POR UNA UNIVERSIDÁ DAVERES ASTURIANA
18/11/2008
D’aprobase, l’asturianu taría per primer vegada como materia dafechu oficial na Universidá d’Uviéu
UVIÉU, 19/11/2008
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, quier espresar el so deséu de que la Xunta de Facultá de Filoloxía de la Universidá d’Uviéu apruebe mañana, xueves 20 de payares, la propuesta d’entrada del asturianu nes enseñances reglaes presentada pol decanu de la mesma.Como yá declaramos a principios de setiembre celebramos la intención del decanu de Filoloxía, José Antonio Martínez de crear un 'mínor' d'asturianu como solución atopada pa que la llingua tea nes enseñances reglaes, que dende'l puntu de vista del CUPA va permitir un pasu históricu pal asturianu, porque dexa abierta la posibilidá de que la propia demanda del enseñu d'asturianu na Universidá, convierta'l 'minor' nun 'maior' nun futuru.
Sicasí, y como organización en defensa del asturianu, veríemos más apropiao que l'asturianu tuviere asitiada dientro de los nomaos 'maior', como yá declaramos nel mes de setiembre d’esti añu. Agora más que nunca somos conocedores de les dificultaes internes y esternes, que n'otres ocasiones yá echaron p'atrás les propuestes de reglar los estudios de Filoloxía Asturiana na Universidá d'Uviéu. Esto ye, de presentase y consiguir que s’aprobara la propuesta de ‘maior’, yá refugada na Xunta de Facultá enantes del branu, esta diba atopar el refugu de la insititución encargada d’aprobar los títulos en Madrid, como pasó n’otres ocasiones cola llicenciatura de filoloxía asturiana.
La realidá ye qu’esta selmana va decidise ente que l’enseñu del asturianu tea na Universidá d’Uviéu o non, yá que nun tenemos conocencia de propuestes de ‘maior’, sinón de ‘minor’ o de desaniciu del enseñu del asturianu. Propuesta esta última presentada pol profesor Félix Fernández de Castro.
Camentamos perimportante'l pasu d'asitiar al asturianu dientro de les enseñances reglaes al mesmu nivel qu'otres llingües oficiales y esperamos agora que la propuesta del Decanu José Antonio Martínez s’apruebe y l'asturianu dea esti pasu tan importante na so hestoria, pa lo que pidimos responsabilidá y consensu a tolos miembros de la Xunta de Facultá.
Dirección del Conceyu Universitariu pol Asturianu
08/07/2008
La crisis de Filoloxía y la normalización del asturianu na Universidá centraron el conceyu d’esta selmana
UVIÉU, 08/07/2008
Representantes del Conceyu Universitariu pol Asturianu (CUPA), organización independiente asturianista y universitaria na que participen alumnos, maestros, personal d’alministración y servicios y vieyos alumnos, y que cunta con representación nel Claustru de la Universidá d’Uviéu, aconceyó esti martes 8 de xunetu col Rector de la Universidá, D. Vicente Gotor.
L’alcuentru celebróse na sede del Rectoráu y ye parte d’una serie de contactos de trabayu pal entamu de les polítiques de normalización llingüística na Universidá d’Uviéu.
El primer tema tratáu foi la crisis creada na Facultá de Filoloxía por mor de la enmienda del profesor Félix Fernández de Castro. El Rector aseguró a los representantes del CUPA que tán tomándose los pasos necesarios pa que l’asturianu tea, como Vicente Gotor comprometió nel so programa electoral, nos futuros planes europeos. Representantes y Rector coincidieron na necesidá de buscar el consensu perdíu alredor del tema.
En cuantes a los problemes xeneraos pol refugu de documentos n’asturianu nel Rexistru de la Universidá d’Uviéu, el Rector comprometióse a solucionar el problema al traviés de la firma d’un conveniu col Gobiernu d’Asturies, que permita la esistencia d’un muérganu traductor na Universidá d’Uviéu. Los representantes del CUPA ficieron referencies a la Llei d’Usu del bable/asturianu de 1998 y recalcaron la importancia de solucionar un problema qu’afecta directamente a los drechos básicos de los asturfalantes de la comunidá universitaria.
