Llugar bien amañosu pa la reflexón surrealista
07/03/2008
[Espublizao por min na Uiquipedia embaxo l'artículu Aristóteles]
Crítica a la teoría platónica
Aristóteles critica’l calter separtáu de les idees respeuto al mundu sensible (de los sentíos). Mentanto’l so maestru, Platón, afirmaba la esistencia de dos mundos dixebraos (el mundu corpóreu y el mundu de les idees), él sostenía que les idees (qu’él llamaría formes) taben mezclaes colo sensible (materia y forma facíen un conxuntu xuníu). Esta renuncia al mundu separtáu de les esencies paez que yera debío a que so pa yera médicu y lu influenciare nes disciplines de ciencies positives, rellacionaes cola esperimentación. Asina ye lóxico la so tendencia a mirar más pal mundu natural, físicu, qu’a un mundu non esperimentable polos sentíos.
El so llibru más importante ye’l de la Metafísica onde espón les principales idees sobre lo que ye l’ente en cuanto ente y esmolezse na búsqueda de les causes primeres. El nome que-y punxo, metafísica, significa en griego más allá de la fisica. La ferramienta pa conocer ye la lóxica, siendo l’argumentu lóxicu más importante pa esi fin el siloxismu.
La teoría de la potencia y l’actu
Ún de los esmolecimientos d’Aristóteles yera’l d’aldovinar l’orixe y una explicación al movimiento. Pensaba él que si daqué camuda ye porque pasa d’un estáu a otru y asina llega a postular la diferencia ente ser daqué agora, a lo que llama «ser n’actu» y el poder llegar ser daqué nun futuru, «ser en potencia». Ye dicir, una semiente ye una semiente n’actu, pero ye un árbol en potencia. D’esti mou, el movimiento ocurre cuando daqué pasa de ser n’actu a ser en potencia.
Tou ente corporeu ta compuestu de dos principios sustanciales estremaos, la materia y la forma. Siguiendo la teoría de ser en potencia y n’actu, Aristóteles afirma que la materia (la cosa física, l’oxetu corporeu) ta en potencia pa ser daqué, pero la forma que recibe esa materia, esi oxetu, ye ser n’actu. Ye dicir, un vasu ta formáu pola materia (el cristal) y pola forma (forma cilíndrica). La materia primo o primero ye la mínima sustancia necesario pal cambéu y la forma que recibe col cambéu denomínase forma sustancial. La materia segundo ye una sustancia susceptible de modificaciones accidentales (ye dicir, que nun son necesaries pa que daqué siga siendo daqué), y en casu talu recibiría formes accidentales.
Asina, Aristóteles creyó resolver el problema del movimientu: el pasu del ente en potencia al ente n’actu.
La teoría de les causes
Aristóteles fala de cuatro tipos de causes, dividíos en 2 grupos:
- Causes intrínseques: Causa Material (responde a qué) y Causa Formal (responde a cómo).
- Causes extrínseques: Causa Eficiente (responde a por qué) y Causa Final o teleolóxica (responde para qué).
Un exemplu pa entender esto ye pensar por exemplu na estatua de David de Miguel Ánxel. La causa material sería’l mármol. La causa formal sería la forma humana. La causa eficiente sería l’autor de la obra, quien la fizo, Miguel Ánxel. La causa final o teleolóxica sería pa dar prestixu o embellecer. P’Aristóteles la causa final ye una de les más importantes, porque pa él too tenía un fin, el mundu, el cosmos, seguía una trayectoria hacia un fin o meyor dicho, taba siendo atrayío hacia un fin.
El Dios aristotélicu
Aristóteles afirma la eternidá del movimiento nel cosmos pero tamién afirma la esistencia del primer motor, que ye la causa del movimientu eternu del cosmos. En xeneral, razona él que tolo que se mueve ye movío por otro, ye dicir, hai un motor que lo mueve. Aristóteles nun almite una esplicación circular (nun explica nada pensar que l’últimu motor mueve de nuevo al primeru) nin tampoco almite una esplicación en cadena infinita de motores (tampoco explica pensar qu’hai infinitos motores). Llega a concebir el primer motor inmóvil (motor porque mueve, pero inmóvil porque si ye l’últimu motor nun pue haber otru motor que lu mueva) como causa final. Acaba afirmando que la causa final atrái tol cosmos hacia él, comunicando asina’l movimientu («ye oxetu d’amor o de deséu»). Esti primer motor, causa final, ta claramente separtáu del cosmos, ye actu puru (carece de potencies porque nun ye móvil), autosuficiente, inmaterial, polo tanto, ye’l Dios particular d’Aristóteles, pa nada hai que pensar que s’asemeya al Dios cristianu.
