Llugar bien amañosu pa la reflexón surrealista
03/04/2006
La mio gata yá tien dellos años d'esperiencia pente'l mundu del ser humano. Ta acabante facer unos nueve añinos y camiento que, no que tien de vida, ye más llista que lo que podamos ser les persones coles que vive. Paez mentira pa un ser con una mente (supongo) más cenciella que la nuestra lo rápido qu'entiende les coses. Dende un puntu de vista conductista pue paecer fácil d'entender el procesu pel cualu'l mundu queda asimiláu pente les neurones gatunes. Namás ye una especie d'esperiencia tres d'otra, y d'ehí va sacando les coses positives y les negatives, repitiendo les primeres y evitando les segundes.
Pero hai qu'amestar a esto'l fechu de que la mio gata (supongo que tolos demás tamién) davezu te mira con carina picarona, y aldovíno-y dacuando una especie de sonrisina nel fociquín. Pienso entós si tendrá sentimientos, si sabrá y gociará de lo que ye la felicidá, si se pondrá triste por coses asemeyaes a les nuestres, si toa esa bayura de sentimientos (dende la tristura o señardá, hasta'l gociu y felicidá dafechu) tendrán llugar nel so corazoncín, tan pequeñín él.
Quiciás soi yo'l que-y otorga esti paecer, el que quier creer que tamién «piensa» como podamos facelo nosotros. Acaríciola y falo con ella como si fuera una persona (tolos que tenéis mascotes sabéis a lo que me refiero), que no fondero, ye una forma de falar con ún mesmu.
Pero lloñe del conductismu, nesti casu creo más en daqué místico, en daqué poco esplicable. Y non por ello menos científico, nun hai más que pensar nel principiu d'incertidume de Heisenberg. Eso pasa colos gatos y animales domésticos, l'observador influi no observao. La mio gata ye como ye, entós, porque ye de mio. ¿O seré yo como soi porque m'agüeya la mio gata?
15/03/2006
L'autovía minera ye toa una sorpresa. Al mes d'estrenala, alcuérdome de que yá aparecieren dellos badenes qu'a cientu y picu per hora facian estrapayate la tiesta escontra'l techu'l coche. Cuasi que yera recomendable poner cascu diendo dientro'l coche tamién. Nun pasó nada, punxéronse delles señales avisando del badén. Como si l'avisar d'ello solucionara daqué; vamos, que les señales avisaben de daqué que la xente que davezu agarrábemos l'autovía yá sabíamos, y el bote dibamos dalu igual.
Llueu, coles lluvies (¿qué estraño nesta tierrina, non?) y el mal tiempu apaecieron los primeros argayos, y poro los cortes nos carriles, o desdoblamientos pasando de dos a un carril. Yera daqué sorprendente que nun se tuvieren previstos los terrenos pindios que taben al rodiu los arcenes y de cómo pue influyir la lluvia y los regatos na tierra blando. Pasó lo que tenía de pasar. Que la tierra entamó a cayer hacia l'autovía y, como dixi, los cortes y molesties. Tengo de dicir qu'al menos l'autovía nun tuvo, nin ta, tán saturada como la "Y" asturiana por antonomasia que xune Uviéu, Avilés y Xixón.
