POR UNA UNIVERSIDÁ DAVERES ASTURIANA
15/12/2009
15 d’avientu de 2009
Sr. Rector, srs. Vicerrectores, srs. Claustrales:
Conceyu Universitariu pol Asturianu (CUPA)
El Conceyu Universitariu pol Asturianu apoyó a Vicente Gotor, Rector de la Universidá d’Uviéu, na campaña electoral y dende entós reconocemos los pasos daos na institución a favor del asturianu nel primer añu y mediu de mandatu, principalmente los siguientes:
-Usu del asturianu per parte del Rector en dellos actos.
-Impulsu de les enseñances d’asturianu en Filoloxía y Maxisteriu, per primer vez na hestoria oficiales.
-Creación d’un Reglamentu d’Usu del asturianu nel Rexistru de la Universidá, qu’anque insuficiente supón un avance.
El CUPA, qu’apoyó la campaña de Gotor y trabaya col equipu rectoral nestos avances, entiende’l que’l principal llogru ye’l cambiu d’actitú de la dirección de la Universidá d’Uviéu, que yá nun vive d’espaldes a la llingua asturiana, sinón qu’entiende la so normalización como parte del so trabayu.
El Rector y el so equipu abieron importantes espectatives y el Conceyu Universitariu pol Asturianu entiende amás, qu’agora ye’l momentu d’acelerar estes polítiques llingüístiques na Universidá, con nueves midíes que sirvan pa normalizar l’asturianu na Institución.
Sabemos que se trabaya nesos pasos, pero l’equipu rectoral nun pue dexar esi llabor pa muncho más alantre.
Pero esta cuestión nun pue quedar namás en manes del equipu rectoral, tien que participar tola comunidá universitaria, faciendo pola normalización del asturianu: Conseyu d’Estudiantes, Facultaes y Escueles, PAS, Defensor Universitariu…
Volvemos a reiterar el nuesu apoyu en toles iniciatives que supongan avances pa la llingua asturiana dientro de la Universidá asturiana y convidamos a tolos miembros del Claustru a trabayar na mesma dirección, con una collaboración crítica pero lleal, el consensu ye imprescindible nesta cuestión.
La nuesa norabona al equipu rectoral, con esos “peros”, y cola confianza de que van saber cumplir con too aquello a lo que se comprometieron cola comunidá universitaria.
Inaciu Galán y González, miembro del Claustru, voceru de los representantes del CUPA nel Claustru.
Respuesta del Rector Vicente Gotor:
“Desde el Rectorado no estamos en contra del asturiano, todo lo contrario, estamos demostrando estar a favor”
“Hemos hecho cosas y vamos a seguir, paso a paso, avanzando”
“Se está preparando una Comisión pa la Normalización Llingüística en la Universidad, en la que trabaja con tesón la Secretaría de mi equipo”.
“Nosotros actuarémos siempre dentro de la legalidad”
“Corresponde al Gobierno de Asturies, y no a nosotros oficializar el asturiano”
10/03/2009
[Artículu firmáu, por Ramón d'Andrés a comuña con Álvaro Arias-Cachero Cabal, Taresa Fernández Loreces, Roberto González-Quevedo González y Xulio Viejo Fernández]
(Profesores de Llingua Asturiana)
Como profesores universitarios de Llingua Asturiana, qu'impartimos docencia d'esa materia na Facultá de Filoloxía y na Escuela Universitaria de Maxisteriu, nun podemos dexar d'espresar la nuestra esmolición ante la posibilidá de que l'Asturianu quede escluíu de les nueves titulaciones de Maestru. N'efectu, nestos momentos decisivos nun sería a entendese que la Llingua Asturiana quedare al marxe, por variaes razones:
―La enseñanza de la Llingua Asturiana na Educación Primaria ye una realidá irretrucable desque s'implantó oficialmente y con calter voluntariu nel cursu 1984-85, y con ufierta xeneralizada en tolos centros dende l'añu 1997. Los alumnos escueyen esta materia en proporciones que superen siempre'l cincuenta por cientu, y de va venticinco años son munchos los maestros y maestres que se dediquen a esta enseñanza.
