Crítica al panorama social, con especial pricuru pa col mediu ambiente.
03/02/2008
Despuós d'un tiempu ensin escribir, despuós d'un tiempu dándo-y vueltas a qué facer col blogue (dexalo, seguir, cambialo) vuélveme, outra vez, la necesidá de marchar unos meses fuora, ensin opción de conectame a internet (yia lo que tien el mar). Ya por el.lo que pienso que lo meyor que puedo facer ya dexar el blogue. Dame pena, escomencelo con ilusión (más que nada, por escribir cousinas n'asturianu), pero pienso que nun val de muito escibir ensin vivilo.
Préstame ver cumo lo qu'hai vente meses yaran cuatro blogues mal contaos yia güei una buena montonera de blogues dedicaos a temas diversos ya, en xeneral, interesantes ya mui comprometíos pa cola l.lingua. Ya presta más ver qu'hai sentimientu de "xunión", de pensar que se puede facer una asociación que puxe polos dereitos de los asturianofalantes, la normalización d'esta l.lingua tan probe ya pola cultura de la tierra, tamién na rede. ¡Ánimo!
Pola mio parte, davos las gracias a los que pasasteis preiquí en dalgún momentu. Pienso que non, pero igual dientro d'unos meses apetezme ya entamo outro "chigre".
Déxolo con una cita de Galeano (qu'escribe una migayina meyor que you) que resume la idea que tengo agora mesmu d'Asturias, del mundu ya de lo que m'apetez facer.
¡Salú!
"La autoridad competente advierte a la población que andan sueltos unos cuantos jóvenes cimarrones, matreros, errantes, vagos y mal entretenidos, que son portadores del peligroso virus que contagia la peste de la desobediencia.
(...)
Ratificando el principio de autoridad, y haciendo caso omiso de las provocaciones de esta minoría de alborotadores, el Superior Gobierno deja constancia, una vez más, de su irrevocable decisión de continuar velando por el desarrollo de los jóvenes, que son el principal producto de exportación del país y constituyen la base del equilibrio de nuestra balanza comercial y de pagos."
21/12/2007
Xusticia pa probes, xusticia pa ricos.
06/12/2007
Hai unas semanas morrió Fernando Fernán Gómez. Pa sorpresa de dalgún, el xenio de Fernán Gómez dexó atáu, ya bien atáu, cumo quería que lo fueran recordar: con una bandera roxinegra alredor del ataúd. Ya, asina, el Presidente del Gobierno, la de la Comunidad de Madrid, el alcalde de Madrid.. touvieron de desfilar por delantre d'esa bandera qu'enxamás van entender, que siempre van odiar. Poucos fueron los medios que lo espeyaron (dalgún falóu d'una "bandera republicana"), ya los que lo ficieron foi de pasada. Cuánto miéu a una bandera.
Esa mesma bandera podía vese a menudo no entornu del "CSOA Casas Viejas", agora mesmo en procesu de desaloxu. En relación a este desaloxu, ya a nun tardar muito, pudieron vese las primeras mentiras, las primeras manipulaciones, nos medios de comunicación, bien asistíos pol SUP ya por una supuesta "Asociación de Vecinos y Comerciantes del Pumarejo-San Luís", qu'a lo que paez ta formáu casi n'esclusiva por un personaxe d'esos que caen tan bien na ultraderecha española (las páxinas de democracianacional.org ou infonacional.com tienen falao d'él).
Titulares cumo "Investigan a todo el movimiento ocupa por sus vínculos con el entorno etarra", "El SUP insinúa que el zulo de los "okupas" pudo ser construido para fines de ETA" apaecieron estos días nos periódicos (los exemplos son del ABC, pero seique touvieron toos parecío). Ya curios cumo palabras del tipo "se investiga", "posibles vínculos", "insinúan"... van axeitándose nos titulares de los periódicos, cuando l'único oxetivu yia enmierdar.
ABC espublizóu na súa web, nuna información dada pola Policía (despuós borráronlo) que los dos mozos que se metieron nun zulo pa resistir el desaloxu tenían vínculos col entornu etarra (que dalguién m'esplique qué coime yia eso):
-Uno d'el.los, Agustín Toranzo, fuora detenío (al paecer, sólo foi fichao) nuna protesta escontra la EXPO del 92. Éso, ya la "moción de solidaridad" que ficieran nuna Ca Conceyu gobernada por HB a los deteníos polas protesatas anti-EXPO yia abondo pa relacionalo col "entorno etarra".
