Llugar bien amañosu pa la reflexón surrealista
18/02/2009
Va ser cosa d'oreyes. Yo crecí col señor de la oreya verde. Sedrá un ser mitolóxicu, camentaba daquella, porque oreyes namás les tuviere visto colloraes pol fríu, por dalgún balonazu nel patiu'l colexu o depués d'un bon tirón si nun acababes el problema, qu'asina les gastaben los maestros de cuando neñu.
Más raro, digo yo, ye esi qu'ha de tener más de dos oreyes de tanta xente qu'hai arrodiándolu falándo-y de coses importantes. Lo más ablucante que por munches oreyes que tenga nun ye a escuchalo too. Habrá que-y lo gritar.
Por suerte hailos que de neños poníen atención a lo que-yos dicía la so güela. Atalanto qu'estos son, tamién, neños de la oreya verde.
29/01/2009
Fai tiempu que nada escribo porque tán lladronándome les pallabres pa nada nun dicir con elles, namás pantasmales vacíos, ringleres blanques.
L'anoxu medra como l'universu nel puntu cero. Fumu queda nel país que pienso. Y mofu nes esquines.
07/01/2009
Nun teas atristayáu, pa qué mirar pa lo escuro, pa qué la soledá fría como'l corazón d'un páxaru muertu. Nun caigas al agua, nun esperes l'abrazu últimu nin t'axuntes al silenciu.
Hai munches coses por facer, alloñar les tristures ye'l llabor de la vida mesma.
Ri, besa, suaña. Y, sobre too, fala.
27/12/2008
Foi un día talu como güei. Percorrióme les entrañes más vives hasta computase nesti llugarín na rede. Pequeñu ye, sí, pero galán.
Suerbo la nueche. Y asina les pallabres salen escures, como túneles tronadores.
Gracies doi a los y les que somos. Pa los demás tengo estes entrañes, más vives que nunca. Tres añinos y sumando.
17/12/2008
La mentira aporta per casa como'l fríu cuela perbaxo les puertes. Tamién les cucaraches pasen pelos llugares más ruínos. Ye lo que-yos pasa a los fuínos y seres que malgobiernen les faciendes ayenes.
Siempre nos quedará dalgún llugar calecíu p'atopanos. Ehí vos espero, que fuera ta mui frío.
*(Esti blog entamóse y caltiénse ensin ayuda nenguna de la Conseyería de Cultura del Principáu d'Asturies, más bien, al contrario)
El próximu añu Ricardo Pues sí, xanu, pues sí. La solución lleva [...]
El próximu añu El Xanu\'l Caborniu La segunda acepción d'asturiar ye'l megollu del que [...]
bloguetu, el Ricardo Gracies pol to camientu, Repunante. Agradezse'l pasu per [...]
bloguetu, el Repunante Bloguetu, pero siempres con estilu apolazáu y muncha, [...]
bloguetu, el Ricardo Nello tamos, collaciu, nello tamos toos y toes. [...]
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
