Crítica al panorama social, con especial pricuru pa col mediu ambiente.
23/01/2007
Van unos años, un paisanu de la costa Oeste de los EEUU taba faciendo turismu por Asturias. Dio-y por visitar lo qu'anguanu se chama "Comarca vaqueira", ya taba faciendo una ruta en moto polas brañas de los conceyos de Tinéu ya Valdés, cuando, de sópitu, caéu na cuenta de que se perdiera. Nun sabía por ónde tenía que tirar. L'home, claro, escomenzóu a pensar no peor. Taba nunas tierras estrañas, ente unos pueblos bien probes, n'una de las rexiones más atrasadas d'Europa oucidental. La xente (pouca) qu'había falaba nun falaxe bien raru, non entendible nin pa él, que pensaba conocer l'español. Amás, paecía ser xente xabaz.
Despuós de varias horas, días, caleyando ensin sentíu, atoupáronlu unos homes que-y dieron ayuda. Taba salváu.
L'avetura fuora tala, qu'el paisanu discurrióu conmemorar esti día cola celebración d'un rally, que sería anual. Menuda aventura. Tierras de l.lonxe, habitadas por xente probe; too dispuesto pa qu'unos ricachones de los EEUU (ya d'Europa tamién) pasaran unos días d'aventura. Qu'el "stress" de Wall Street yia mui malu.
Col tiempu las cousas fueron virando, las empresas d'automóviles, petróleo, televisiones... pagaban muitos cuartos a los "aventureros", ya éstos tenían tecnoloxías (GPS) que quitaban méritu a la hazaña. Amás, había xente que nun lu veía bien: las muertes d'unos nenos, d'unas muyeres, ya, en menor midía de bien de ganáu tenían la culpa. El feitu de gastar un montón de perras pasando por un sitio tan probe, tampouco nun-y daba mui buona fama.
Ésto que parez una babayada bien siendo lo qu'estos días nos pusieron pola tele, contada cumo la gran aventura del Rally Dakar. Namás hai que cambiar Asturias pol África, ya la comarca vaqueira por dalgún de los países más probes d'África: Mauritania, Mali, Senegal... Por desgracia, lo de las muertes nun hai que cambialu: de 51 muertes na hestoria del rally, menos de 20 yaran pilotos. El restu, mecánicos, periodistas, nenos ya muyeres de los "poblaos" polos que pasen. N'España inda nun tien mutiu puxu'l movimientu contra'l Dakar (sí tien en Francia), pero paez que lu va garrando.
Anque, agora que lu pienso, n'Asturias yá tuvimos una experiencia asemeyada
20/01/2007
Actualizo la noticia con un par d'enlaces:
-El mundo cae na trampa
-Nota d'AIRA en glayiu.org
14/01/2007
Pues eiquí va outru cantar, que yá tocaba (el mes pasáu esqueicióuseme). Tóca-y güei a La Familia Iskariote, grupu que vien de tierras palentinas. Amestan soníos cumo'l ska ou'l punk, siempre con un toque folixeru a la vez que vindicativu.
Este mundu (La Familia Iskariote)
Si el hacha ha cortado / el último árbol
Y el cielo se viste / de color gris
Si ya no cantas / al ir caminando
Y ese niño / no puede reir
Si nuestro alimento / está adulterado
Nos manda la muerte / qué nos queda aquí
Si el mundo se empeña / en jugar a las guerras
O o o o o / qué puedes decir
Apoya tu mente / sobre mi hombro
Y juntas pensemos / qué va a suceder
Qué es lo que tenemos / para ofrecer
Mejor sepultarles / si quieren nacer
Mi vida en peligro / la tuya también
Los bosques, los valles / pero no la de usted
Construyen refugios / sabe dios pa qué
¿Por qué no lo dicen? / ¡qué nos van a hacer!
(SONIDO REBELDE, 2005)
14/01/2007
Polo menos, asina lu diz la "Oficina de Meteorología de Reino Unido" . Too el.lo porque, a lo que paecen ser primeros efeutos del cámbeu climáticu (que yá fixeron de 2006 el más calurosu de los rexistros), vei xunise esti anu'l de "El Niño" (la marca de roupa non, el fenómenu meteorolóxicu). Asina, la nieve inda nun l.legóu a los cordales d'Asturias, colo que nun hai esquiadores que dexen cuartos ya puede ser que nun haya augua abonda nel branu. Amás, las flores paecen tar tontas, ya espuxigan en xineru, los paxarinos nun dexan de cantar, los ousos nun pueden hibernar... Puede ser más grave de lo que paez, ya que s'altera too'l ciclu reproductor de muitas especies, conque pueden producise plagas ou caídas de población. Tamién puede ser que quede en nada.
