POR UNA UNIVERSIDÁ DAVERES ASTURIANA
15/12/2009
15 d’avientu de 2009
Sr. Rector, srs. Vicerrectores, srs. Claustrales:
Conceyu Universitariu pol Asturianu (CUPA)
El Conceyu Universitariu pol Asturianu apoyó a Vicente Gotor, Rector de la Universidá d’Uviéu, na campaña electoral y dende entós reconocemos los pasos daos na institución a favor del asturianu nel primer añu y mediu de mandatu, principalmente los siguientes:
-Usu del asturianu per parte del Rector en dellos actos.
-Impulsu de les enseñances d’asturianu en Filoloxía y Maxisteriu, per primer vez na hestoria oficiales.
-Creación d’un Reglamentu d’Usu del asturianu nel Rexistru de la Universidá, qu’anque insuficiente supón un avance.
El CUPA, qu’apoyó la campaña de Gotor y trabaya col equipu rectoral nestos avances, entiende’l que’l principal llogru ye’l cambiu d’actitú de la dirección de la Universidá d’Uviéu, que yá nun vive d’espaldes a la llingua asturiana, sinón qu’entiende la so normalización como parte del so trabayu.
El Rector y el so equipu abieron importantes espectatives y el Conceyu Universitariu pol Asturianu entiende amás, qu’agora ye’l momentu d’acelerar estes polítiques llingüístiques na Universidá, con nueves midíes que sirvan pa normalizar l’asturianu na Institución.
Sabemos que se trabaya nesos pasos, pero l’equipu rectoral nun pue dexar esi llabor pa muncho más alantre.
Pero esta cuestión nun pue quedar namás en manes del equipu rectoral, tien que participar tola comunidá universitaria, faciendo pola normalización del asturianu: Conseyu d’Estudiantes, Facultaes y Escueles, PAS, Defensor Universitariu…
Volvemos a reiterar el nuesu apoyu en toles iniciatives que supongan avances pa la llingua asturiana dientro de la Universidá asturiana y convidamos a tolos miembros del Claustru a trabayar na mesma dirección, con una collaboración crítica pero lleal, el consensu ye imprescindible nesta cuestión.
La nuesa norabona al equipu rectoral, con esos “peros”, y cola confianza de que van saber cumplir con too aquello a lo que se comprometieron cola comunidá universitaria.
Inaciu Galán y González, miembro del Claustru, voceru de los representantes del CUPA nel Claustru.
Respuesta del Rector Vicente Gotor:
“Desde el Rectorado no estamos en contra del asturiano, todo lo contrario, estamos demostrando estar a favor”
“Hemos hecho cosas y vamos a seguir, paso a paso, avanzando”
“Se está preparando una Comisión pa la Normalización Llingüística en la Universidad, en la que trabaja con tesón la Secretaría de mi equipo”.
“Nosotros actuarémos siempre dentro de la legalidad”
“Corresponde al Gobierno de Asturies, y no a nosotros oficializar el asturiano”
27/11/2009
El CUPA entiende esti nomamientu como un reconocimientu al cambiu xeneráu pol Rector alredor del asturianu na Universidá, anque cree “ha acelerase’l procesu de normalización con nueves midíes”
XIXÓN, 27/11/2009
El Conceyu Universitariu pol Asturianu (CUPA) celebra’l nomamientu de Vicente Gotor, Rector de la Universidá d’Uviéu, como patronu d’honor de la organización, lo que supón un reconocimientu al so llabor a favor del asturianu, en pallabres de la Fundación pola mor del “compromisu de Gotor cola llingua y l’actitú que vien mostrando hacia l’idioma del país dende que se convirtió na máxima autoridá de la institución académica”.
El CUPA, qu’apoyó la campaña de Gotor y trabaya col equipu rectoral nestos avances, entiende esti nomamientu como un reconocimientu a a los pasos yá daos nel primer añu y mediu de mandatu del cabezaleru universitariu, pero sobre manera a les espectatives abiertes pol Rector pa la normalización del asturianu. El CUPA entiende amás, que ye’l momentu d’acelerar estes polítiques llingüístiques na Universidá, con nueves midíes que sirvan pa normalizar l’asturianu na Institución.
Al actu, que va celebrase esti sábadu, 28 de payares, en Villaviciosa. El Conceyu Universitariu pol Asturianu va unviar a dellos representantes, col envís de felicitar al Rector pola reconocencia recibida y a la Fundación Caveda y Nava polo acertao de la so decisión.
