Crítica al panorama social, con especial pricuru pa col mediu ambiente.
11/06/2007
Nos últimos días hubo del.los problemas con Gugara, al paecer caéuse la rede.
Parez que ta too iguao.
31/05/2007
Chándo-y una güeyada al programa de La 2 "Días de cine", del gran Antonio Gasset, cuasi nun me da un soponciu. Resulta que la peli hollywoodiense Sahara, aquél.la que los políticos españoles metieran na cuenta d'españolas pa meyorar las cifras del cine patrio (yia que la prota yara "Pé"), tuvo unas deudas pergrandes. Por el.lo tan faciéndo-y un xuiciu nel que tan asoleyándose las cifras que manexan las superstars. Lo que más me chamóu l'atención (a parte de los 8 millones que cobra'l prota macho) fuoron los cuartos que gastaron nos maquilladores personales de los dos protas: más de 120.000 € cada ún.
Ya you que siempre penséi qu'a los malos actores contratábenlos porque yaran guapos, mira tú que pa tener que gastar más de 20.000.000 millones de pesetas en pintate pa tar decente, ties que ser bien xostru. Ou eso, ou ya que-ys sobran cuartos yia nun saben en qué gastalos.
23/05/2007
El "Parque Natural de las Fuentes del Narcea ya'l Ibias" nacéu cumo un proyeutu medio muertu, al nun cuntar pa muitas cousas cola participación de los vecinos (tamién yia verdá qu'ente los que lo refuguen hai quien tien interés especulativu). Pues bien, metíos de chenu na campaña, los politicuchos suéltanse con declaraciones que dexan a unu pasmáu.
Asina, Cristina Coto (diputada del PP) prometéu una estación d'esquí en L.leitariegos, ya cumo prehí hai una Parque Natural, pues quítase dafeitu ya eiquí nun pasa nada. Too el.lo porque "Si no explotamos nuestros recursos naturales de una manera coherente, estamos abocados a una mayor despoblación de la que estamos padeciendo".
Sí ho,Cristina:
-Una estación d'esquí yia un recursu natural. Los remontes son naturales, las urbanizaciones que vais facer tamién (ésto yia lo que suel facer rentable una estación d'esquí), los aparcamientos ya la nieve artificial de los cañones... ¡pues claro que yia un recursu natural que TENEMOS qu'usar!.
-Las estaciones d'esquí nun evitan la despoblación. Más bien cambian los sitios de manera tala que la xente del l.lugar dexa de sentise identificada con él. Los puestos de trabayu son, polo xeneral, de mui baxa calidá. ¿Ónde ta'l dineru que l.lega d'Europa pa las zonas protexidas, pa crear ya apoyar a las PYMES?.
Al día siguiente, URAS-PAS promete facer una cousa un pouco rara. Faise la estación, pero nun se quita'l Parque, namás un cacho. Sí, home, ya n'Europa van permitítelo, porque nun afecta nada a la flora, fauna, paisaxe... ya demás recursos naturales qu'hai ya que ficieron que se declarara'l Parque. Nun puede haber un Parque Natural "a la carta", cumo si las actividades humanas nun-y afectaran.
Anque nun sía d'esta zona, van unos días pudimos ver un reportaxe en La 2 sobre la polémica de la Estación d'esquí de San Glorio (Lleón). Mui interesantes, ya que falan del turismu de nieve en xeneral:
-Parte 1
-Parte 2
-Parte 3
Mas info: FAPAS, Plataforma pola Defensa de San Glorio, blog d'un esquiador.
23/05/2007
¿Con cuántos cuartos se quedan los que permiten ésto?
Fonte: El Pais
12/05/2007
Cuntaba l'autor de "Las venas abiertas d'América Latina" n'una reunión una historia bien guapuca.
Un día, un cocineru (de buon talante, pienso you) arrexuntóu na súa cocina, a la vera'l l.lar, a las pitas, los gochos, las xatinas ya los cordeiros. Cuando taban toos entrugó-ys, mui democráticu él:
-¿En qué salsa queréis que vos cocine?
Los animales nun sabían qué responder. Namás, pasáu un ratu, una pita irguióuse medio acobardada ya dixo:
-You nun quiero ser cocinada.
-Ah, non -respondió-y'l cocineru-, esa nun yia una opción.
25/04/2007
Veo "El Pais" ya entérome de que n'un periodo de tiempu curtiu vamos tener una l.lei que desbloquee la construcción de parque eólicos no mar. A lo que paez, éstos van colocase nos primeiros 5 km de costa, ou menos, qu'eiquí la plataforma continental yia pequena, yia las torres éstas hai qu'enganchalas a dalgún sitiu.
Sabemos qu'estos gobiernos, capitalistas el.los, nunca van admitir que lo qu'anguanu yia insostenible yia'l nivel de consumu enerxéticu, por eso que nos vei tocar l.luitar con estos xigantes, ensin que por el.lo vayan quitanos las térmicas, claro.
Diz la noticia que sí, que son mui buonos, que no mar da muito más l'aire; nun afecta nin a la pesca, nin a la navegación, nin al paisaxe ya amás van facelo bien ya van buscar los sitios más afayaízos. Ya qué cuoño, que pa cumplir cola UE (en 2020 el 20% de la enerxía había ser renovable) hai que facelos. Da igual qu'haya que da-ys una buona subvención (socializar los gastos, privatizar los beneficios).