-L'outro d'el.los, un tal Iván Iglesias, de Bilbao (namás por eso ya habían de detenelo) fuora tamién detenío nesas manifestaciones ya condenáu a dous anos de prisión menor. Lo curioso yia que l'outro mozu qu'había nel zulo chámase Ibán, sí, pero nun s'apellida Iglesias, yia de Cádiz ya nel 92 tenía 12 anos. Too val nel "periodismu".
Pa siguir con mentiras, resulta que'l zulo que montaron foi feitu col sofitu del entornu etarra (vuelta la burra), cuando en realidá contactaron con activistas ingleses; que taba feito pa esconder etarras (eso namás se "insinúa", pero enmierda tamién), ou que la relación demuéstrase pola esistencia de cartafueyos n'euskera, l.lingua propia d'etarras, abertzales ya, en xeneral, mala xente (por cierto, esos cartafueyos son un l.libru de Bernardo Atxaga, una pancarta escontra'l banzáu d'Itoiz ya unos apuntes d'un mozu qu'estudia euskera; la policía diz qu'inda nun pudo traducilos).
Parezme a mi, que nun entiendo de periodismu, que la Policía nun había ser la única fonte, menos cuando tan denunciaos por torturas ya puede interesa-ys desprestixiar a la outra parte. Parezme, tamién, que lo que diga una asociación de vecinos con un sólo miembru activu había de ser comprobáu enantias d'espublizalo. Pero qué más da, lo importante yia qu'estos marranos qu'intentan baltiar l'orden establecío tean mal vistos. Algo que, por cierto, nun parez ocurrir nel barrio onde s'asitia "Casas Viejas".
¡Viva'l periodismu!
26/10/2007
L'anu pasáu por estas fechas la revista semanal de "El País", conocida entós cumo "EPS" dedicába-y un númaru a los Premios Príncipe. Podéis imaxinar lo que cuntaban, ya lo que non. Nun momentu d'impotencia, envie-ys una carta, d'esas que nin piensas, que vas cubriendo rengleras según te vienen a la cabeza las ideas. Nel númaru 1570 (29 d'outubre de 2006) espublizáronla. Eiquí la dexo n'asturianu:
Un númaru enteiru (1568) dedícan-y na revista de "El País" a los Premios Príncipe ya nin una crítica, nin una sola nota discordante. Cuando pasa ésto, suel ser síntoma de daqué que chirría, de daquién que nun ta contándonos toa la verdá. N'este casu, por desgracia, ese daquién yía la súa revista.
Despuós de l.leer este númaru, cualesquiera vei quedase con una imaxen que pienso yia la que buscaban dar n'este medio: las xentes del norte, aquél.las que vivimos acul.lá del Payares, sumíos na eterna borrina, pasamos cada anu cuntando los días que quedan pa la entrega de los premios, los días que faltan pa salir na tele, pa ser visitaos por grandes personalidaes, insignes políticos ya xenerosos monarcas, pa ver las cais del nueso Uviéu engalanadas con flores... Qué llonxe de la relidá queda esta descripción.
Quitando'l propio día de la entrega, pa cuando la xente, movía polos "mass-media", sí-y da a la parpayuela sobro los actos, el resto l'anu pasan estos galardones ente'l más absoluto desinterés. Si acaso, un seutor de la población írguese con vozona crítica contra el.los, al consideralos un derroche, un despilfarru, un actu pomposu nuna rexón que tien las cifras de paru más altas del estáu (demientras, entregámos-y 50.000 € a Bill Gates o a J. K. Rowling), qu'inda sufre la decadencia de la mina, del sector siderúrxicu, del naval, del campu o de la pesca. Pouco tienen que ver estos galardones, nin la mayoría de los sous galardonaxs, cola tradición d'este pequenu país, colas súas l.luitas obreras, colas súas füelgas de mineros. Nun se cuál yía'l fin de tanta alfombra, de tanto hotel de luxu ya pefumes de Channel, pero lo mínimo yia qu'espeyaran, n'esta revista, esa "outra" realidá.
Ya, puestos a informar, vamos escomenzar diciendo au naz el títulu de "Príncipe de Asturias" que da nome a estos premios. Naz, sí señor, nel anu 1388, cumo medio pa controlar, dende'l reinu de Castiel.la, un territoriu que se torna peligrosu de manera periódica. L'herederu de la Corona podría, por aquél entós, poseer estas tierras, de manera qu'iba encargase de nomar rexidores ya alcaldes. Güei básta-y con decir unas pal.labras nun día señaláu. Del resto seique s'encargan los ustedes (los medios).