Conocimientu y ciencia
La Metafísica ye una ciencia que trata l’ente en xeneral, l’ente en tanto que ye ente. Y según esti análisis, el ser pue ser entendío de dellos moos, estableciendo les categorías de sustancia y accidentes. La sustancia ye lo necesario que tien de tener daqué pa ser daqué. Los accidentes son les cuestiones circunstanciales que tan al rodiu l’ente pero que son prescindibles pa que daqué seya daqué (la sustancia d’un vasu ye’l cristal del que ta fechu, y que seya grande o pequeñu ye accidental, porque eso nun va condicionar que seya o dexe de ser un vasu)
La lóxica estudia les delles formes válides d’argumentar y construir xuicios colos conceptos que designen al ser y les sos categorías. La lóxica aristotélica básase nel principiu de non contradicción y toma como cadarma básica del razonamiento correutu la del siloxismu (tres premises la última de les cuales, llamada conclusión, síguese de les dos primeres).
No que cinca al conocimiento, Aristóteles defende qu’el conocimiento entama polo sensible (asina damos cola sustancia y colos accidentes), ye dicir, afala l'empirismu como aniciu del conocimientu. Y depués, mediante la nuestra razón vamos superando’l nivel de conocimientu animal y astraemos (facemos astraiciones). Per últimu, emitimos xuicios aplicando les categorías a los conceutos astrautos.
Ética
P’Aristóteles, el fin supremu de toa actividá humana ye la felicidá (Eudemonismu). Afirma qu’el bien y el fin del ser humano ha de ser daqué práutico y realizable. Si lo carauterístico del ser humano ye poseer alma racional y perfeccionala, la felicidá ha d’atopase na vida racional mesma. A la escontra de Platón, la vida racional nun ye namás teórica, sinón tamién práutica, poro hai dos tipos de virtúes. Virtúes intelectives (les teóriques) como la prudencia, y virtúes étiques (práutiques).
La política
De forma paecida a Platón la política d’Aristóteles subordínase a la ética. Al definir al ser humano como animal político o social conclúi qu’el bien supremu o la felicidá namás pue algamase dientro d’una sociedá que tenga como fin el bien común. Aristóteles reconoz tres tipos d’Estáu o organizaciones de la polis: monarquía, aristocracia y democracia. Lo que caracteriza a la democracia ye que tolos ciudadanos participen del poder y tienen los mesmos drechos. L’aristocracia amenorga la participación y los drechos a una minoría y la monarquía a ún solu. P’Aristóteles el réxime por escelencia ye la democracia, pero los otros dos son tamién legítimos mentanto tengan como fin el bien común. Almite que toa forma de gobiernu pue dexenerar hacia la inxusticia, cuando s’abandona l’ideal de bien común.
06/03/2008
[Espublizao por min na Uiquipedia embaxo l'artículu Platón]
El doble rechazu
Platón fizo filosofía, a la escontra de los presocráticos y a la escontra de los sofistes. Per un llau, nun taba conforme cola esplicación presocrática del cosmos que basaba'l so razonamientu en proponer un elementu físicu como'l aniciu y razón del mundu. Per otru llau tampoco aceutaba la esplicación sofista polo que tenía de variable. Los sofistes nun reconocíen una verdá, sinón que podría dicise que los sos razonamientos yeren relativistes dafechu, ensin reconocer una única verdá. Poro, Platón establez qu'hai otru mundu más allá del físicu, del sensible, y tamién qu'hai una verdá única a la que paga la pena averase. La motivación inicial de la so filosofía foi fundamentalmente política y moral y pensaba que namás pola esistencia de lo xusto en sí (idea de lo que ye xusto) son posibles actos xustos. L’estudiu d’esti fundamentu empobinará la so teoría de les idees.