Habrá que buscá-y daqué de bueno, a ver si esti anu podemos danos un bañín en Semana Santa.
14/01/2007
Paez ser que los fascistas nun saben qu'inventar. Nel sou esfoutu por crear odiu pa colos inmigrantes (lo qu'el.los consideran inmigrantes), el seudo-partíu memocracia demencial feixo una campaña a nivel estatal na que faen por imitar a un grupu islamista, ya van poniendo pegatinas por cualisquier l.láu, onde dicen que "NOSOTROS LLEGAMOS EN PATERA, PERO VOSOTROS OS LARGAREIS DE AQUÍ NADANDO". Debaxu unos garabatos que paecen dar alcuerdu de símbolos islamistas.
Lo dicho, patéticu, ya nun sería dignu de mención sinon fuora porque l'ambiente creáu por dalgún partíu con más puxu favorez que la xente piense que yia una campaña islamista de verdá.
En fin, maxino que la Delegación de Gobiernu tomará buona nota, ya cualquier día aparecerán los primeros deteníos por fomentar el racismu. ¡Ai, non!, si a éstos yá los defendieron l'anu pasáu en Cangues d'Onís.
08/01/2007
Primer artículu del anu ya anímome a facer del.los cámbeos. Vou falar de más temas a parte de medio ambiente, anque siga teniendo un cuidáu especial pa con ési.
Ya en viendo cumo aprovechó el presi ZP las vacaciones, tóca-y a él sufrir las mis iras. Tou porque, de magar ganóu las eleiciones, una tres outra foron caindo embaxu todas las promesas feitas entós.
-Traxo las tropas d'Irak, sí, pero nun s'entiende esa decisión sinon yia por un compromisu antibelicista. A cambio aumentóu los continxentes n'Afganistán, Haiti ou Libano. Por si fuora poucu, el límite qu'Aznar (sí, el mesmu) punxera de 3000 soldaos españoles cumo máximu pa tener nel esterior, agora el ministru del Interior quier ponelu en 3600.
Yia'l gastu militar sigue medrando, l.lévase un 12% de los gastos del estáu.
-Paecía qu'iba traer nuevos aires republicanistas, incluso con discursos dedicaos al sou buelu (que despuós enterámonos foi un xeneral de los que vinieron a Asturias nel 34). Tou lo que quedóu d'aquel.lo yia una posible l.lei de (des)memoria hestórica, que nun gusta a naide, pero sobre tou nun gusta a los qu'habría que recompensar. Nin s'anulan los xuicios d'una dictadura, nin se prohíben los símbolos franquistas, nin tan siquier s'encamienta a los conceyos pa que los quiten.
-P'acabar bien, veo qu'el nuevu alcuerdu cola iglesia sigue na l.línea de los últimos, más cuartos pa una empresa privada, caltenida con fondos estatales. Cumo la UE dixo que yara il.legal que la iglesia católica nun pagara IVA, entós los cuartos qu'aforraban vamos tener que pagalos ente toos. Namás qu'un 34% vei medrar lo que-y pagamos a la iglesia, qu'eso sí que yia dineru bien invertíu, ya lo del asturianu un gastu tontu.
Esto yia, nin antibelicismu, nin republicanismu, nin laicismu. Que dalguien me saque del miou error, pero pa mi que la "socialdemocracia" tien lo xusto de democracia ya bien poucu de social. Nun yia más qu'el mesmu capitalismu l.liberal con media capina de pintura, que vei caindo col pasu del tiempu.
Por cierto, que nin tan siquier puede dicise que meyoremos económicamente. Paez ser qu'el salariu mediu real ta al mesmu nivel de van diez años, eso sí, con mayor desigualdá.
01/01/2007
Asina, cumo si'l mesmu home'l sacu fuera a visitanos, espero you al nuevu añu que dicen tamos entamando. Porque esti añu vamos ir viendo qué pasa con Caliao, cuántas hectáreas de urbanizaciones faen, cuántos ocalitos más van l.lantanos, qué van facenos colas térmicas, cuánto vei costanos iguar l'estrozu que dexa rio narcea gold mines... Tou el.lo ensin cuntar conque nos amañaron un sistema que nun cuenta nin colas personas, nin col medio ambiente, cousa qu'ainda yia más difícil de baltiar.
Por agora sabemos quién merecióu la "Buyada purpurina nel 2006", ou más bien a quién y la dieron, porque merecer merecíanlo del.los más. Pa despachar a gusto l'añu, el "premio" chevóulo, cumo non, el nuesu Tini.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
