Crítica al panorama social, con especial pricuru pa col mediu ambiente.
09/02/2007
Apurro una riestra noticias espublizadas esta semana que me paecieron enforma curiosas:
-Cámbeu climáticu: el vienres 2, el IPCC espublizaba un entamu de lo que vei ser l'informe de 2007. Pa mi, una de las peores noticias yia que nel meyor panorama que presenten, la temperatura media iba medrar más de 1ºC. Nos outros informes, falábase de la posibilidá de parar el cámbeu, agora yá non. Eso nun quier dicir qu'haya que cruzar los brazos, too lo malu puede empeorar. L'hidróxenu abúltame una posibles alternativa cada vez más seria.
-José Couso: l'asesinatu del cámara de telecinco inda nun se resolvéu. L'Audiencia Nacional declarárase non competente pa pidir los datos de los militares a EEUU, pero un recursu fexo que sí lo tuvieran que pidir (seguru que nun-ys prestóu un res). Pero agora EEUU niégase a dar estos datos, colos que la Interpol habría declarar la busca ya captura d'esos asesinos. Da igual, anque EEUU diera los datos, con nun salir del sou país nun-ys iba pasar nada, porque EEUU nun reconoz la Corte Penal Internacional.
Curioso país de l.libertades.
-Cooperantes fugaos: por del.los medios de comunicación más o menos alternativos, sabemos que Cuba ya Venezuela l.levan cuatro anus de cooperación: petróleo baratu por médicos ya educadores. Pola sou cuenta, gracias a los medios de "comunicación" clásicos sabemos que 45 de los 20.000 cooperantes cubanos, fugáronse pa Colombia, pidiendo asilu. ¡Qué cousas!, el 0,25% merecen portada en "El Pais", el miércoles 7 de febreiru, el 99,75% nun merecen nin una noticia.
Por si fuora pouco, vamos a la páxina 9 del diariu ya lo primeiru que vemos yia una semeya d'una manifa contra Evo Morales. La relación con Cuba ya Venezuela, perniciosa. Na pía de la semeya, dícennos que 8000 mineros manifestáronse en Bolivia. Tou esperando a qu'una manifa pola oficialidá, con un númaru mayor de personas, merezca un requeixín nesti diariu "progre".
-Oleguer: al fin, un futbolista d'élite sabe enriestrar dous frases, ya amás falando dún tema controvertíu, cumo yia'l demencial sistema xudicial español. Eso sí, yá aparecióu la censura capitalista, el.lo yia que Kelme, marca cola que tenía un contratu, dixo que si bien "abogan por la defensa de los derechos de la libertad de expresión y de libre pensamiento", francéu'l contratu col catalán.
Pa esplicalo, nada meyor cumo facer alcordanza de The Clash:
You have the right to free
Speech as long as youre not
Dumb enough to actually try it.
-Policía infiltráu: sí mious nenos, nun fai falta ser terrorista, val con tener ideas que nun-y presten al que manda, pa que te metan un policía no tou grupu, qu'amás incita a la violencia, fai estrozos de los que van inculpate ya, por si nun fuera abondo con eso, el día que tengas un xuiciu vei declarar contra tí, diciendo que nun tien relación nenguna pa contigo. Lo más curiosu yia qu'esti policía tuvo infiltráu en manifas onde había xente d'IU (¿taría vixilándolos?), los mesmos qu'agora lo usen pa cargar contra Cándido ya Morala.
Concentración de sofitu no segundu xuiciu a Candido ya Morala el l.lunes a las 9:30 la mañana.
P'acabar, daqué buono: a dalgún l.loucu ocúrrese-y facer cousas pol asturianu, pierden la medrana ya atrévense a doblar cachinos de El Rei Llión al asturianu. La verdá que la voz suéname, pero lo más importante yia ver cumo, con esfuerzu ya capacidá, dous personas son a facer lo que la TPA, con tolos sous cuartos, se niega. Bien por el.los.