―Esta docencia, lóxicamente, precisa d'enseñantes preparaos con traza, y esta preparación tien que ser competencia de le Escuela Universitaria de Maxisteriu. La propuesta de que l'Asturianu entre na enseñanza reglada de Maxisteriu ye bien razonable, dando asina fin a la provisionalidá que supón sofitar esta formación nos estudios non reglaos vixentes na actualidá.
―El Departamentu de Filoloxía Española, del que dependen les enseñances de Llingua Asturiana na Universidá d'Uviéu, pronuncióse por unanimidá a favor d'implantar una Mención d'Asturianu (30 creitos) nel futuru títulu d'Educación Primaria. Esa propuesta, unviada a la Escuela de Maxisteriu pol Director del Departamentu, diz lliteralmente: «Mención en Lengua Asturiana. Se propone la inclusión de una mención de Lengua Asturiana. Dicha mención se ve reforzada por el hecho de que la Orden ministerial plantea como objetivos de los estudiantes de Magisterio "Abordar con eficacia situaciones de aprendizaje de lenguas en contextos multiculturales y plurilingües". La Orden además dentro del "Bloque de Contenidos Didácticos y Disciplinares" plantea
que los estudiantes adquieran las competencias de "Conocer el currículo escolar de las lenguas y la literatura y afrontar situaciones de aprendizaje de lenguas en contextos multilingües". Dicha mención sería, pues, la que capacitaría al profesorado de Lengua Asturiana en Educación Primaria».
―Nun hai qu'escaecer que la Escuela de Maxisteriu foi, dientro la Universidá d'Uviéu, el centru pioneru na implantación d'enseñances oficiales de Llingua Asturiana. Dende'l cursu 1985-86, de magar s'implantó la primer asignatura optativa impartida pol profesor D'Andrés, l'asturianu tien tenío una presencia continuada na ufierta d'optatives del centru.
―En resultes, paeznos inconcebible que, como resultáu del actual procesu d'anovación docente y pedagóxica, la Escuela de Maxisteriu escluya dalgún tipu d'enseñanza reglada de Llingua Asturiana, rompiendo asina la so propia tradición y dexando albentestate la formación de los maestros na materia.
Too ello, amás, encartiaría perpoco cola vixente llexislación del Principáu d'Asturies en materia llingüística: Estatutu d'Autonomía d'Asturies nel so artículu 4 y Llei d'Usu y Promoción del Asturianu nel so capítulu III (artículos 9, 10 y 11).
En resultes, compartimos el lóxicu esmolecimientu de profesores y estudiantes, y manifestando'l nuestru respetu a toles opiniones y a la xestión de les autoridaes de la Escuela de Maxisteriu, espresamos el nuestru deséu de que la Mención de Llingua Asturiana s'apruebe en Plan d'Estudios d'esi centru, porque ye l'únicu camín de normalidá posible.
20/11/2008
L’asturianu va tar, gracies a la votación mayoritaria a favor, per primer vegada como materia dafechu oficial na Universidá d’Uviéu
UVIÉU, 20/11/2008
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, quier espresar la so felicitación a la Xunta de Facultá de Filoloxía de la Universidá d’Uviéu pola aprobación de la propuesta del decanu de Filoloxía, José Antonio Martínez de crear un 'mínor' d'asturianu como solución atopada pa que la llingua tea nes enseñances reglaes.
L’aprobación d’esti plan ye, dende'l puntu de vista del CUPA un pasu hestóricu pal asturianu, qu’entra per primer vegada dientro de les enseñances reglaes y oficiales universitaries.
Amás, esti cambiu dexa abierta la posibilidá de que la propia demanda del enseñu d'asturianu na Universidá, convierta'l 'minor' nun 'maior' nun futuru.
Celebramos la decisión de los miembros de la Xunta de Facultá, que por 63 votos a favor, frente a namás 27 en contra, aprobó esti nuevu plan y felicitamos a los miembros d’esta Xunta pola so responsabilidá y consensu a la hora del votu.
