POR UNA UNIVERSIDÁ DAVERES ASTURIANA
10/05/2008
UVIÉU, 10 de mayu de 2008
El 29 de mayu que vien, los miembros de la Universidá d’Uviéu escoyemos a los nuesos representantes nel Claustru, l’órganu cimeru de representación de la Institución, que controla l’actividá del Rector, los cambios nos estatutos y una llarga llista de competencies.
Por ello, dende’l CUPA, queremos pidite’l votu nestes elecciones col envís de que l’asturianismu garre pesu na nuesa universidá y l’asturianu s’afite y esparda’l so usu y enseñu dientro de la Universidá d’Uviéu.
Lluchamos polos drechos de los asturfalantes na Universidá, pola visibilidá y promoción del idioma, porque que se cree la filoloxía asturiana, pol estudiu y difusión de la cultura y la música tradicional asturianes nel ámbitu universitariu…
El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria. Demuéstra-yos que ye asina esti 29 de mayu.
24/04/2008
UVIÉU, 23 d’abril de 2008
El Conceyu Universitariu pol Asturianu (CUPA) quier celebrar públicamente la victoria de Vicente Gotor nes elecciones a Rector de la Universidá d’Uviéu. Una victoria que pa nós ye un síntoma del cambiu de mentalidá na comunidá universitaria asturiana, qu’apuesta por un modelu d’institución que mire p’Asturies y que tenga a la llingua asturiana como l’elementu de gran importancia que ye.
Dende’l CUPA creemos que n’esta contundente victoria de Vicente Gotor tuvo muncho que ver l’apoyu del electoráu asturianista qu’impulsamos dende la nuesa organización y que supunxo un reblagu nel númberu de votos en munches de les facultaes.
Queremos, poro, agradecer l’apoyu d’eses persones que como nós, creen que l’equipu de Gotor ye’l más afayadizu pa la normalización del asturianu dientro de la nuesa Universidá y queremos tamién face-yos saber que collaboraremos pa que n’esta nueva etapa, el Rectoráu faiga les polítiques afayadices pa esa normalización.
D’otra banda, paeznos de xusticia denunciar delles práctiques llevaes a cabu a lo llargo de la xornada previa y na mesma xornada de votaciones de la segunda vuelta d’estes elecciones. Unes práctiques caciquiles que se llevaron alantre dende dellos sectores y que mos paecen más propios d’otros tiempos pasaos, pa nós un indicador de la so escasa cultura democrática
Pa finar queremos recordar y afitar que’l CUPA ye una organización independiente de cualesquier partíu políticu, sindicatu, grupu de presión, etc. que nun rinde cuentes a naide, sacante los sos miembros y que respeta la independencia de toles demás organizaciones. Polo tanto, esiximos la mesma actitú al restu de les organizaciones.
Dirección del Conceyu Universitariu pol Asturianu
20/04/2008
UVIÉU, 20 d'abril de 2007
Dempués d’estudiar los programes y trayectories de los candidatos a Rector de la Universidá d’Uviéu presentes na segunda vuelta, a celebrar esti miércoles 23 d’abril de 2008, dende’l Conceyu Universitariu por Asturianu (CUPA) consideramos manifestar públicamente la nuesa posición respectu a estes elecciones, pues pensamos que la Universidá d’Uviéu ta nun momentu decisivu y hestóricu, énte una oportunidá nueva pa convertirse nuna universidá verdaderamente asturiana, qu’esista por y p’Asturies y los asturianos, abierta a la universalidá, lo qu’entama por asumir y nun despreciar la cultura propia, situando al idioma asturianou como vehículu d’espresión conviviendo n’igualdá col castellán. En definitiva, tamos énte una ocasión única pa que la Universidá d’Uviéu dexe de ser una institución separtada de la sociedá na que vive p’aceptar y reconocer por fín la realidá billingüe del territoriu asturianu.
Dempués de presentar un documentu de Propuestes de Trabayu pa la Normalización Llingüística y Cultural na Universidá d’Uviéu (2008-2012) y ver la bona acoyida del Sr. Gotor y el so equipu pa desenrrollales en casu de ser escoyíu Rector, paeznos que ye de xusticia apoyar una candidatura que va cuatro años yá firmó un documentu bien importante a favor del asturianu y qu’agora, cuatro años más tarde, aumenta esi compromisu aceptando tener como base pal diálogu y el trabayu unes Propuestes de Trabayu que cubren tolos campos necesarios pa la normalización de la llingua asturiana na Universidá d’Uviéu.
El Conceyu Universitariu pol Asturianu entiende, poro, que’l trunfu de la candidatura de Don Vicente Gotor resultaría especialmente positiva y afayadiza pa construyir una nueva Universidá billingüe qu’asuma y potencie la llingua asina asina como otros elementos de la cultura asturiana. Por tanto dende’l CUPA encamentamos a toles persones que conformen la comunidá universitaria y que tengan apreciu pola llingua y cultura asturianes, a que’l próximu miércoles voten a Don Vicente Gotor como nuevu Rector de la Universidá d’Uviéu, pa qu’ésta por fin seya una Universidá de y p’Asturies con toles consecuencies.
El Conceyu Universitariu pol Asturianu, CUPA, ye una asociación abierta a los alumnos, personal docente y d'alministración y servicios de la Universidá d'Uviéu/Universidad de Oviedo. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la Universidá d'Uviéu/Universidad de Oviedo.
Xunta Directiva del Conceyu Universitariu pol Asturianu
YÁ TAMOS TRABAYANDO POL ASTURIANU DENDE'L CLAUSTRU.
GRACIES POL VUESU APOYU
Consulta equí'l programa del CUPA pa les Eleiciones al Claustru 2008.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
