POR UNA UNIVERSIDÁ DAVERES ASTURIANA
29/11/2009
LES NOTICIES
Fecha: 28/11/2009 a les 16:45:00
«Tuvieron que pasar 122 años pa que vuelvan a axuntase los nomes de Xosé Caveda y Nava y el rector de la Universidá d’Uviéu». José Suárez Arias-Cachero, conceyal de Cultura de la capital asturiana, resumía con estes palabres el sentir colectivu nun actu onde la Fundación que lleva’l nome del illustráu asturianista fixo patronu d’honor a Vicente Gotor, l’actual máximu responsable de la institución académica, y que se celebró en Villaviciosa depués de la tradicional ofrenda floral énte la casa natal de Caveda ?al pie del teatru Riera y a unos pasos de la ilesia románica de Santa María de la Oliva?, qu’esti añu tuvo tamién muncho d’homenaxe a Nené Losada Rico con una llectura de poemes a cargu de Ramón d’Andrés y Taresa Lorences.
Les palabres d’Arias-Cachero nun taben diches al Albur. Nos tiempos nos que Fermín Canella yera rector de la institución uvieína, encargó que se reeditara la esbilla poética qu’ellaborara Caveda unos cincuenta años enantes pa dar lluz d’esa manera a la que foi la primer publicación en llingua asturiana. Y tanto ún como otru yeren, según dixo en Villaviciosa Inaciu Iglesias, presidente de la Fundación, «illustraos y asturianistes, porque la Illustración y l’asturianismu siempre foron de la mano».
Énte un aforu abarrotáu, José Suárez Arias-Cacherio dio-y la bienvenida a Gotor ?depués de tresmitir a los presentes el saludu d’Enrique Castro Quini, que nun pudo tar presente nel actu? y felicitólu por entrar a formar parte d’una fundación que lleva’l nome d’un «illustráu, modernizador y lliberal» como Caveda y Nava y pola so «manera de ser abierta al mundu», amás ?y esto yera lo más importante? de pola so actitú pa cola llingua asturiana, que «dende los tiempos de Canella nunca tuvo un rector que se preocupara tanto con ella, y eso que non toos yeren precisamente de Calatayud», añadió en referencia al orixe aragonés de Gotor, que s’instaló n’Uviéu n’ochobre de 1977, hai agora 32 años. Arias-Cachero quixo facer un repás pelos méritos del rector na so triple dimensión de «científicu, rector y ciudadanu» enantes de llanzar dalgún ataqué más o menos soterráu a la política llingüística del Gobiernu y a rematar la cosa concluyendo que «la nuestra ye una sociedá onde lo que pasa nun importa, y lo qu’importa nun paso».
Precisamente, la siguiente en facer usu del turnu de palabra foi Consuelo Vega, directora xeneral de Política Llingüística, que foi muncho más breve y namás quixo limitase a da-y la norabona al rector y a agradece-y «l’apertura de rexistros al asturianu dientro de la Universidá y la regulación de los estudios del idioma del país». Gotor, pela so parte, reconoció ?tres esclariar que depués de trenta y dos años viviendo n’Asturies siéntese «totalmente identificáu con esti territoriu»? qu’al recibir la noticia del nombramientu sintiérase mui agradecíu, anque tamién «abrumáu pola responsabilidá de tar al altor de les circunstancies». El rector ?que lleó’l so discursu n’asturianu? dixo que los méritos qu’él tenía pa ser patronu d’honor de la Caveda y Nava yeren «menos de los que representa esta distinción», y fixo un balance pelos dieciocho primeros meses del so mandatu (empezando pol encierru de los miembros de la Xunta pola Defensa de la Llingua nel claustru del Edificiu Históricu de la Universidá esixendo la implantación de los estudios d’asturianu dientro de la Facultá de Filoloxía) pa dicir qu’a la fin pudo demostrar el so compromisu cola llingua «siempre dientro del marcu llegal de que disponemos». «Préstame cumplir colo que prometo», dixo, «y el mio compromisu col idioma asturianu yera dalgo que yá taba reflexao nel mio programa electoral».
Inaciu Iglesias, presidente de la Fundación, vinculó al asturianismu cola Illustración, colos nombres de Xovellanos y Caveda y Nava por bandera, pa dicir que «los illustraos defendíen l’asturianu precisamente porque defendían la cultura universal», y quixo dexar claro que «nun va ser el parllamentu asturianu’l que traiga la normalización; tenemos que ser nós los que llevemos la normalización al parllamentu asturianu». Dalgo que, según les sos palabres, parez tar cada vez más cerca. «La lluz del conocimientu», concluyó, «ta acabando pasu ente pasu cola escuridá de los prexuicios».
Licencia:Libre Licencia de documentación Libre (Inglés)
Visita la páxina web de la Universidá ¡agora n'asturianu!
Trabaya con nós pol asturianu, escríbenos a conceyuasturianu@gmail.com
Consulta equí'l programa de trabayu del CUPA.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