Queda tovía’l preste de les instancies estatales, pero confiamos en que l’apoyu del Rector, Vicente Gotor, a esti plan y el consensu xeneráu alredor del mesmu na comunidá educativa y ciéntifica, va facilitar esti preste definitivu.
Ye’l momentu agora de trabayar pol afitamientu d’esti ‘minor’ d’asturianu y aquelles asignatures o cursos que puedan completar la formación del profesoráu d’asturianu na Universidá d’Uviéu.
Dirección del Conceyu Universitariu pol Asturianu
16/11/2008
Xulio Viejo: «Pa empezar, ye razonable'l 'minor'»
14 de payares de 2008
imprimir Su navegador no admite Javascript. Para imprimir pulse Archivo > Imprentar
unviar
Según pudo saber esta redacción, el próximu xueves 20 de payares va celebrase la Xunta de la Facultá na que se va votar, por aciu de la enmienda del profesor Félix Fernández de Castro, si s'acepta o non un «minor» de llingua asturiana. L'equipu de gobiernu de la Facultá, dirixíu pol decanu José Antonio Martínez, vien trabayando dende hai delles selmanes nuna campaña de sensibilización pa llograr el «minor», lo que diba garantizar un encaxe razonable de los estudios de llingua asturiana na Facultá de Filoloxía. Esta opción, otra manera, ye «la «unica viable» al dicir del profesor Xulio Viejo, que va ser l'encargáu de defendela na Xunta del xueves, y que nos adelantra les sos opiniones nesta entrevista.
Defende usté que la opción del «minor» pa los estudios d'asturianu na Facultá de Filoloxía ye nesti momentu la única viable. ¿Por qué?
Por cuestiones puramente administratives, lo único que podemos votar na Xunta de Facultá de la próxima selmana ye «minor» sí o «minor» non. Ayeri [xueves 13 de payares] ciarróse'l plazu pa presentar enmiendes y nun se presentó nenguna en sentíu contrariu. Quiero dicir: nun se presentó nenguna pidiendo un incrementu de docencia. Polo tanto, ta dándose un debate social qu'en bona midida ye irreal. Discútese na cai si'l «minor» ye poco o muncho pero en realidá naide solicitó más.
¿Yera posible solicitar más?
Yera posible solicitar más. De la mesma manera que se presentaron enmiendes contraries, como la de Félix Fernández de Castro y otra que se refugó, yera posible presentar adicionales.
Nesti momentu ye, entós, la única opción viable. ¿Esperen que s'apruebe na Xunta de Facultá?
Como nun soi profeta, nun m'atrevo a dicilo. Yo yá esperaba que saliera la propuesta que presentara l'anterior decana, Ana Cano; depués del achaplón que llevamos daquella, la verdá ye que nun m'atrevo a xinglar nada. Racionalizándolo, supongo que sí. Trátase d'una propuesta más rebaxada y, polo tanto, supónse que suscita más consensu. Tradicionalmente los posicionamientos de la Facultá veníen siendo positivos. Seique se va aprobar, anque esto nun quita la incertidume. Bona parte de la incertudume vienme porque hai un ciertu públicu dientro de la facultá, que tradicionalmente yera neutru con estos temes, inclusive receptivu, que votaba a favor de les nuestres propuestes, y qu'agora da unos síntomes de cansanciu y de fastidiu. Ve l'asturianu como dalgo que básicamente trai problemes y divisiones. Esa ye la situación que provoca la mio incertidume. Polo tanto, ye esi'l grupu de xente a los que nos diriximos, a los qu'informamos. Son moderadamente optimista. Nun quiero ocultar les mios reserves.
La opción del «minor», ¿garantiza la solvencia de los estudios de llingua asturiana?