Dempués, de tantes vegaes que pasé (que paso) per ella, decatéme en que nos montes y terrenos que s'alluguen a los llaos de l'autovía apaecieron (de xuru que yá taben ehí dende cuantayá, pero yo decatéme hai bien poco) ocalitos, munchos ocalitos, bosques d'ocalitos per toos llaos. Entiendo que pa Navia, onde hai una empresa papelera necesita terrenos de rápidu crecimientu d'árboles y poro, creo, tien tou un bosque plantáu d'ocalitos pa él, onde van rotándose les tales pa permitir que mentanto talen nun llau, n'otru llau medren los árboles. Los ocalitos, equí, son fundamentales porque tienen un rápidu desendolque vital y crecen mui rápido. Lo que nun entiendo, ye que fuera d'estos márxenes acotaos y que tienen una bona razón d'esistir, haya ocalitos. Ye dicir, nos terrenos públicos (quier dicir de toos alministraos pol gobiernu del Principáu) plantáronse (porque daquién tien de facelo) ocalitos y enllenen, como l'espaciu de l'autovía minera, munchos llugares asturianos. ¿Cómo se permite eso?, ¿cómo ye que se permite y favorez dende l'alministración la plantación d'un árbol non autóctonu?, ye más, ¿cómo se permite dende l'alministración la plantación n'espacios públicos d'un árbol (non autóctonu) que ye amás nocivu pa les demás plantes (ye dicir, nocivu p'árboles autóctonos)?. En fin, una vergoña. Ta claro que los carbayos, les fayes, castaños... son árboles que tarden más en nacer, pero ¡cóime!, ¿nun ye eso parte del paisaxe asturianu?, ¿nun debería protexese precisamente por ello?. Interesante ye'l llibru tituláu Tecnología, Ciencia y Sociedad, una introducción al estudio social de la ciencia y la tecnología, escrito por dellos autores; y concretamente'l capítulu tituláu «Participación pública en política tecnológica y ambiental: el caso de la política forestal en Asturias». Paga la pena lleelu, perbonu estudiu fechu por dellos profesores universitarios y catedráticos d'Universidá.
Esto, dende'l mio puntu de vista, amuesa una manera de facer política: fáense les coses ensin tener en cuenta Asturies y les sos especifidaes (o quiciás van quedándose euros pel camín y a la fin de dalgún llau hai qu'aforrar), nun hai respetu pola cultura asturiana nin ganes de facer nada si nun va dar votos (ye dicir, si nun-yos facilita siguir na poltrona chupando perres).
Reflexón final. Esta autovía minera que xune Mieres y Xixón, según sales d'ella en Xixón, llévate hasta un sitiu onde tan construyendose munches carreteres, enllances d'autovíes y la madre que me parió. Daqué enguedeyao que de momentu namás entienden cuatro inxenieros pero que ta tomando pinta d'un monstruu urbanísticu. Nun digo que nun seya necesario too eso, de xuru que va meyorar les comunicaciones y va facilitar a los conductores los trayeutos a siguir. Pero visto que l'autovía, cuantes más conduzo per ella, más tristures y pesares m'ufierta, pienso qu'esti gran nudu d'enllaz ente delles carreteres principales en Xixón va traer daqué negativo qu'amestar a lo dicho. Namás digo que xusto al llau de toa esta construcción, onde hai unes cases con ganadería (según sales de l'autovía, en Xixón, a la drecha) hai, si vos fixáis, un horreu y una panera (anque creo que tien ocho pates, non seis). Namás pueo dicir ¡virxen de la cueva, que se quede too como ta!.
03/03/2006
Asturiar: 1. tr. Tener un sentimientu de señardá por daquién (o daqué) que se conoció (Asturió los años mozos). 2. tr. Escaecer daquién la so propia cultura (Los aboríxenes americanos tán asturiando por culpa'l capitalismu). 3. tr. Paecese o asemeyase a dalgún aspeutu tradicionalmente asociáu a Asturies (La torre Eiffel asturia un castillete mineru)
21/02/2006
L'asturianu, toos sabemos, nun tien los mesmos drechos llingüísticos que'l castellanu y d'esti mou s'arrequexa la nuestra llingua. Con esti paisaxe ye perdifícil qu'haya xente llector, más entovía escritor.
Amás, nesta tierra mía tan querida y que tanta murnia alluga nos güeyos cuando pienso nella, dase daqué que nun creyo que seya mui bono. Hai un enfotu, pa sofitar la llingua, dende ciertes estayes polítiques en subvencionar y asoleyar lliteratura n'asturianu. Esto ye mui bono, pa compensar esta desigualdá que sufre l'asturianu con respeutu'l castellanu, pero nun podemos quedanos namás neso. Refiérome a qu'hai muncho enfotu n'espublizar (en crear autores) pero nun veo'l mesmu enfotu en crear llectores, en crear una demanda real de llibros. Resulta, a la fin, que la masa llectora ye la mesma que la qu'escribe. Nun digo que tola xente que merca, o mercó, dalgún llibru (o sacólu de la biblioteca; ye un error midir la capacidá llectora d'una sociedá namás polos llibros vendíos, creo qu'ha de tenese en cuenta tamién l'afilición a biblioteques y el númberu de llibros mediu que saca cada usuariu; nun hai qu'escaecer que munches vegaes, sobre too n'Asturies, les families nun puen permitise gastar perres, y muncho más si les puen aforrar diendo a les biblioteques públiques y gratuites), pues como dicía, de xuru que hai xente que nun escribe y llee lliteratura n'asturianu, pero creo que muncha xente ye la qu'escribe y amás (se) llee.