En cuantes a la normalización del asturianu na Universidá, al traviés de la visibilización del idioma nes dependencies y documentos universitarios y de la promoción del mesmu, siguen dándose pasos nel camín positivu nel que se vienen produciendo nos contactos anteriores con D. Vicente Gotor dende la campaña de les elecciones a Rector y van siguir dándose en conceyos posteriores nos que van dir afitándose los puntos a siguir nesi procesu, d’una forma ordenada, progresiva y dialogada.
El CUPA fai un balance positivu d’esti alcuentru y de los contactos calteníos con esti equipu rectoral nos dos meses que cumplía Gotor nel cargu, el día del alcuentru con representantes del Conceyu Universitariu pol Asturianu.
Pal CUPA agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria y esto tien de facese buscando’l consensu y dexando les discusiones que nun conducen a nengún camín constructivu.
06/07/2008
Puestes en conocencia del Conceyu Universitariu pol Asturianu (CUPA) les supuestes amenaces a la escontra de Félix Fernández de Castro, denunciaes pol propiu profesor, queremos desmarcanos d'estos supuestos fechos y recordar a tolos miembros de la comunidá universitaria que les formes de lluchar a la escontra de l'ablucante decisión de la Xunta de Facultá d'eliminar l'asturianu de los planes d'estudiu, afalada por De Castro, son la reivindicación pacífica y el diálogu con tolos implicaos.
Nesi sen, el CUPA trabaya nel diálogu con tolos implicaos y caltién contactos que trabayen nel camín de consiguir pal asturianu una presencia normal y n'igualdá de condiciones coles demás llingües modernes dientro de los nuevos planes europeos.
01/07/2008
UVIÉU, 1 de xunetu de 2008
Dende’l Conceyu Universitariu pol Asturianu (CUPA) queremos manifestar la nuestra inquietú énte’l reciente comunicáu del Decanu de la Facultá de Xeografía y Hestoria, nel que se solidariza col profesor Félix Fernández de Castro por mor de l’apaición de dalgunes pintaes nel Campus del Milan onde se señala a esti profesor como “antiasturianu” a causa de la propuesta acientifica, demagóxica y políticamente xacobina que presentó na última Xunta de la Facultá de Filoloxía.
Esti comunicáu del Decanatu inquiétanos pues a finales del mes de mayu na Facultá de Xeografía y Hestoria apaecieron cartelos* onde amás de facer burlla de la llingua asturiana se difamaba d’un mou xabaz a dos estudiantes d’esa Facultá que se presentaren como candidatos a representantes estudiantiles nel Claustru. Entós el Decanatu non solo nun fizo nengún tipu de comunicáu públicu sinón qu’amás los cartelos se caltuvieron per dellos díes. Polo tanto quixéramos pidir un pocu de coherencia a un Decanatu que se solidariza con un profesor d’otra Facultá pero qu’inora a los estudiantes de la so propia Facultá.
25/06/2008
Dende'l Conceyu Universitariu pol Asturianu (CUPA) queremos manifestar la nuesa repulsa ya indignación énte la decisión de la Xunta de la Facultá de Filoloxía d'aprobar la enmienda del profesor Félix Fernández de Castro a la propuesta d'estudiu de Grau de Llingües Modernes presentada pol equipu decanal que presidía hasta ayeri Doña Ana María Cano.
Esta propuesta presentada a la Xunta de la Facultá de Filoloxía, y que foi defendida por Doña Ana María Cano y pol tamién profesor Don Ramón d'Andrés Díaz, suponía un cambiu radical no que cinca al estudiu de la llingua asturiana na Universidá d'Uviéu, asitiándola al mesmu nivel que llingües como l'inglés o'l francés.
Por embargu la Xunta de Facultá por una escasa mayoría de 34 votos frente a 30 votos optó por aprobar una enmienda parcial que marxina a la llingua d'Asturies na Facultá de Filoloxía, continuando col absurdu de que primen unos prexuicios acientíficos e ideolóxicos de calter xacobín sobre la necesidá de que la Universidá d'Uvieu seya una Universidá de y pa la sociedá asturiana, pues la esistencia d'una Universidá nun se xustifica en sí mesma sinón en función d'un serviciu a los asturianos, pa lo que ye imprescindible que los estudios de Filoloxía recueyan l'estudiu de la llingua del nuesu país.
