ir al W.C. a soltar lo que me sal pola boca embede despertar al vecindariu. ¿De verdá vamos votar a este banduyu outra vez? ¿De verdá tenemos que siguir aguantando que se rían de nos, outros cuatro años más? ¿Que ía que nun sabemos nin caminar p'alantre, facémoslu p'atrás? ¡Vamos a ver, babayu!:
-Lo primeru, paezme que nun ía tan difícil l.lamar a las cousas pol nome de so. Asturianu, nin bables, nin fala, AS-TU-RIA-NU ¡A ver si lu deprendes, que ía perfácil!.
-Lo segundu, bastante más grave ¿qué quier dicir este fartón con eso de "una modalidá l.lingüística d'Asturias"? Una modalidá l.lingüística puede ser una l.lingüa, un dialeutu, una forma de falar nun territoriu, una xerga... Vamos, que pal gochu este, l'asturianu puede ser un dialeutu del castellanu, una forma de falar (el castellanu) propia de Asturias (o d'outro sitio, que yá puestos), o una xerga. Nun m'estraña que nun la quiera oficializar, ¿daquién fairía oficial la forma d'escribir nos móviles, o la xerga los mozos? Yá sabéis, dicir "hey, colegui, voy a dar un pirulo" ía como falar nel nuesu (supuesto) idioma. Quedo pasmáu.
Pues asina tamos n'asturias, con un PSOE que diz cousas como las que refugaban 40 años atrás; un PP... casi que d'éstos nin falo; una Izquierda Xunida que diz qu'el asturianu ía irrenunciable (suéname qu'ésto yá lo dicían cuatru años atrás, ya agora tiene dos conseyerus... será qu'el Mercedes ía más irrenunciable), un amestu estrañu URAS-PAS, pa ver si garran cachu; un Bloque por Asturies que nun se sabe si tá dientro o fora del gobiernín, del.los partíos nacionaliegos que mezclan el nacionalismu, l'independentismu, el socialismu, el comunismu, ochobre'l 34... ya you qué se cuánto más. Espérannos unas el.leiciones apasionantes. Dígovoslu you.
¡Areces, emigra ya tira cola poltrona pa outru l.lau!
A la fin tenía razón pola mañana: foi un día más.P.D.: perdón pos falar de política, intentaré que nun pase muitas veces
13/09/2006
Pues eso ía lo que paez suxerir un estudiu feitu por espertos de la Universidá de Cantabria, ya encargáu pol CSIC. Polo que dicen, el cámbeu climáticu vei traer consecuencias mui negativas pal tan deseáu turismu, ya que la xuba del nivel del mar vei facer que perdamos 16 metros de playa (per enriba de la media d'españa) pal añu 2050. Cada añu perdemos unos 2,5 milímetros, conque si nun tornara el calentamientu, el cálculu sal fácil. Yá sabéis, aprovechái agora pa ir a la playa, qu'en unos años vamos tener qu'emigrar... hasta pa danos un bañín.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