Teoría de les Idees
Les idees nun pertenecen al mundu que vemos, ye dicir al sensible, sinón qu'hai otru mundu ideal (de les idees) onde habiten les idees. Toles coses d'esti mundu material y corruptible nel que nos movemos imiten lo que les idees son nel mundu de les idees. Polo tanto, la esencia de les coses ta nes Idees, si daqué ye daqué, yelo porque s'asemeya a la idea de daqué. Pue dicise qu'el mundu sensible tien realidá en tanto que participa del mundu de les Idees (hai dos mundos: el de lo sensible y el de les idees). Cuanto más participa una cosa del nuestru mundu de la una idea, más perfeuta ye.
Epistemoloxía
Platón básase na Mayéutica: conocer ye recordar (y amúesalo col exemplu del esclavu, onde namás faciéndo-y entrugues consigue que l’esclavo pescancie conocimientos matemáticos). La nuestra alma inmortal, preesistente al cuerpu y yá que vivió nel mundu de les idees pue recordar un conocimientu que yá poseía. Nesti procesu de conocimientu Platón distingue dellos graos de conocimientu:
- la doxa (opinión), qu’inclúi la eikasía (imaxinación) y la pístis (creencia).
- la episteme (ciencia), qu’inclúi la diánoia y la nóesis (conocimientu discursivu y razón).
Pa esplicar estos graos de conocimientu utiliza la conocida metáfora de la llínia y el mitu de la caverna (nesti últimu casu fala del progressus o salida de la caverna y regressus o vuelta a la caverna; cola salida el individu algama’l conocimientu más verdaderu al llegar al mundu les idees y cola vuelta regresa al mundu sensible).
Teoría política: La República
En La República trata d’algamar la xusticia: una armonía ente l’orden del cosmos, el de la ciudá y el del alma. Ye importante la distinción alma y cuerpu: l’alma ye inmortal y espiritual y participa de la naturaleza de les idees; el cuerpu ye material y pue corrompese, la muerte del ser humano ye namás la destruición del cuerpu. L’alma tendrá una eterna tresmigración nos cuerpos (reencarnación).
La ética empobínase hacia la conquista del bien supremo que ye la felicidá. A les tres funciones del alma correspuénden-yos tres virtúes:
1- Al alma racional: la sabiduría o prudencia.
2- Al alma irascible: la fortaleza.
3- Al alma apetitiva: la templanza.
Xunto a estes virtúes ta la xusticia que sintetiza (o axunta) les tres virtúes.
La perfección namás s’algama en sociedá. L’Estáu ye l’únicu capaz de garantizar la xusticia. La sociedá ha d’estructurase en tres clases de ciudadanos: gobernantes (filósofos), guerreros y campesinos, nes que predominen respeutivamente caún de los tres tipos d’alma. Y de la mesma manera qu’un alma ye xusta cuando les sos tres partes tán n’armonía, tamién nel Estáu apaez la xusticia como armonía de les tres virtúes (sabiduría o prudencia, fortaleza y templanza). Pa evitar la tentación de favorecer a los amigos o a ún mesmu, les dos clases superiores nun han de tener drechu a propiedaes privaes, nin tampoco a formar una familia estable. D’esta manera, trátase de que vivan comunitariamente y que los sos fíos seyan consideraos toos como si caún de los proxenitores fuera so padre. La familia, el matrimoniu monogámicu y la propiedá privada namás habrían de ser accesibles pa los artesanos o trabayadores, quien, debío al so menor desendolcu intelectual, motívanse solamente por incentivos materiales, talos como aumentar les sos riqueces o’l so bienestar material.
P’acceder a la condición de guardián (guerreru) Platón establez una dura educación, y namás los que superen estes dures pruebes podrán ascender a esta condición. Al mesmu tiempu, d’ente los meyores guardianes, y depués d’otra dura y elevada educación, especialmente basada nel estudiu de les matemátiques y de la dialéutica, seleicionaránse los gobernantes filósofos. Trátase, asina, d’un réxime políticu altamente elitista, anque los gobernantes nun son seleicionaos en función del so orixe social o de la so posición económica, sinón per aciu de los sos méritos y capacidaes. Ye un elitismu intelectual el que defende Platón. Arriendes d’ello, tamién prevé la necesidá d’una política de seleición euxenésica, especialmente ente los guardianes, pa favorecer un procesu d’ameyoramientu de los ciudadanos. Per otra parte, los gobernantes tienen el drechu a exercer una descomanada censura en toles artes, na lliteratura, el teatru y nos conteníos de la enseñanza yá que, siendo ellos los poseedores del conocimientu, son los únicos que puen saber qué ye lo adecuao y qué ye lo perxudicial pa la coleutividá. N’especial, el gobernante habrá d’impedir la lliteratura o’l teatru que ridiculice a los dioses y, más entovía, curiar de les enseñances que reciben los neños, pues ye na infancia onde s’alquieren los peores vicios y se descarríen los futuros ciudadanos.