Aplaudimos la decicisón de Doña Ana María Cano, de nun ser cómpliz de l'absurda decisión de la Xunta de Facultá y esperamos que se tomen midíes pa dar marcha atrás a esta decisión.
17/06/2008
L’asignatura diba entamar a dase pal cursu 2008-2009
UVIÉU, 18 de xunu de 2008
El Conceyu Universitariu pol Asturianu (CUPA), la organización independiente asturianista y universitaria na que participen alumnos, maestros, personal d’alministración y servicios y vieyos alumnos, ta acabante de mandar una reclamación a la dirección de la Universidá Nacional d’Educación a Distancia (UNED) y al so Centru Universitariu d’Idiomes a Distancia (CUID) por mor de la noticia de la qu’estos díes se facíen ecu los medios de comunicación asturianos y que recoyía la denuncia del sindicatu d’enseñanza SUATEA, que fizo pública la retirada de l’asignatura d’asturianu de la ufierta prevista pal cursu 2008-2009 na UNED.
Por ello, dende’l CUPA, queremos esixir que se recupere la iniciativa y el cursu que vien l’asturianu tea presente na UNED, pa que la llingua asturiana s’afite y esparda’l so usu y enseñu dientro del ámbitu universitariu, tamién a distancia.
Amás, esiximos esplicaciones por esta marcha atrás de la institución académica, que nun podemos albidrar, más que por razones polítiques.
Dende’l Conceyu Universitariu pol Asturianu sabemos de los problemes que suponen la falta d’oficialidá del asturianu y sobremanera les torgues que’l Gobiernu d’Asturies pon a toa iniciativa que suponga un avance pa la normalización de la llingua asturiana, pero la Universidá d’Uviéu, por exemplu, pon llingua asturiana dende va años, magar de que l’asturianu nun seya llingua oficial n’Asturies. Poro, esti argumentu nun ye válidu y nun pue torgar la necesaria presencia del asturianu na Universidá a Distancia.
Amás, queremos recordar la importancia que tien pal futuru de la llingua d’Asturies la implantación de la titulación de llingua asturiana nel futuru sistema européu de graos, al mesmu nivel que les demás llingües europees (castellán, inglés, catalán, francés…).
Dirección del Conceyu Universitariu pol Asturianu
29/05/2008
Uviéu, 29 de mayu de 2008
El Conceyu Universitariu pol Asturianu celebra los resultaos consiguíos pola formación nel procesu electoral lleváu alantre ayeri pa la elección de los miembros del Claustru de la Universidá d’Uviéu, máximu órganu de representación de la Insititución, pesie a les acciones de manipulación feches dende delles candidatures, yá denunciaes pol CUPA y reconocíes pola Xunta Electoral.
El candidatu Rubén Rodríguez Quiñones, estudiante na Escuela d’Inxenieríes Técniques de Mieres, convirtióse dempués de les elecciones d’esti xueves 29 de mayu en miembru del Claustru de la Universidá d’Uviéu y poro, en representante del CUPA nesti órganu.
Dende la Xunta Directiva del CUPA, qu’esta fin de selmana va aconceyar pa facer un balance fondu de los resultaos electorales, queremos dar la norabona a los candidatos polos resultaos, n’especial a Rubén Rodríguez Quiñones y les gracies a tolos estudiantes que participaron de la campaña y que confiaron na nuesa formación pa representalos nos próximos dos años.
Con esti nuevu llugar nes instituciones universitaries, el Conceyu Universitariu pol Asturianu va poder llevar les reinvidicaciones asturianistes al Claustru y trabayar dende ellí con más fuercia pa que la llingua asturiana dea pasos na Universidá d’Uviéu y los asturfalantes vean reconocíos los sos drechos na institución educativa asturiana. Pa ello siguiremos trabayando na Universidá.
CONCEYU UNIVERSITARIU POL ASTURIANU
27/05/2008
El Conceyu Universitariu pol Asturianu (CUPA), la organización independiente asturianista y universitaria na que participen alumnos, maestros, personal d’alministración y servicios y vieyos alumnos, preséntase pa llevar la voz de los universitarios asturianistes al Claustru.
Por ello, dende’l CUPA, queremos pidite’l votu nestes elecciones col envís de que l’asturianismu garre pesu na nuesa universidá y l’asturianu s’afite y esparda’l so usu y enseñu dientro de la Universidá d’Uviéu.