01/02/2007
Nun tengo una respuesta mui clara pa esta entruga que ta faciéndome muita xente, pero yia que me presta l.levar la contraria, nadar pol ríu p'arriba. La campaña p'apagar la l.luz cinco minutos anantes de las ocho la nueite entamóu con oxetivos bien humildes, pero internet propagólo cumo un regueiru de pólvora: güei periódicos, radios, tele... toos falan d'el.lo.
Pamidea estos amaños namás valen pal l.laváu de cara de dalgún políticu ya pa desvirtuar l'auténticu debate: ¿cumo facemos pa baxar las emisiones de gases con efeuto invernaderu?
El consumu de la xente supón un 15%, el de las empresas un 85%. Claro que tenemos que conciencianos de baxar los nuesos niveles de consumu, pero eso nun se fai en cinco minutos de campaña chachi guai pa quedar de super progre. Ou lo tomamos en serio, ou esto nun vei tener igua nenguna.
01/02/2007
¿Cumo puede ser qu'inda nun me diera por falar de la especulación?. Pues fácil, yia un tema que m'enrita tanto que prefiero nun falar d'él. Pero güei sentí la noticia d'una nueva l.lei anti-corrupción que nun vei iguar muitu (cumo too lo que faen los políticos) pero que vei permitir que quien financie a los partíos desgrave na declaración (vamos, que por pouco que nos gusten los partíos, ou'l sistema en sí, vamos financialos ente toxs).
Yia un tema que nos afeuta a lxs asturianxs dafeitu: urbanizaciones, especulación urbanística, PGOUs ya POLAs, golf, estaciones d'esquí... son pal.labras qu'apaecen cada día nos periódicos del país. Muitas son las acciones colas que nun tamos d'alcuerdu; seique cumo proyeutos estrel.la, ta'l golf (acompangáu d'urbanizaciones, claro), en Verdicio (Gozón) ya no Cabu Vidio (Cuideiru), la especulación en Xixón ya n'Uviéu, ou l'esquí en "Fuentes de Invierno", que tamién traerá urbanizaciones apegadas ya cuartos pa los bolsos de los que gobiernan. Nin los surfeiros se salvan.
Con tou eso, lo increíble yia qu'haya sitios onde tean peor, pero namás hai que dase un paséu pol mediterráneo pa quedar pasmando: Valencia (lo de la Copa América yia pa suicidase), Baleares (Andratx) ya la redolada de las grandes ciudades son los sitios más dañaos.
Pero, ¿por qué?. ¿Pasa igual n'outros estaos?. Hai quien diz qu'el modelu d'enriquecimientu del franquismu, basáu nun turismu xabaz (Benidorm antes, Benidorm despuós) foi l'entamu de lo que tenemos agora. Dicen que la transición tamién tien daqué d'importancia, porque los partíos financiábanse por mor de las casas conceyu. La clase burguesa española, el empresariáu, siempre queriendo amañar las sus fortunas del xeitu más rápido, ficieron el resto.
Nun sei si la xente de la cai podemos facer por parar ésto, pero polo menos habrá qu'intentar nun andechar con el.los, ya colos políticos que los apoyan. Outru modelu urbanísticu yia pernecesariu.
20/01/2007
Actualizo la noticia con un par d'enlaces:
-El mundo cae na trampa
-Nota d'AIRA en glayiu.org
14/01/2007
Polo menos, asina lu diz la "Oficina de Meteorología de Reino Unido" . Too el.lo porque, a lo que paecen ser primeros efeutos del cámbeu climáticu (que yá fixeron de 2006 el más calurosu de los rexistros), vei xunise esti anu'l de "El Niño" (la marca de roupa non, el fenómenu meteorolóxicu). Asina, la nieve inda nun l.legóu a los cordales d'Asturias, colo que nun hai esquiadores que dexen cuartos ya puede ser que nun haya augua abonda nel branu. Amás, las flores paecen tar tontas, ya espuxigan en xineru, los paxarinos nun dexan de cantar, los ousos nun pueden hibernar... Puede ser más grave de lo que paez, ya que s'altera too'l ciclu reproductor de muitas especies, conque pueden producise plagas ou caídas de población. Tamién puede ser que quede en nada.