Dirección del Conceyu Universitariu pol Asturianu
06/10/2009
El CUPA abre una canal en Facebook.com, p'acceder calca nesti enllaz: http://www.facebook.com/group.php?gid=147037684825
24/09/2009
L’asturianu ye per primer vegada materia dafechu oficial na Universidá d’Uviéu
UVIÉU, 24/09/2009
El Conseyu de Gobiernu de la Universidá d'Uviéu ta acabante d'aprobar los cuatro títulos de grau nos que se dividirán los estudios de la Facultá de Filoloxía, dientro del Espaciu Européu d'Educación Superior, ente los que tán el Mínor d'Asturianu, títulu que pon al asturianu per primer vegada nel sistema oficial d’enseñances.
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, quier espresar la so felicitación a la Universidá d’Uviéu pola aprobación definitiva de los estudios. El CUPA espera que nel futuru los estudios d’asturianu sigan ampliando’l so espaciu, aspirando la organización a la creación futura d’un Grau de llingua asturiana.
Amás, el CUPA, recuerda que ye’l momentu de crear, dientro de la Facultá de Filoloxía un Departamentu propiu pa la Filoloxía Asturiana, qu’anguaño ta representada namás con un grupu d’investigación, el Seminariu de Llingua Asturiana.
L’aprobación d’esti plan ye, dende'l puntu de vista del CUPA un pasu hestóricu pal asturianu, qu’entra per primer vegada dientro de les enseñances reglaes y oficiales universitaries.
Dirección del Conceyu Universitariu pol Asturianu
28/07/2009
La Escuela Universitaria Xovellanos acepta una Memoria de Práctiques redactada n'asturianu dempués, eso sí, d'aclariar al centru la llexislación vixente
XIXÓN, 28/07/2009
El Conceyu Universitariu pol Asturianu (CUPA) tuvo noticia a entamos d'esti añu de qu'ún de los sos miembros, alumnu de la Universidá, presentare una Memoria del Practium de la Diplomatura de Turismu escrita en llingua asturiana. La comisión encargada de la calificación d'esti trabayu imprescindible pa superar la Diplomatura, esixía al alumnu qu'entregare'l mesmu en castellán, pa dalu por válidu.
Col asesoramientu del CUPA, l'alumnu en cuestión aconceyó cola dirección de la Escuela Universitaria Xovellanos ya informó de la llexislación vixente, que protexe a los alumnos de la Universidá d'Uviéu, como queda afitao na Llei d'Usu del asturianu de 1998 y nel artículu 6 de los Estatutos de la Universidá d'Uviéu, que diz "naide podrá ser discrimináu pol usu del asturianu na institución".
A la fin, la dirección de del centru, atendiendo a la normativa llegal actual sobre la que se-y informó, dio-y la calificación de sobresaliente a la Memoria orixinal, redactada n'asturianu.
El CUPA felicita a la Escuela Universitaria Xovellanos de Xixón pol reconocimientu d'un drechu democráticu, que recueye la llei y al alumnu en cuestión por caltenese firme pa que se-y reconozan los sos drechos. Ye esta la manera, de qu’esti fechu seya normal nel futuru, y non namás una feliz anécdota.
Esti casu vien a amosar que trabayando na Universidá y al traviés del diálogu ye posible que se dean avances significativos na reconocencia de los drechos de los estudiantes que quieren usar l'asturianu na so vida diaria, y tamién qu'esiste un conflictu abiertu na mesma, qu'ha solucionase cola reconocencia absoluta de la igualdá de drechos pa los usuarios de castellán y asturianu.
El CUPA anima a los alumnos de la Universidá d'Uviéu a que nun s'autocensuren nel usu de la llingua asturiana, y presenten trabayos y faigan esámenes usando l'asturianu, pues entendemos que la normalización social de la llingua nunca nun se va dar si los miembros de la comunidá falante nun faen un usu normal de la mesma. En casu de tener cualesquier problema, el CUPA va ufrir el so apoyu lloxísticu y llegal, pa defender el drechu humanu a espresase na llingua materna.
Pa más información nun dulden en ponese en contactu con nós
Dirección del Conceyu Universitariu pol Asturianu
31/03/2009
L’asturianu va tar, gracies a la votación mayoritaria a favor, per primer vegada como materia dafechu oficial en Maxisteriu
UVIÉU, 31/04/2009
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, quier espresar la so felicitación a la Xunta d’Escuela de Maxisteriu de la Universidá d’Uviéu pola aprobación de la propuesta de crear una 'Mención' d'asturianu como solución atopada pa que la llingua tea nes enseñances reglaes.
L’aprobación d’esti plan ye, dende'l puntu de vista del CUPA un pasu hestóricu pal asturianu, qu’entra, como yá lo fizo en Filología, per primer vegada dientro de les enseñances reglaes y oficiales universitaries.
Celebramos la decisión de los miembros de la Xunta d’Escuela, que por 58 votos a favor, frente a namás 26 en contra, aprobó esti nuevu plan y felicitamos a los miembros d’esta Xunta pola so responsabilidá y consensu a la hora del votu.