Lluchamos polos drechos de los asturfalantes na Universidá, pola visibilidá y promoción del idioma, porque que se cree la filoloxía asturiana, pol estudiu y difusión de la cultura y la música tradicional asturianes nel ámbitu universitariu…
El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria. Demuéstra-yos que ye asina esti 29 de mayu.
EL XUEVES 29 DE MAYU: VOTA CUPA
27/05/2008
UVIÉU, 28 de mayu de 2008
El Conceyu Universitariu pol Asturianu (CUPA), organización universitaria independiente y asturianista, quier facer públiques les denuncies feches énte la Xunta Electoral, dirixida pol profesor Leopoldo Tolivar, por esta organización por mor de los fechos asocedíos na campaña electoral al Claustru de la Universidá d’Uviéu, que van celebrase esti xueves 29.
La denuncia del CUPA llama l’atención sobre la situación d’acosu, insultos y amenaces a la que se vio sometíu’l candidatu d’esta formación nel Campus del Milán, que foi rematada, esti vienres pasáu cola pegada de falsos cartelos electorales* nos que se llanzaben mensaxes cola fin de desprestixar a los candidatos del CUPA, como “Demuestra que en el Milán no somos todos unos malditos rojos. Por una candidatura de derechas como Dios manda”, “Ya está bien de tanto progre. Por una candidatura de derecha auténtica” y “Por una misa todos los días en bable en tu Facultad”.
Amás, sufrióse tamién la manipulación de los cartelos electorales del CUPA, nos que pudieron vese escritos insultos como “fascistas”.
Dende la Dirección del Conceyu Universitariu queremos condergar estos fechos y llamentar la falta de cultura democrática de les persones que participen d’esta campaña d’amenaces y desprestixu, que yá apeciere nel trescursu de les elecciones a Rector de la Universidá d’Uviéu, momentu nel que yá pudieron vese comportamientos asemeyaos.
El CUPA yá denunció entós, énte la Xunta Electoral, como miembros de la plataforma d’apoyu a Paz Andrés repartía papeletes y facía campaña nel mesmu día de les elecciones y xunto a les meses electorales, con total impunidá.
Les amenaces que denunciamos nesta campaña, fueron sufríes tamién por Javier López Espinosa, cabezaleru d’otra de les candidatures presentaes nel Campus del Milán y presidente de la conocida asociación cultural “La Brisa de Japón”, col que mos solidarizamos.
*Axuntamos semeyes de los cartelos a los que se refier la nota
En casu de querer más información nun dulden en ponese en contactu con nós
Dirección del Conceyu Universitariu pol Asturianu
26/05/2008
Uviéu, 25 de mayu de 2008
Mui bones tardes, candidatos y candidates, amigos y amigues que mos acompañáis:
Güei celebramos los 200 años d’una fecha perimportante p’Asturies, d’una fecha que supunxo l’entamu de la hestoria contemporanea d’esti país y que permanez nel olvidu del poder establecíu n’Asturies. El 25 de mayu de 1808 la Xunta Xeneral d’Asturies, declaróse soberana y decidió enfrentase a la invasión francesa pola presión del pueblu asturianu y l’enfotu de dellos dirixentes de la dómina.
Por eso güei equí, nel edificiu onde aconceyó aquella Xunta Xeneral va agora dos sieglos ufrimos estes flores n’homenaxe a les persones qu’entós defendieron a Asturies y tuvieron el valor d’enfrentase a los que queríen suplantar al poder reconocíu pol pueblu asturianu.
Pero nun queremos qu’esta seya una celebración na que se faiga alcordanza d’aquel tiempu ensin más, dexando aquellos importantes fechos estáticos, como daqué disecao pa enseñar nun muséu, NON. L’exemplu del 25 de mayu tien que sirvir güei pa dalgo más, tien que
El 25 de mayu tien que mos recordar qu’un día fuimos un pueblu que quería ser un pueblu, qu’Asturies taba dispuesta a defendese como país a pesar (y escontra) el sucursalismu de la mayor parte de la oligarquía.
El 25 de mayu tien que sirvir pa sacar a la sociedá asturiana d’esti estáu de conformismu na que vive.