P.D.: el títulu cambiáronlu por un sosu "Faltan críticas"
22/10/2007
Sorprendéume, outra vuelta, el voceru del PP. Nun pensaba yá qu'iba salinos con declaraciones d'este xeitu nas que, nun momentu, pon panza p'arriba tola investigación sobre cambio climáticu. Ya failo de forma chambona, porque val que él sía incapaz de xebrar ente dous ciencias bien diferenciadas cumo meteoroloxía (el tiempu que vei facer mañana) ya climatoloxía (el clima que vei facer en ¿300? anos). Pero sorpréndeme que, no sou equipu, nun haya naide capaz de preparái-y daqué meyor.
Ou, igual, l'oxetivu yara ése, tracamundiar, engañar, confundir a la xente. Cousa tala namás tien un nome: demagoxa, bilordiu.
Yá veis, si you, al ver a la túa buela, nun soi quién pa saber cuál yia la súa edá, ¿cumo vei haber daquién que sepa la edá d'un fósil? -argumento rajoydianu-.
19/10/2007
Nun me gusta'l comunismu d'estáu. Nun creo nel sistema establecío en Cuba. Nun me gusta una revolución de 50 anos. Despuós de decir ésto, paso a falar d'una nueva bien controvetía.
La revista New Scientist espublizóu un estudiu basáu nel cálculu de la güelga ecolóxica (método almitío pola ONU), según el que namás Cuba tien un "xeitu de vida decente pa los sous habitantes, ensin que consuman más que la proporción razonable de los recursos que-ys correspuenden" (crisisenergética.org) . Paez que, por muito que los políticos oucidentales chenen la bocona con sostenibilidá, el nueso xeitu de vida ta bien allonxáu de lo que'l planeta puede permitir. Paez que si tol mundu consumiera cumo nós, nun iba haber comida, augua ou enerxía pa to=s. Paez que somos un pouco aguarones, ¿non?.
Por outra parte, rebaxar un pouco l'ésitu de Cuba, ya que'l propio autor diz que, si nun fuora pol embargu, iban disponer de más recursos ya iban usalos (a eso tienden cuando tienen dalguna época de bonanza económica), polo qu'iban dexar d'averase a éso del desarrollu sostenible. Pa ser positivu, pensái que nuna situación d'escasez de recursos somos capaces d'organizanos p'adaptanos a esa situación. Ya podemos caltener un xeitu de vida bien amañosu.
01/10/2007
Pues eso, qu'anda preiquí.
13/09/2007
Güei foi'l xuiciu pola demanda que la SGAE ya Ramoncín tienen contra'l portal web "alasbarricadas.org", un de los portales contrainformativos de más importancia nel estáu, con 12000 visitas diarias, quiciabes el más dientro'l movimientu l.libertariu.
La cousa fou que, van unos meses, dalgún anónimu fizo un comentariu nos foros de la páxina. N'este comentariu falábase mal del rei del pitu fritu ési. Tiempu despuós, a ún de los alministradores que l.levan la páxina cuando tienen vagar (nun sacan una perrona d'el.lo, nun pueden ver los 250 mensaxes nuevos que se publican ca día), chegó-y una carta diciéndo-y que tenía un xuiciu por ese asuntu, culpándolos de "ataque al honor". De siguío, quitaron el comentariu, pero yara mui tarde.
Pero, ¿por qué?. ¿Nun iba ser más fácil que, no momentu nel que Ramoncín -ou'l miembru de la SGAE que fuera- vio ese comentariu, mandara un corréu al alministrador? ¿Por qué un xuiciu contra "alasbarricadas.org" ya non contra'l que fizo'l comentariu -siguir una IP yia bien fácil-?. Too ésto nun sou quien a entendelo ensin metelo nun contestu.
Yia ese contestu chámase "Ley de Servicios de la Sociedad de la Información", una l.lei na que la SGAE fizo por meter la pezuña pa controlar internet yia poder zarrar webs ensin permisu xudicial, ya acusar al proveedor d'internet. Nun fueron quien, pero siguen emburriando, ya la súa estratexa, agora, ya facer oficial lo que inda nun consiguieron meter na l.lei por outros medios: sentar precedente con este xuiciu ya outros (frikipedia, por exemplu).