El CUPA ve nestes dos decisiones un cambiu perimportante na forma d’entender la Universidá d’Uviéu, que ta d’esta forma al serviciu de los asturianos y los sos intereses y non a la contra, como pasaba n’etapes anteriores.
Dirección del Conceyu Universitariu pol Asturianu
29/03/2009
D’aprobase, l’asturianu taría, como en Filoloxía, per primer vegada como títulu dafechu oficial
UVIÉU, 30/03/2009
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, espresó’l so deséu de que la Xunta d’Escuela de Maxisteriu de la Universidá d’Uviéu apruebe mañana, martes 31 d’marzu, la propuesta pola que l’asturianu taría como Mención dientro de los planes d’estudiu del centru.
Dende la organización venimos trabayando a favor d’esta decisión, apoyada pol Rector Vicente Gotor, dende va meses. Y entendemos que la Mención xeneró yá un consensu importante na comunidá universitaria. La organización pide a tolos miembros de la Xunta d’Escuela que participen d’esta votación y lo faigan apoyando la decisión más afayadiza pa iguar los estudios de llingua asturiana en Maxisteriu, tanto pa los alumnos, como pal profesoráu d’esta materia.
Dende'l puntu de vista del CUPA, d’aprobase esta decisión, va dase un nuevu pasu hestóricu pal asturianu y pa la Universidá d’Uviéu.
Dirección del Conceyu Universitariu pol Asturianu
29/01/2009
El Conceyu Universitariu pol Asturianu celebra la decisión de la Xunta de la Escuela Universitaria de Maxisteriu, que votó a la escontra, por un gran marxe la votación del so proyectu d'adaptación al plan de Bolonia col que pretendía imperdir una titulación reglada d'asturianu na carrera.
Los planes de la dirección de la Escuela Universitaria de Maxisteriu viéronse rechazaos por mayoría amplia. El programa presentáu imcumplía tolos mandaos llegales que desixen l'enseñu d'asturianu. Nel conceyu de la Xunta d'Escuela varies intervenciones, feches por profesores y por representantes d'alumnos, amosaron el profundu malestar xeneráu pola dirección del centru y la so achaplante intención de dexar a la llingua asturiana fuera de los planes d'estudios al nun incluyir una mención específica.
El fechu de presentar un programa diseñáu pa da-y gustu a los sectores más retrógrados y nostálxicos del búnker universitariu quedó nidiamente destináu al fracasu porque la sociedá asturiana superó fai bien de tiempu.
testu d'asturnews.com
28/01/2009
El Conceyu Universitariu pol Asturianu amuesa'l so descontentu pola decisión de Maxisteriu y espera qu’esti xueves la cordura llegue a la Escuela de Maxisteriu y los sos dirixentes sepan dar marcha atrás nesta decisión contraría a la llegalidá vixente y que recuerda al pasáu, agora que la llingua asturiana va tar homologada coles demás llingües na Facultá de Filoloxía.
Xunta Directiva del Conceyu Unversitariu pol Asturianu
11/01/2009
El CUPA pidió yá en mayu de 2008 que se crearen “los títulos y especialidaes d’asturianu necesaries en Maxisteriu”
UVIÉU, 11/01/2009
El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios... y que cunta con representación nel Claustru de la Universidá d’Uviéu, quier volver a mostrar el so apoyu a la creación de “los títulos y especialidaes d’asturianu necesaries en Maxisteriu”, como yá lo espresare la organización nel puntu 4.4 del Programa Electoral al Claustru de la Universidá d’Uviéu, en mayu de 2008 (http://www.scribd.com/doc/3025998/Programa-Eleiciones-Claustru-2008).
Dempués de l’aprobación del Minor d’asturianu en filoloxía, un pasu hestóricu pal asturianu (per primer vegada dientro de les enseñances reglaes universitaries), ye’l momentu de siguir dando pasos na normalización del asturianu y la creación d’esti pernecesariu títulu en Maxisteriu, ye una de les prioridaes nesti campu.
Tamos seguros de que la propuesta treslladada a la Directora de la Escuela de Maxisteriu va salir alantre, y que los criterios científicos van trunfar como ocurrió en Filoloxía, penrriba de complexos culturales y posicionamientos partidarios.
Confiamos amás, en que la propuesta de solución pal asturianun en Maxisteriu va volver a tener l’apoyu del Rector, Vicente Gotor, que dende l’entamu del so mandatu vien amosando’l so apoyu a los estudios de llingua asturiana y a la normalización del asturianu na Universidá.
Dirección del Conceyu Universitariu pol Asturianu
Trabaya con nós pol asturianu, escríbenos a conceyuasturianu@gmail.com
Consulta equí'l programa de trabayu del CUPA.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