Pero sobremanera, el 25 de mayu tien que ser el momentu pa entamar la recuperación del camín que perdimos como pueblu. La sociedá asturiana necesita d’instituciones verdaderamente representatives y enrraigonaes na nuesa tradición hestórica.
La Xunta Xeneral tien que ser una d’elles. Nun pue siguir asturies con un parllamentu que nun s’asemeya a la Xunta Xeneral de 1808 más que nel nome, pues por poner solo un exemplu, nun pue nin siquiera aconceyase de forma autonóma ensin consultar a madrid, dalgo que si podia la vieya xunta.
Nun podemos siguir los asturianos sufriendo unes instituciones que viven dando la espalda asturies, cuando non, atacando directamente a la nuesa identidá, a la nuesa hestoria y a la nuesa llingua.
Por eso tamién, ye bien importante, que la nuesa universidá, qu’esti añu cumple 400 años siendo mui distinta a aquella na que’l rector fermín canella celebró en 1908 los 300 años d’universidá asturiana.
Les cróniques del momentu recuerden como en toos aquellos actos de celebración, en 1908, el pueblu llanu asturianu participaba de los actos de celebración. Les gaites, los testos de los escritores en llingua asturiana, la nuesa gastronomía, too esto yera parte y protagonista d’aquelles ceremonies. Por embargu, los actos entamos pa esti 400 aniversariu bien poco tienen que ver con aquel respetu pol país al que pertenez esta Universidá. Foi en 1908, naquelles celebraciones cuando ente’l pueblu asistente a un actu se sintió a una muyer qu’al altu la lleva dixo: ¡Viva la nuestra universidá!.
Los asturianos tamos deseando poder volver a sentir esi amor por esta institución, pero pa ello munches coses tienen que cambiar n’ella.
Como sabéis, nes pasaes elecciones apoyamos la candidatura del nuevu rector, Vicente Gotor. El compromisu que mos treslladó pa cola llingua y la cultura asturianes dientro de la Universidá d’Uviéu paeznos sinceru. Pero’l nuesu apoyu en nengún casu ye un cheque en blancu. El nuesu apoyu ta condicionáu polos pasos que vayan dándose na política llingüística na Universidá asturiana.
Que nadie nun lo dulde, taremos ehí apoyando y ayudando a que too a esto se lleve alantre, pero tamién taremos ehí pa reclamar que los drechos de los asturfalantes seyan reconocíos na Universidá d’Uviéu y por que los estatutos de la mesma se cumplan. El nuesu programa electoral, un programa ampliu d’oxetivos en política llingüística plantéase como un borrador de lo qu’ha ser un plan de normalización llingüística pa la nuesa universidá na que s’impliquen toles estayes de la insitución col compromisu de facer normal al nuesu idioma milenariu.
Esperando que la oficialidá traiga la defenitiva reconocencia de los drechos de los asturianos, siguiremos trabayando pa que d’equí a un añu podamos dicir xuntos aquello de ¡viva la nuestra universidá! Pa ello, pidímosvos el votu pal Conceyu Universitariu pol Asturianu nes elecciones al Claustru que van celebrase esti martes 29 en toles facultaes y escueles. Con estes persones nel Claustru, el máximu órganu de la Universidá d’Uviéu, tendremos más capacidá de trabayu y l’asturianismu verá reforciada la so presencia na universidá asturiana al travies d’esi frente xunitariu que tamos construyendo desde el CUPA penriba de les estériles lluches de sigles que siempres se dieron y que tantu mal ficeron a la causa asturiana.
Pa rematar, dalgunos de los candidatos al Claustru pol CUPA, van entrargar un ramu de flores delantre de la que foi la sede de la Xunta Xeneral d’Asturies. Suena a la gaita de Xaime Menéndez la marcha procesional de Llanes.
Güei, n’homenaxe a los asturianos que protagonizaron el 25 de mayu de 1808, glayemos xuntos:
¡Puxa’l 25 de mayu! ¡Puxa Asturies!
Agora sintamos l’Himnu d’Asturies .
(suena l’himnu)
Ensin más, gracies pola vuesa asistencia.
Trabaya con nós pol asturianu, escríbenos a conceyuasturianu@gmail.com
Consulta equí'l programa de trabayu del CUPA.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