Evidentemente. El «minor» representa ocho asignatures de les nueves. Les asignatures nueves representen 1.200 hores lectives, lo que ye más del doble del títulu d'especialista actual. Tampoco ye una conversión exacta: bona parte de les hores son de llabor tuteláu... depende cómo xestione cada profesor la so docencia. En principiu representa una carga docente interesante a la hora de tresmitir unos conteníos básicos, qu'amás puen complementase con formaciones de tipu más xeneralista (Hispánica, Románica, los «maior» correspodientes, o de Teoría Llingüística); a partir d'ehí puen establecese tou tipu de comparances, les que se quiera. Con rellación a la propuesta inicial piérdense cuatro asignatures pel camín qu'evidentemente represenaben posibilidaes adicionales; pero si miramos la situación actual, tenemos tres asignatures namás (y disperses, que nun s'estudien en bloque). La meyora yo creo que ye oxetiva y que cabe facer un balance positivu, siempre cola perspectiva de medrar. De lo que nun se trata ye de dicir amén a too. Considero que ye una propuesta razonable.
Una y bones s'apruebe esi «minor», ¿qué posibilidaes hai de dir hacia otros planteamientos más ambiciosos?
A la llarga, too ye posible. Pa empezar, cuando s'aprueben unos planes y se ponen en funcionamientu, éstos tán suxetos a evaluación cada seis años. Según el sentíu d'eses evalaciones, siempre será posible recuperar el «maior» y demás. Tamién hai ora posibilidá d'ampliar docencia que nun depende estrictamente de la estructura de los graos: que la Universidá intruduza nel primer ciclu l'asturianu como llingua moderna. Eso implicaría dos asignatures más. ye dalgo que sigue una tramitación aparte y tien les sos propies dificultaes, pero ye posible. Tamién hai que tener en cuenta que les posibilidaes docentes del asturianu -de cualquier asignatura- nun s'agoten nos graos. Nada quita pa que s'habilite un postgráu pa estudios más especializaos. Por exemplu, nel postgráu pedagóxicu que va sustituir al CAP, podíen intruducise asignatures d'asturianu.
11/11/2008
Artículu en La Nueva España.
Lleer l'artículu completu:
http://www.uniovi.es/prensa/edit_new?show_image=2008-11-11-escanear0004.jpg
04/11/2008
El Rector Vicente Gotor, qu'apocayá se convertía nel primer rector en 400 años qu'echaba un discursu oficial n'asturianu, volvió a facelo esti día nun actu organizáu pola Academia de la Llingua Asturiana na Facultá de Filoloxía de la Universidá d'Uviéu.
Amás recordó que la llingua asturiana "tien que tar nel sistema européu".
26/05/2008
26/05/2008
Uviéu, 25 de mayu de 2008
Mui bones tardes, candidatos y candidates, amigos y amigues que mos acompañáis:
Güei celebramos los 200 años d’una fecha perimportante p’Asturies, d’una fecha que supunxo l’entamu de la hestoria contemporanea d’esti país y que permanez nel olvidu del poder establecíu n’Asturies. El 25 de mayu de 1808 la Xunta Xeneral d’Asturies, declaróse soberana y decidió enfrentase a la invasión francesa pola presión del pueblu asturianu y l’enfotu de dellos dirixentes de la dómina.
Por eso güei equí, nel edificiu onde aconceyó aquella Xunta Xeneral va agora dos sieglos ufrimos estes flores n’homenaxe a les persones qu’entós defendieron a Asturies y tuvieron el valor d’enfrentase a los que queríen suplantar al poder reconocíu pol pueblu asturianu.
Pero nun queremos qu’esta seya una celebración na que se faiga alcordanza d’aquel tiempu ensin más, dexando aquellos importantes fechos estáticos, como daqué disecao pa enseñar nun muséu, NON. L’exemplu del 25 de mayu tien que sirvir güei pa dalgo más, tien que
El 25 de mayu tien que mos recordar qu’un día fuimos un pueblu que quería ser un pueblu, qu’Asturies taba dispuesta a defendese como país a pesar (y escontra) el sucursalismu de la mayor parte de la oligarquía.
El 25 de mayu tien que sirvir pa sacar a la sociedá asturiana d’esti estáu de conformismu na que vive.
Pero sobremanera, el 25 de mayu tien que ser el momentu pa entamar la recuperación del camín que perdimos como pueblu. La sociedá asturiana necesita d’instituciones verdaderamente representatives y enrraigonaes na nuesa tradición hestórica.