Como digo, creo qu'hai un escedente de lliteratura que nun correspuende cola demanda real n'asturianu. ¿Ye eso bono?. Home, creo qu'eso nun debe perdese, creo que debe caltenese esi sofitu (hasta la llegada de la oficialidá) pero tien d'acompañase con midíes pa crear llectores, entamando dende los más rapacinos hasta los pas. Tien qu'atendese más a la creación d'habitos de llectura n'asturianu. Na escuela l'asturianu ta como ta, yá lo sé, pero amás de clas de «llingua asturiana» debería haber otra que fuera «lliteratura en llingua asturiana». Supongo qu'eses dos asignatures de les que falo tan axuntaes nuna solo agora mesmo, y que los maestros y profesores d'asturianu faen malabarismos pa falar de tou un poquiñín ya intentar dignificar una materia ensin prestixu social.
En cualquier casu, too son suposiciones. La única solución ye la oficialidá (y a ver). El mio plantegamientu ye que la lliteratura n'asturianu nun pue tener como motor la subvención, sinón la demanda real de lliteratura. Esta demanda tien de crease, fomentase dende les instancies polítiques y pedagóxiques afayadices pa ello. Quiciás soi mui agorero, nun lo sé, pero la llaceriosa situación n'Asturies nun ye pa pensar lo contrario.
02/02/2006
Pues nada, dempués de lleer les declaraciones del secretariu xeneral de la FSA (ye dicir, Federación Socialista Asturiana, que de Socialista yá me diréis qué tien) y de les últimes de la Conseyera de Cultura del Principáu d'Asturies Ana Migoya, nun pueo más que quedar enforma ablucáu.
Pa entamar, hai tiempu que vengo pensando qué tien el PSOE (falando, polo menos, n'Asturies) pa siguir calteniendo les sigles que tien. La «S» perdióla nun sé cuantayá y ensin ella nun tien sentíu, tampoco, la «O». Ta perclaro que'l PSOE ye un Partíu y que ye Español, lo primero porque fizo los trámites afayadizos pa presentase a unos comicios (talamente como lo faen les Asociaciones pa rexistrase como Asociación oficial y poder gociar de les ventayes y obligaciones que-y otorga l'alministración) y lo segundo porque fala perbién l'español (o castellanu) y nun fai más que mirar pa Madrid.
Pero al marxe de la verdadera filiación política según les calces que marquen les sigles del partíu. Ye ablucante, como entamaba, escuchar les declaraciones de los ¿socialistes? que tan nel poder. Lleguen a dicir que la oficialidá de la llingua asturiana ye una imposición. Y dempués de tala babayada quédense tan contentos. Y lo que ye peor, nel so puestín bien pagáu n'alministración. ¿Cómo unos políticos s'atreven a falar de cuestiones filolóxiques o sociollingüístiques ensin sofitos de filólogos o sociollingüístes?. Ye dicir, si yo soi político y quiero facer una autovía, nun pueo dicir que l'autovía va pasar per onde me dea la gana, sinón que tengo que tar avaláu por inxenieros, topógrafos, urbanistes y pue que por xeólogos. Namás conociendo les opiniones d'estos espertos nel tema y siguiendo les sos valoraciones y propuestes, pueo yo escoyer la meyor solución. Pero equí non, equí unos políticos, ensin conocimientos de filoloxía nin de sociollingüística, dicen lo que piensen, apurriendo de pasu tolos sos prexuicios ya inorancia al ciudadanu. Y esto namás pasa equí. Y queden tan contentos, como dixi, nel so puestín. Lo peor ye que tienen nel so poder encuestes sociollingüistiques y un estudiu de valoración de la cooficiliadá que son positivos. Ye dicir, que tan al favor de la oficialidá del asturianu y sofítanla. ¿Cómo ye eso?. ¿Nun-yos cae la cara de vergoña?.