Conque you veo la mi costa, veo las Reservas Naturales de las rías del Eo ya Villaviciosa ou la de Barayo, veo los Paisaxes Protexíos de la Costa Oucidental, del Cabu Peñes ya de la Costa Oriental, los Monumentos de las Playas de Penarronda, Frexulfe, L'Espartal, La Vega, Gulpiyuri ou Cobijeru, La Turbera de Las Dueñas, La Isla de La Deva, la Charca de Zeluán, los Yacimientos d'icnites, los Bufones del Oriente... Muitos d'el.los a considerar na Rede Natura 2000 cumo LIC´s ya ZEPA's ya pol outro l.láu veo a Tini ya demás puxarra, la súa política en favor del despilfarru enerxéticu ya l'esfarrape la nuesa tierra, ya póngome a temblar.
Ya digo you, ¿nun podían poner los molinos en Mierdina d'Or? Ahí que yá nun vas facer más impactu paisaxísticu del qu'hai, qu'hai terrazas abondas onde ponelos, ya amás díces-y a los turistas que son ventiladores, pal calor ya eso. Bien tábamos mandándolos p'al.lí, que sinon sé you cumo van quedar los nuesos Paisaxes "Protexíos".
03/04/2007
Sí, eso foi lo que recibí de la xente de Trayasgaya, xunto al "Fotolog de Raul" ya'l blog "Ai, un galan d'esta villa". He reconocelo, quedéime un pouco a cuadros, porque nun sabía lo que yara eso del "MEME". Paez ser lo mesmo qu'un xen, pero aplicáu a la herencia cultural. Ésti ta dedicáu, especialmente, a los blogs n'asturianu.
Lo que me fizo quedar pasmáu foi'l pensar que daquién considera'l miou blog cumo "cultura". Bromas (malas) a parte, agradézco-y a "Trayasgaya" que me pasara esti xuegu, que puede valir pa xunir un pouco a la comunidá asturbloggera.
Vou completalo:
Una tipografía: Incognito
Una páxina web imprescindible: uiquipedia, más bien tol universu "wiki" en xeneral.
Un blog n'outra l.lingua distinta del asturianu: en cuenta d'esto, vou poner un par de "redes" bloggeras, los "BlackBlogs" ya los blogs sobre ciencia de "Madri+d".
02/03/2007
Los científicos parecen tar d'alcuerdu en que tamos viviendo la sesta gran estinción (la última foi la de los dinosaurios, hai 65 millones d'años). Pero esta tien daqué d'especial: produzse mui rápido (fálase de fasta 30000 especies al anu) ya ta producida por outra especia que yia consciente d'el.lo. ¿De qué manera provocamos esta estinción?. Las principales causas son, de más a menos importante:
- Estrozu del hábitat: tala de viesca, agricultura intensiva, construcción d'infraestructuras (autopistas, embalses...) que menguan l'hábitat de bien d'animales ya plantas.
-Contaminación ya cámbeu climáticu: degradan los hábitat, amás faise a una velocidá qu'impide a los seres desplazase ou adaptase. Outras estinciones produxéronse por estas causas, cumo la de los mamuts (por cambio brusco del clima).
-Introducción d'especies esóticas, que compiten colas propias del sitiu.
-Sobreesplotación, por caza ya pesca.
N'Asturias, seique por aquel.lo del feitu diferencial, tamos aplicando las estinciones tamién a los medios de comunicación. Los que desaparecen son los que menos s'adapten, que diría Darwin, ya asina al que nun combaye col todopoderoso van escorrelo fasta estrapal.lalo.
Los exemplos más conocíos son los de Radio Sele ya, agora, Teleasturias.
Nun sei, pamidea que Radio Sele tien bien d'hábitat ente los asturianufalantes, ya Teleasturias tien más audiencia que la TPA. El cámbeu climáticu ya la pesca nun me parez que-ys afecte, demientras que las especies esóticas nun parecen ser invasoras.
El problema vei ser qu'eiquí entovía nun s'estinguieron especies qu'habían dexar pasu a las nuevas, si ho, n'Asturias, cumo paraísu natural que yia, inda viven mamuts ya dinosaurios. A ver si somos quien a escorrelos, ya facemos qu'esta nun sía una Zona Especial de Proteición pa la l.libertá d'espresión.
21/02/2007
La ilesia sigue nas suyas, yia parez qu'inda considera la Guerra Civil cumo una cruzada. Ou eso yia lo que me parez, al ver que quieren beatificar a 19 relixiosos que morrieron n'Asturias ente'l 34 ya'l 39. Polo visto, fuoron mártires d'una persecución relixiosa.
Piensa ún, que tien daqué d'inocente, que tamién van beatificar a los cientos de miles de personas que morrieron asesinaos por aquel.los a los qu'estos curas defendían, ya que, en parte, tamién fuoron perseguíos por causas relixiosas.
De nun ser asina, l'agraviu comparativu iba ser talo que nun diba queidame outra solución que nun fuora l'apostasía, esto yia, dexar la ilesia. Nun yia que you vaya a misa, nin tan siquier que crea na esistencia d'un dious (bien que me jode tar engordando los númaros d'esta secta) pero por galvana nunca nun fixe nada. Igual yá toca escribir un par de cartas ya a ver si, asina, viendo cumo pierden xente (ya con el.la poder ya cuartos del estáu), deixan de "martirizanos", qu'el.los sí que son buenos torturadores.
15/02/2007
Nun hai que confudise, esta nun yia una manifestación sólo pa la educación. Más que nada, porque la educación yia'l pegol.lu básicu n'una sociedá. Vamos toxs pa Uviéu, por más que dalgún de los que convoquen nun sían del nueso gusto. Hai que tar por enriba d'esas babayadas.
Politicuchos, cuanto menos casu nos faigáis, más altu vamos glayar. Pol sou bien, espero que nun nos cansemos de glayar.
Más info na páxina de la Xunta Pola
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