Habrá que buscá-y daqué de bueno, a ver si esti anu podemos danos un bañín en Semana Santa.
14/01/2007
Paez ser que los fascistas nun saben qu'inventar. Nel sou esfoutu por crear odiu pa colos inmigrantes (lo qu'el.los consideran inmigrantes), el seudo-partíu memocracia demencial feixo una campaña a nivel estatal na que faen por imitar a un grupu islamista, ya van poniendo pegatinas por cualisquier l.láu, onde dicen que "NOSOTROS LLEGAMOS EN PATERA, PERO VOSOTROS OS LARGAREIS DE AQUÍ NADANDO". Debaxu unos garabatos que paecen dar alcuerdu de símbolos islamistas.
Lo dicho, patéticu, ya nun sería dignu de mención sinon fuora porque l'ambiente creáu por dalgún partíu con más puxu favorez que la xente piense que yia una campaña islamista de verdá.
En fin, maxino que la Delegación de Gobiernu tomará buona nota, ya cualquier día aparecerán los primeros deteníos por fomentar el racismu. ¡Ai, non!, si a éstos yá los defendieron l'anu pasáu en Cangues d'Onís.
08/01/2007
Primer artículu del anu ya anímome a facer del.los cámbeos. Vou falar de más temas a parte de medio ambiente, anque siga teniendo un cuidáu especial pa con ési.
Ya en viendo cumo aprovechó el presi ZP las vacaciones, tóca-y a él sufrir las mis iras. Tou porque, de magar ganóu las eleiciones, una tres outra foron caindo embaxu todas las promesas feitas entós.
-Traxo las tropas d'Irak, sí, pero nun s'entiende esa decisión sinon yia por un compromisu antibelicista. A cambio aumentóu los continxentes n'Afganistán, Haiti ou Libano. Por si fuora poucu, el límite qu'Aznar (sí, el mesmu) punxera de 3000 soldaos españoles cumo máximu pa tener nel esterior, agora el ministru del Interior quier ponelu en 3600.
Yia'l gastu militar sigue medrando, l.lévase un 12% de los gastos del estáu.
-Paecía qu'iba traer nuevos aires republicanistas, incluso con discursos dedicaos al sou buelu (que despuós enterámonos foi un xeneral de los que vinieron a Asturias nel 34). Tou lo que quedóu d'aquel.lo yia una posible l.lei de (des)memoria hestórica, que nun gusta a naide, pero sobre tou nun gusta a los qu'habría que recompensar. Nin s'anulan los xuicios d'una dictadura, nin se prohíben los símbolos franquistas, nin tan siquier s'encamienta a los conceyos pa que los quiten.
-P'acabar bien, veo qu'el nuevu alcuerdu cola iglesia sigue na l.línea de los últimos, más cuartos pa una empresa privada, caltenida con fondos estatales. Cumo la UE dixo que yara il.legal que la iglesia católica nun pagara IVA, entós los cuartos qu'aforraban vamos tener que pagalos ente toos. Namás qu'un 34% vei medrar lo que-y pagamos a la iglesia, qu'eso sí que yia dineru bien invertíu, ya lo del asturianu un gastu tontu.
Esto yia, nin antibelicismu, nin republicanismu, nin laicismu. Que dalguien me saque del miou error, pero pa mi que la "socialdemocracia" tien lo xusto de democracia ya bien poucu de social. Nun yia más qu'el mesmu capitalismu l.liberal con media capina de pintura, que vei caindo col pasu del tiempu.
Por cierto, que nin tan siquier puede dicise que meyoremos económicamente. Paez ser qu'el salariu mediu real ta al mesmu nivel de van diez años, eso sí, con mayor desigualdá.