La Xunta Xeneral tien que ser una d’elles. Nun pue siguir asturies con un parllamentu que nun s’asemeya a la Xunta Xeneral de 1808 más que nel nome, pues por poner solo un exemplu, nun pue nin siquiera aconceyase de forma autonóma ensin consultar a madrid, dalgo que si podia la vieya xunta.
Nun podemos siguir los asturianos sufriendo unes instituciones que viven dando la espalda asturies, cuando non, atacando directamente a la nuesa identidá, a la nuesa hestoria y a la nuesa llingua.
Por eso tamién, ye bien importante, que la nuesa universidá, qu’esti añu cumple 400 años siendo mui distinta a aquella na que’l rector fermín canella celebró en 1908 los 300 años d’universidá asturiana.
Les cróniques del momentu recuerden como en toos aquellos actos de celebración, en 1908, el pueblu llanu asturianu participaba de los actos de celebración. Les gaites, los testos de los escritores en llingua asturiana, la nuesa gastronomía, too esto yera parte y protagonista d’aquelles ceremonies. Por embargu, los actos entamos pa esti 400 aniversariu bien poco tienen que ver con aquel respetu pol país al que pertenez esta Universidá. Foi en 1908, naquelles celebraciones cuando ente’l pueblu asistente a un actu se sintió a una muyer qu’al altu la lleva dixo: ¡Viva la nuestra universidá!.
Los asturianos tamos deseando poder volver a sentir esi amor por esta institución, pero pa ello munches coses tienen que cambiar n’ella.
Como sabéis, nes pasaes elecciones apoyamos la candidatura del nuevu rector, Vicente Gotor. El compromisu que mos treslladó pa cola llingua y la cultura asturianes dientro de la Universidá d’Uviéu paeznos sinceru. Pero’l nuesu apoyu en nengún casu ye un cheque en blancu. El nuesu apoyu ta condicionáu polos pasos que vayan dándose na política llingüística na Universidá asturiana.
Que nadie nun lo dulde, taremos ehí apoyando y ayudando a que too a esto se lleve alantre, pero tamién taremos ehí pa reclamar que los drechos de los asturfalantes seyan reconocíos na Universidá d’Uviéu y por que los estatutos de la mesma se cumplan. El nuesu programa electoral, un programa ampliu d’oxetivos en política llingüística plantéase como un borrador de lo qu’ha ser un plan de normalización llingüística pa la nuesa universidá na que s’impliquen toles estayes de la insitución col compromisu de facer normal al nuesu idioma milenariu.
Esperando que la oficialidá traiga la defenitiva reconocencia de los drechos de los asturianos, siguiremos trabayando pa que d’equí a un añu podamos dicir xuntos aquello de ¡viva la nuestra universidá! Pa ello, pidímosvos el votu pal Conceyu Universitariu pol Asturianu nes elecciones al Claustru que van celebrase esti martes 29 en toles facultaes y escueles. Con estes persones nel Claustru, el máximu órganu de la Universidá d’Uviéu, tendremos más capacidá de trabayu y l’asturianismu verá reforciada la so presencia na universidá asturiana al travies d’esi frente xunitariu que tamos construyendo desde el CUPA penriba de les estériles lluches de sigles que siempres se dieron y que tantu mal ficeron a la causa asturiana.
Pa rematar, dalgunos de los candidatos al Claustru pol CUPA, van entrargar un ramu de flores delantre de la que foi la sede de la Xunta Xeneral d’Asturies. Suena a la gaita de Xaime Menéndez la marcha procesional de Llanes.
Güei, n’homenaxe a los asturianos que protagonizaron el 25 de mayu de 1808, glayemos xuntos:
¡Puxa’l 25 de mayu! ¡Puxa Asturies!
Agora sintamos l’Himnu d’Asturies .
(suena l’himnu)
Ensin más, gracies pola vuesa asistencia.
19/05/2008
Trabaya con nós pol asturianu, escríbenos a conceyuasturianu@gmail.com
Consulta equí'l programa de trabayu del CUPA.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