En cualquier casu, Platón nun introduz diferencies ente homes y muyeres: los dos sexos han de tener los mesmos drechos y recibir la mesma educación. Sicasí, Platón como tolos griegos, taba convencíu de que too cuanto naz (y la polis nun ye una excepción) ta sometío a dexeneración. Por ello, prevé les estremaes etapes de dexeneración que pue sufrir una comunidá humana, y describe les cinco formes de gobiernu que, de manera procesual, exemplifiquen dicha dexeneración. Asíina, pa él, la forma ideal de gobiernu ye la monarquía entendida nel so significáu lliteral: el gobiernu d’una persona, el más capaz (nun ye una monarquía hereditaria polos méritos de la sangre, sinón el gobiernu del meyor). Si son dellos ente los meyores (aristos) los que gobiernan, denomínase aristocracia (nuevamente nun nel sentíu del gobiernu d’una casta social, sinón de los meyores y más preparaos intelectualmente). La dexeneración d’esta forma de gobiernu ye la timocracia, o gobiernu rexíu pol honor más que pol conocimientu, que pue dexenerar na oligarquía (gobiernu d’unos pocos) rexida pol afán de riqueza. Cuanta más importancia se da a la riqueza menos se da a la virtú, diz Platón. Esta situación xenera probitú y aumenta les diferencies sociales, lo que enxendra la democracia, el triunfu de los probes sobre los ricos que conduz a una inevitable crisis de l’autoridá y a la demagoxa (foi un réxime democráticu’l que condenó a muerte a Sócrates). Pero l’escesu de llibertá y de pautes fijxes y racionales de conducta empobina a un camín d’escesu de servidume y desorden que da llugar a l’apaición de la tiranía, la más detestable de les formes de gobiernu y verdadera caricatura del gobiernu xustu que, según Platón, ye la monarquía.
27/12/2007
Güei cumple años esti requexu p'amontonar pallabres. A pocos díes d'un añu menos de que nos coma la mierda que tiramos pel mundu, sigo con esti enfotu na llingua.
N'entamando l'añu, pondre-y lema a esti espaciu, llendando la temática sobre ún de los pocos temes que me ronden pela tiesta. Mientres que decido y non, les lluces de la ciudá acueyen la vergüenza y el servilismu. Un home diz verdaes en prensa que terminarán como'l papel de regalu, escaecíes pela basura de dalgún contenedor.
Y depués la rutina, l'aborregamientu dende'l capital. Y esti llugarín cumpliendo años.
10/12/2007
Si daqué quedó claro na última (y primera) xunta de blogueros y blogueres en llingua asturiana ye que, como camentaba'l blogueru de Pingarates, la mayoría de los blogs n'asturianu tienden a ser rellectures de les noticies en prensa. Lo que vien a significar que más o menos toos y toes falamos de lo mesmo.
Ye cierto qu'hai blogs qu'entamen a tar especialiazos o a monotematizase, y esto ha de ser bono pa la llingua asturiana y la blogsfera n'asturianu en xeneral. Dende qu'apaeciere Esbilla.net creo que yá hai un llugar afayadizu pa enllazar noticies de prensa (dixital) y llueu comentales, anque de momentu tea entovía arrancando'l proyeutu. Poro, voi ver si atopo un tema al que dedicar esti modestu llugarín pa diversificar la blogsfera.
Tuve faciendo dalgunos cambeos estéticos al blog pa dir preparándome y espero que pal día 27 d'avientu tenga decidío en qué asuntu concretu voi gastar equí les pallabres. Será entós, cuando'l lema que carauterizó esti blog (llugar bien amañosu pa la reflexón y la crítica en llingua asturiana) camude un poquiñín pa que'l llector fortuitu (pocos más voi tener, sélo) tenga un poco claro onde cayó.