30/11/2006
En verdá que n'Asturias tenemos abondas cousas polas qu'esmolecenos anantes que pol nome que-y ponga una empresa privada a la su mayor atracción. Pero lo del Acuariu de Xixón yia sangrín.
Lo d'esti centru foi entamar entamándola: situáu a un pasu de los astilleros, col fin d'especular colos terrenos, fexo qu'el primer día tuviéralo movidín.
Despuós de visitalo, quedáronme tres cousas bien claras: que taba montáu con muitas priesas (falta de personal, carteles ya especies fuora del sou sitiu, 8 pingüinos metíos en 10 metros cuadraos con nenos glayando ya dando güelpes...); qu'embede aproveitar el sitiu pa facer ciencia, dedicáronlo n'esclusiva pal turismu de familia, siendo los nenos los únicos que pueden chegar a disfrutar de la visita; ya que nun pensaban usar l'asturianu más qu'en dous ou tres cartelinos (andarica ya pouco más). Buono, ya que 10 euros abúltanme un robu. Pa mi idea que la gocha tuvo que ver en del.las cousas de las dichas.
Pero, a lo qu'iba, lo del nome del tiburón-toro yia pa mexar ya nun char gota. Paez ser qu'ocurrióse-ys facer una encuesta pa poné-y nome, camiento que cola intención d'atraer a la xente, d'averase a la "plebe". Ésta iba acabáse el 15 de diciembre. Pero a daquién dio-y por buscar un nome asturianu, "Espumeru", qu'ente outras cousas yia un ser mitolóxicu. El nome prestóu yia púnxose no cimeru de las votaciones. A lo qu'el Acuariu respondéu cortándolas ya poniéndo-y el nome que seique iba terceru: Elisa (maxino que dalgún "pez gordu" tenga una fía col nome d'elisa), qu'aparte de ser un nome bien feo pa un tiburón (más que sía hembra), nun yia lo que la xente votóu. Una tomadura de pelo.
Ya digo you, ¿sabiendo lo que representan p'Asturias -especulación, intento d'acabar col sindicalismu combativu...- nun habían tener más cuidáu con estos detalles?
Nun séi si tien igua ou non, pero polo menos convídovos a que, en cuenta de visitar l'acuariu, guardéis los cuartos pa un pouco sidra. Seguru que vais pasalu meyor.
27/11/2006
Despuós de la oficialidá, despuós de glayar contra las políticas represivas, tócanos agora mover el culo pol patrimoniu natural: non más especulación, non más banzáu de Caliao, non más praos de golf, non más l.líneas d'alta tensión. Sí a políticas de desarrollu sostenible, sí a saber conxugar medio natural col progresu.
Sábadu a las 13:00, na Estación de RENFE d'Uviéu. Entama ACA.
(ver www.asturiasverde.com)
noticia en glayiu
noticia n'asturies.com
27/11/2006
Paez que, pasu ente pasu, l'osu vuelve a los montes d'Asturias. Ya eso dígolu porque ayer mesmu sentí pola radio unas cifras bien buonas: na población oriental hai tres osas con crías, na occidental doce (anque entovía pueden ser más). La meyor cifra de los últimos años, que puede dexar las poblaciones nunos 120 la occidental ya unos 25 la oriental, ou inda más.
Amás, güei mesmo espubliza La Nueva España que yá hai dúas osas nos val.les de Trubia, lo que quier decir que tan arimándose a la población oriental (sabiendo amás que son los machos los que pueden percuerrer más distancias).
Pero non too van ser buonas noticias. Guillermo Palomero, Presidente de la Fundación Oso Pardo, cuntaba del.los años p'atrás qu'el osu, pa tar fuora de peligru xenéticu (consanguinidá), había tener una población d'unos 500 individuos. Cifra qu'abúltame difícil d'algamar na nuesa Cordillera, ya qu'iba xenerar demasiaos conflictos pa col home (ya la muyer).
En fin, buonas noticias, pero ¿hasta cuándo?.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