Si la sentencia yia desfavorable a alasbarricadas.org darían un pasu de xigante na censura n'internet. ¿Quién iba arriesgase a tener una páxina con foru, ou un simple blog, si por cualesquier comentariu iban facer responsable al dueñu de la páxina, embede responsabilizar al autor del mensaxe? Internet nun yia un l.libru, eiquí nun hai censura previa, nun hai intermediarios, éso yia lo que-ys jode.
Pola l.libertá d'espresión, ¡a las barricadas!.
Güei más que nunca, facer alcordanza d'ese cantar de Leño col que Rosendo tan bien caló a Ramoncín:
Ahora mola el Rock and Roll
me va la marcha
enchufa el exprimidor
es una ganga
ha llegado el descontrol
hay que aprovecharse
mete uno y saca diez
mira que farde.
Me he clavado un alfiler
en el pescuezo
me he juntado con los punks
soy un moderno
ahora me meo en el metro
nada me importa
y le pego hasta a mi padre
soy un pasota.
Pero dentro me pregunto
si duraré mucho
no será que estoy quemando
mi último cartucho
porque a decir verdad
no soy auténtico
y engañar al personal
es muy polémico.
11/09/2007
Hai momentos nos que ún tien vagar abondo pa da-y vueltas a la cabeza. Asina yia que se va custionando ún a sigo mesmo toas esas cousas nas que cavila, nas que vei creyendo col pasar de los años.
Al atoupase outra vez col mundiu caes na cuenta de las ganas que ties de facer cousas, too eso que dalguna vez te petó ya dexaste pa outro día. Ties ganas d'aproveitar el tiempu, de nun perder un segundu. Claro que yia imposible, ya d'eso tamién te das cuenta bien ceu.
Pero despuós de dous meses ensin poder facer nada, pienso na suerte que tengo de poder facer cousas, de nun quedame "esbaquiáu" no sofá de casa, de trabayar polo que quiero, polo que me gusta. Dame igual nun ser quien a cambiar daqué, pero nun vou permitir que me cambien a mí.
Veo tamién que'l 24 de noviembre hai, outra vuelta más, una cita n'Uviéu. Vou tar al.lí, anque, ca vez más, sou más partidariu del día a día. Non sólo na l.lingua, en tolo demás. Nun val de ná tener unas ideas si nun las l.levas al planu real. Nun valen disculpas, nun val pensar en qué van decir de tí, que van pensar que tas l.louco ou que sos un pueblerín. L'outro día un familiar alcordábase de la fala de los sous vieyos namás con ver un panfletín de la Xunta Moza no miou conceyu. ¡Cómo-y prestó ver aquel "yía", aquel.los "dreitos" ou un simple "anantias"! A min valme más ésto que vente manifestaciones.
Sí, pa tomase en serio a unu mesmu pienso qu'hai que falar ya vivir acorde colas ideas. Sinon van arramplanos lo pouco que tenemos, que yia na menos que las nuesas cabeza, la nuesa personalidá, nos mesmos. Seique paga la pena un esfuerzu.
Un saludu a tola comunidá asturbloggera, gracias a la que, nos dous últimos días, enteréime de tolo que pasara nel branu d'Asturias (la pena yia que nun hubo sorpresas). Agradecer especialmente a la xente que sacó alantre proyeutos cumo "llinguablog", "nireblog", "ximiélgame"...
08/07/2007
Este vienres 13 vou facer un añín col blog. Nun cuntaba chegar eiquí, la verdá.
Pero agora vou tener que dexalo, dous meses, por temas del l.labor. Nun vou poder celebrar bien l'añu, pero quiero agradecevos a tolos que pasasteis priquí, a los que pasáis, a los que dexasteis comentarios... gracias.
Prestaríame volver en dientro d'unos meses ya atoupame cola Asturias que you más quiero, l'Asturias obrera, que l.luita, que nun tien vergüenza en falar na súa l.lingua l.lariega. D'ilusiones viven l'home ya la muyer.
Quiero facer alcordanza de dous temas que m'esmolecen enforma agora mesmo, el de Cándido ya Morala, qu'inda nun acabóu, yia'l de Xose Antón, militante de la Xunta. Dous casos de represión, d'amenaza (ya cumplimientu) de cárcel que buscan metenos miéu. Nun van ser quien, vamos glayar tolo alto que faiga falta, si nun nos escuitan, polo menos que nun tean tranquilos. Espero que pa la que vuelva, al menos estos dous casos tean iguaos.
Suerte a tola comunidá astur-bloggera. Véovos nun tiempu.
¡Salú ya Puxa!
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