Y si dalguién s'entrugó por qué'l 27 d'avientu ye l'escoyíu pal renacimientu de La esfoyaza y non otru día, comenta-y qu'esi día cumplirá dos añinos la criatura. Yá veis lo grande que ta yá.
07/12/2007
Magar vengan los años llueu con razones,
con mentires aduces repitíes,
quiero dexar constancia y dexo
que te quixi, que'l mio oficiu yes tu,
el d'aprendete,
y depués, si'l tiempu nos atrapa
nel agua tramposo de la vida,
volver enquivocanos pa siguir xuntos
como agora,
porque l'arte de ser nuevos ye siempre
privilexu d'unos pocos.
Esti ye un poema de Berta Piñán (pa min de los meyores escritos por ella) asoleyáu nel so poemariu Vida Privada (premiu «Teodoro Cuesta» de poesía nel añu 1991). Como en tolos poemes, nun esiste la interpretación correuta. Caún y caúna pue echar lluz sobre ellos dependiendo de les sos propies vivencies magar nun los escribiera. El poema dexa de ser del autor/a p'amoldase a caún de los llectores. Namás asina la poesía trespasa la muerte pa ser eterno. Si me gusta un poema nun ye porque fala del poeta, ye porque fala de min y nél amiya parte de quien soi. Asina, el poeta fala de lo que nos pasa a tolos llectores. Anque nun lo sepa.
Ehí va una interpretación más d'esti poema de Berta. ¿Y si en cuentes d'un amor hacia una persona, como se tendría avezao a pensar nuna primera llectura llixera, tuviera falando d'un amor a una llingua tan cayonca como aquella na que ta escrito esto? Volvéi a lleer agora'l poema pensando nello. ¿Verdá qu'esta manera d'entender el poema tamién encaxa?
05/12/2007
Quién ye a aldovinar en qué billete d'autobús, de los dos qu'amueso darréu, ta imponiéndose una llingua.
01/12/2007
Blog de Ricardo Candás
Llugar bien amañosu pa la reflexón sobre la ciencia en llingua asturiana
Dende esti llugarín sigo encamentándo-y a l'ALlA la incorporación de nueves pallabres o l'ampliación de significaos de vocablos yá esistentes, acordies too ello a los tiempos nos que vivimos. Equí va la mio tercera propuesta:
Glorificar: 1. tr. Facer glorioso daqué o a dalguién que nun lo yera. 2. tr. Reconocer y afalagar a quien ye gloriosu. 3. tr. Facer oficial daqué que lo merez, especialmente una llingua (Diz Javier Fernández que preservar l'asturianu ta bien, pero glorificalo non).
Pa consultar les propuestes anteriores calcái equí y equí.
21/11/2007
Nun pueo callame. Y quiciás estes lletres nun valgan un res y acaben perdíes pente la rede, al debalu ente la banda ancho y la febra óptico. El casu ye que, pensé, esto tien de sabese. Y ye que, cuanto menos, merez esponese esti asuntu al ágora pública, pal alderique social, tan granible que dicen que ye dalgunos. Porque eso ye una virtú democrática, poder opinar llibremente sobre un tema y meyor entá, camiento, si se ta bien informáu.
Y equí vien lo vergoñoso. Na editorial Anaya, nel llibru de Relixón católica pa escolinos de Primaria (quintu cursu) atopamos un tema tituláu «La democracia» (tema 14). Cuála nun sería la mio sorpresa cuando veo lo que va darréu nesi tema (páxina 117):
Decatáivos no que señalo n'azul. Pa entamar dicir que tamos falando d'escolinos. Pues a eses edaes, yá-yos tan faciendo creer que la «verdadera democracia» ye aquella que defiende la relixón crisitina. ¿Cómo podemos facer esta mecigaya de coses bien estremaes?, ¿cómo pue permitise que la Ilesia pretenda adoctrinar/manipular la conciencia de los escolinos? Pa qu'esista una verdadera democracia nun hai que votar a los que defendan valores cristianos, sinón que basta votar. Lo que ta faciendo la Ilesia ye pretender empobinar el votu, ye despreciar al restu de la sociedá que nun comparte los sos presupuestos de fe. Y cuando falen de qu'hai que votar a los que defiendan a la familia ¿qué ye eso?, ¿acaso una muyer que decide tener un fíu y crialu ella sola nun ye una familia?, ¿una pareya d'homosexuales nun ye una familia?. Tán, otra vuelta, confundiendo coses. Hai delles formes d'entender la familia. Pensar que la so forma d'entendela ye la correuta pueo entendelo, pero de pensalo a imponelo hai un camín enforma llargu. Esta estratexa del llaváu de cerebru a tán temprana edá, bien val una denuncia (¿nun yera la Iglesia y la drecha española la que criticaben asignatures como «Educación pa la convivencia» por incitación ideolóxica?)