Nun ye por nada pero IX-BpA yá pue dir espabilando. Digo IX-BpA porque tan nel poder en coalición. Anque si yo fuera ellos, hai tiempu que tuviera rotu'l pautu de gobiernu. N'Asturies y en Xixón. Caltenese al llau de talos babayos (nómolos asina poles babayaes diches, ye dicir, polo de dicir que la oficialidá ye imponer) nun fai más que desprestixar un/os partíu/os qu'aspiren y prentenden ser d'izquierdes. Quiciás yá lleguen tarde y tuvieron más de la cuenta sentaos ehí al llau, quiciás debieron marchase enantes. Nun voi ser yo quien-y quite la razón a quien diz qu'IX morrió cuando marchó Julio Anguita.
22/01/2006
Ye increyible. Lleí l'otru día qu'Hunosa, esa empresa minera de toos conocida, rebaxó la plantilla llaboral más de lo que tenía pensao. Y comémonoslo asina, ensin un cachu pan y culete pa qu'esboligue meyor pel gargüelu. Ye llaceriosa la situación llaboral n'Asturies, onde les grandes empreses y multinacionales (lléase tamién Aceralia del Grupu Arcelor) faen lo que-yos peta col corporativismu de l'alministración asturiana. Pero hai que dir un poquiñín más p'allá. Más llacerioso entovía que la situación llaboral (sobre too onde más perres se mueven, ye dicir, nes empreses más poderoses, como éstes que nomé) ye la defensa organizada de los trabayadores (nin dicir tien que quien más sufre esta desproteición llaboral y esti recorte de drechos ye la clas trabayadora, la que ta embaxo too, la que fai'l trabayu sucio pa la meyora económica de los de siempre).
¿Cómo ye que n'Asturies nun haiga un sindicalismu seriu?, ye dicir, ¿cómo ye que n'Asturies nun haiga un sindicalismu?, porque los sindicatos qu'anguaño hai son pa rise si nun fuera poles pergafes consecuencies que tienen pa toos. Ta perclaro (y ye daqué percenciello de ver pa cualquiera que viva n'Asturies al rodiu les zones mineres) que los fondos mineros nun s'usaron pa lo que se deberíen. Que los mandamases políticos y sindicalistes callen como afogaos y firmen vergonzosos pautos, vendiendo los ideales sindicalistes y, de pasu, Asturies. ¿Cómo ye que n'Asturies, los sindicatos firmaren los pautos polos que se vendieron puestos de trabayu?, ¿cómo ye que nun planteguen propuestes d'industrialización o una rede industrial alternativa pa la minería?, ¿de qué van vivir les zones (güei) mineres cuando'l carbón muerra?
Yo veo que'l sindicalismu morrío. Y danme noxu toos esos «líderes» sindicales qu'agarraron el sillón y los cuartos y nun los suelten. ¿Ónde se vio que cobren lo que cobren y pa encima nun defendan como debieren los intereses trabayadores?.
Y vuelvo al entamu. ¿Cómo ye que nengún sindicatu obreru o mineru se decatara de qu'Hunosa fizo lo que-y petó?, ¿cómo ye que nun glayaron pa protestar?. En definitiva, el sindicalismu, los principales sindicatos, son una vergüenza n'Asturies. Una tierra d'histórica tradición trabayadora y proletaria. Oxalá los trabayadores mandaran a la mierda los sos carnés de filiación sindical. ¿Nun veis que los sindicatos nun faen nada?, ¿ye normal que s'imcumplan davezu los pautos perxudicando a los trabayadores?, ¿ye normal que nun se denuncien?.
Que Tini Areces militó nel PC sábelo tol mundu y mirái en qué terminó. Y tol mundu tien drechu de camudar de chaqueta cuando-y pete, nun digo que non. Pero ye sintomático que tolos que lleguen a ciertu poder (seya políticu o sindical) escaecen los sos entamos proletarios. A mio pá nun-y pueo nomar el nome de Tini, porque él (mio pá) tamién simpatizó col PC y tuvieron a la vera en reuniones y manifestaciones. Y toos tamién, un poco qu'escarbayemos, sabemos de casos paecíos, de cómo se vende la xente.