Lo que nun se pue permitir ye que na educación obligatoria a escolinos se quiera identificar la democracia col fechu de votar a partíos pro-cristianos. Sostener eso ye una autentica farsa y un menospreciu al bon xacíu nun Estáu español que, azorrando y mirando pa otru llau, caltién nel so artículu 16, párrafu terceru, de la Constitución: ninguna confesión tendrá carácter estatal. Asina la cuestión, nun critico la creencia relixosa nin el so enseñu (acordies cola llibertá de relixón qu'establez la Constitución), sinón l'adoctrinamientu políticu que se produz nes aules y la errónea y canceríxena definición del conceptu de democracia que se fai nelles. Na educación habría d'enseñase a tener capacidá crítica, a decidir por ún mesmu llegáu'l momentu qué hai que votar (y non que te dean el votu yá escoyíu), daqué que viendo lo visto (y viendo los políticos que salen escoyíos n'Asturies elleiciones tres elleiciones) ta seriamente en dulda. Una democracia ta sana cuando hai capacidá critica ente la sociedá votante. L'aborregamientu ye bono namás que pa una élite minoritaria que s'aprovecha de nosotros.
15/11/2007
26/10/2007
Nun comparto los oxetivos de la fundación «Príncipe de Asturias», poro, nun pueo tar d'acuerdu col so trabayu empobináu a algamalos. Sorprendióme que Saramago, intelectual d'izquierdes tan comprometíu col pueblu, participara nun premiu que tien como ún de los sos oxetivos facer apoloxía de la institución monárquica. Tampoco me presta un res que presumiendo de ser una institución fondamente asturiana y caltener ente los sos oxetivos l'apoyar (sic) «...la búsqueda del bienestar social y cultural de los asturianos...» desprecie esi bien cultural asturianu nomáu llingua asturiana. Y sorprende entá más viendo cómo entrando na so páxina web atopamos deferencies a llingües tan estremaes como'l polacu, rusu o xaponés. Polo visto, l'alfabetu cirílicu o los idiogrames asiáticos ufren pa los güeyos asturianos más lluz y bienestar que l'asturianu. Que'l detalle ye mínimu, irrisoriu, pero diz muncho.
Pero nun quiero falar de la fundación, sinón de dalgún de los sos premiaos. Nun tolero qu'Al Gore venga a danos llecciones de moralidá. Nun lo soporto. Dalguién habría dici-y a esti estaoxunidense que La Tierra nun ye redonda, porque pensar que ye redonda, ye da-yos la razón a los que pensaben que yera plana (un platu redondu). La Tierra, pol so calter tridimensional, ye cuanto menos esférica. Nun permito qu'esti señor, venga a Asturies a falar ex catedra, cuando ye nel so país onde se ta cuestionando la teoría evolutiva y enseñándose nes escueles (ye dicir, col sofitu alministrativu) el creacionismu como una teoría esplicativa d'esti mundu que nos tocó vivir.
Creo que la fundación, magar nunca la sofité, ta anguaño cayendo nun esteticismu populista poco entendible. Ta dexándose influenciar pola publicidá más xabaz. Y ye la última vez que falo d'estos premios, porque tolos años a estes altures me fierve la sangre con dalguna concesión a esti neolliberalismu pro-estaoxunidense y toi hasta los mesmos tolanos de que se faiga en mio casa, delantre les mios mesmes ñaples.
Canal Blogs sigue equí l'actualidá de la blogsfera n'asturianu
Esbilla portal d'enllaces a noticies unviaes polos internautes
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