Anguaño nun creyo nel sindicalismu. Oxalá dalgún día puea volver a creer. Polos trabayadores. Por Asturies. De momentu, creo en persones, n'amigos (dalguna tuvo un tiempu na probitú guatemalteca p'ayudar) y pa ellos sería, de xuru y ensin duldes, el mio votu.
15/01/2006
Pues pasóme qu'ayeri foi un d'esos díes nos qu'a un amigu-y salen les coses bien. Nun sé si llovía, dame lo mesmo, tampoco m'importó'l IPC, nin les coses per Oriente mediu, nin les babayaes polítiques que toi avezáu a escuchar nesta tierra mía. Escaecí, per unos momentos, les caxigalines que nos afueguen día tres día, y centré la mio atención nesi xestu de bon home que ye, neses pallabres enllenes de nerviosismu, neses güeyaes que tornaben a la so infancia, nesi pechu onde cuasi nun-y cabe'l corazón de lo grande que lu tien.
El casu foi qu'asocedió too talamente como, hai años, quixi suañar yo. Les coses salíen-y bien al mio amigu. Y ellí tábemos tolos sos collacios, con él, pa sofitalu en tolo que fuera, pa da-y ánimos y participar del so gociu. Yera'l so día. Dempués de tantu tiempu esperando, a la fin parió un fíu. Yá tenía ún de carne y güesu, de nome Pablo y tou un personaxe enllenu tenrura y cariñu. Pero esti otru fíu del que falo yera distintu porque yera un fíu nacíu pente'l borrín de la memoria y pente'l que val la pena adientrase y perdese un ratín. Prometo, yo que lu tengo nuna estantería de la mio habitación, agarralu dacuando y echa-y una güeyada. Ye una forma de sentite cerca, amigu.
08/01/2006
Ayeri, como toos de xuru sabéis, retresmitióse'l partíu ente'l Sporting de Xixón y el Ferrol pela canal autonómica. Esa que tien como logotipu una «a» que fueron a diseñala n'Inglaterra, como si n'Asturies nun hubiera bones empreses diseñadores, o persones capacitaes; porque qué queréis que vos diga, pa facer el diseñu que ficieron tampoco me paez que ficiera falta salir d'Asturies. En fin, 
seya como fuere, el casu ye qu'ayeri tuvieron tresmitiendo'l partíu de fútbol esi.
Yo tuvi mirandolu un ratín. Y si vos digo la verdá, nun lu miraba pol interés que podría tener dalguién que fuera de Xixón (que lo soi), sinón que lu taba mirándo cola ilusión d'alcontrar una alegría. Pero nun tuvi alegría tala. Ye cierto que taba esperando un poco de llinga asturiana, que punxeren cartelos, que ficieren comentarios n'asturianu, pero nada. Quedóse too nun partíu más, abondu ramplón.
Nun entiendo, si lleemos l'Estatutu d'Autonomía, la Llei de Promoción y Usu del bable/asturianu y amás-y sumamos el Plan de Normalización Social de la Llingua Asturiana del gobiernu que ta nel poder paez que la creación del ente autonómicu asturianu diba trayer con él (como un siloxismu aristotélicu) una importante presencia de la llingua asturiana falada nella. ¿Cómo una alministración va normalizar una llingua (que reconoz qu'esiste y qu'almite como padremoñu asturianu) si nun ye falándola dende l'alministración?, y si esta alministración crea un mediu de comunicación tan poderosu pal averamientu a un estándar llingüísticu, ¿nun vien darréu l'usu de la llingua asturiana de manera importante nesi mediu conociendo la fuerte diglosia qu'esiste nel país asturianu?.
Yo lo que sé ye que como asturianu dame vergoña la política asturiana. Y nun quiero ente autonómicu, que toos sabemos que pa lo que va servir ye pa la manipulación y pal usu del gobiernu de turnu (más entovía sabiendo que van primase na parilla los programes informativos). Namás taría d'acuerdu con una radiu y televisión autonómica si nella tuviera presencia abonda l'asturianu (yá pa mentinos que nos mientan n'asturianu).
Nin siquiera ganó'l Sporting de Xixón. Fuime pa la cama atristayáu.
04/01/2006
Mirái per onde. Ayeri encendí la tele y entamaba una serie d'emigrantes asturianos. Concretamente d'ún que viaxaba a L'Arxentina. Y sorprendióme que falara n'asturianu. Nun yera un asturianu académicu, claro, intentaba asemeyase al asturianu espontáneu que la xente de les Cuenques del Nalón conoz bien.
Per un llau, al marxe de caxigalines, que nun tienen la mayor importancia (porque la serie ye una serie, nun pretende dignificar nenguna llingua, namás intenta ser creíble), paecióme interesante sacar al escaparate estatal una llingua arrequexada. Un murcianu, un sevillanu o un valencianu, polo menos, entrugaríanse cómo ye que falamos equí daqué distinto al castellanu (suponiendo que nun conocieran la esistencia del bable; yo yá m'atopé a una murciana de vacaciones per Asturies a la que-y sorprendía qu'equí hubiera una llingua distinta al castellanu, ye más, nun conocía nin la pallabra «bable»), pues como dicía, ye una manera de dar a conocer (o de reafirmar) una realidá llingüística más allá de les nuestres llendes. Pero esti efeutu hai que miralu con cuidáu. Nestes coses, sobre too cuando ta en xuegu daqué político, la xente suel tener memoria selectiva. Lo que ta claro ye que nun van venir de fuera a defender lo nuestro, nin ye esa tampoco la pretensión de la serie. Prestaríame entruga-y a dalgún de los nuestros políticos, esos que namás arrequexen l'asturianu al llugar de lo «folclórico», qué-y responderíen a dalgún que nun ye d'Asturies y entrugue por esa forma de falar. Esa serie, quiciás, más que pa qu'un murcianu, un sevillanu o valencianu conoza l'asturianu (que por muncho que respeten la nuestra llingua, nun dexarán de sentila lloñe y fadrán namás un sofitu moral), sirva pa que dalgunos asturianos comprueben que lo que falen (sienten falar) ye daqué asturiano que nun hai que dexar morrer.
Per otru llau, nun pudi dexar d'acordame de la Madre del Emigrante, más conocida como la Lloca'l Rinconín, escultura de Xixón. Representa, esta escultura, la resignación y la tristura d'una madre que paez que despide a los sos fíos que marchan a facer les amériques. Nun sé si esta escultura, saldrá n'otru capítulu de la serie, pero nun taría nada mal.
No fondero, una serie interesante, porque amuesa lo que dicen tolos estudios filolóxicos y sociolóxicos, que l'asturianu ye una llingua que se tresmitió de pás a fíos nes clases baxes de la sociedá, ye dicir, tresmitióse ente la xente non castellanizao na escuela, la que tenía que buscase la vida no primero qu'atopaba, la que tuvo vida dura y malpenes salía p'alantre. En definitiva, la xente aldeano que nun tuvo poder nin dineru.
27/12/2005
Pues sí, yá veis, la oficialidá tien moos. Ún pensaba que la oficialidá de daqué (seya llingua, nome, topónimu...) yera percenciello d'entender. O hai o nun hai. Pero lleo güei mesmo nun periódicu que Jesús Iglesias, coordinador d'IX n'Asturies, diz que la oficialidá tien moos de ser y puen discutise. Home, ye gracioso que dalguién que ta nel poder diga lo qu'ún, como yo, puea pensar. Y digo que ye gracioso porque cuando ún aconceya con otres fuercies polítiques p'aldericar sobre un tema y sacar daqué bono, ún de primeres lo que tien de facer ye nun amosar toles sos cartes, ye dicir, pidir lo máximo pa dir catando cómo van les demás propuestes. Si yá dende l'entamu falamos de concesiones, mal camín. Ta perclaro que ún tien que pidir 10 anque-y valga 6. Lo malo ye que ún pida 6 porque entós-y van dar 4. Pa exemplu ta ehí l'estatutu catalán. Mal camín pa la oficialidá si yá entatamos a dar concesiones enantes del alderique.
Canal Blogs sigue equí l'actualidá de la blogsfera n'asturianu
Esbilla portal d'enllaces a noticies unviaes polos internautes
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
