POR UNA UNIVERSIDÁ DAVERES ASTURIANA
10/05/2008
UVIÉU, 10 de mayu de 2008
El 29 de mayu que vien, los miembros de la Universidá d’Uviéu escoyemos a los nuesos representantes nel Claustru, l’órganu cimeru de representación de la Institución, que controla l’actividá del Rector, los cambios nos estatutos y una llarga llista de competencies.
Por ello, dende’l CUPA, queremos pidite’l votu nestes elecciones col envís de que l’asturianismu garre pesu na nuesa universidá y l’asturianu s’afite y esparda’l so usu y enseñu dientro de la Universidá d’Uviéu.
Lluchamos polos drechos de los asturfalantes na Universidá, pola visibilidá y promoción del idioma, porque que se cree la filoloxía asturiana, pol estudiu y difusión de la cultura y la música tradicional asturianes nel ámbitu universitariu…
El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria. Demuéstra-yos que ye asina esti 29 de mayu.
08/05/2008
06/05/2008
05/03/2008
El Conceyu Universitariu pol Asturianu (CUPA) ta estudiando les midíes afayadices pa que l'asturianu tenga una presencia digna nos programes de los candidatos a Rector, que va escoyese nel mes de marzu.
15/03/2007
La estaya de mocedá de la Xunta pola Defensa de la Llingua Asturiana entama esta movilización en respuesta a la nueva agresión que supón la propuesta de currículu de la Conseyería d’Educación pa secundaria, qu’afonda na situación yá marxinal de la llingua asturiana nel sistema educativu.
El CUPA quier amosar el so apoyu a la fuelga y solidarízase cola situación llaceriosa del asturianu na enseñanza secundaria, que tien continuidá na étapa universitaria con una situación pal asturianu enforma peor.
La convocatoria de paru xeneral pal 22 de marzu va acompañada d’una concentración a la una del mediudía na Plaza d’España, frente a les oficines de la Conseyería d’Educación.
Esta convocatoria yá recibió l’apoyu de les organizaciones: Coleutivos de Mocedaes Comunistes (CMC), Mocedá d’Andecha Astur (MAA), Mocedá d’Izquierda Asturiana (MIAS), Xuventú Asturianista y Conceyu Universitariu pol Asturianu (CUPA).
Si quies materiales de convocatoria, más información o si nel to centru atopes con problemes contacta con nós nel corréu info@exunta.org
Panfletu: [http://www.exunta.org/spip/IMG/pdf/PANFLETU_FUELGA.pdf]
18/02/2007
Sigue la campaña de presentación del Conceyu Universitariu pol Asturianu (CUPA) cola pegada de cartelos en toles facultaes de los Campus d'Uviéu.
Siguimos esperando la collaboración de más miembros de la comunidá universitaria. El nuesu corréu ye conceyu-universitariu@hotmail.com
16/02/2007
El Conceyu Universitariu pol Asturianu (CUPA) quier amosar el so apoyu a la Manifestación en defensa del asturianu na enseñanza primaria convocada pola Xunta pola Defensa de la Llingua Asturiana, CC.OO.-Enseñanza, SUATEA y FETE-UXT. La Manifestación va celebrase esti sábadu 17 a les 13.OO hores con salida na Estación de Renfe n'Uviéu.
Queremos aprovechar esti momentu pa recordar a les autoridaes asturianes la continua marxinación de los falantes d'asturianu na Universidá d'Uviéu y esiximos que se tomen les midíes necesaries pa qu'esta situación cambie tamién na etapa universitaria, en cumplimientu del Estatutu d'Autonomía d'Asturies, de la Llei d'Usu y de los propios Estatutos de la Universidá d'Uviéu.
15/02/2007
Esti xueves, dellos miembros del Conceyu Universitariu pol Asturianu aconceyaron col portavoz de la Xunta pola Defensa de la Llingua Asturiana, Xulio Casado.
Nel conceyu, presentóse al CUPA oficialmente a la XPDLLA y amosóse la predisposición a la collaboración ente dambes asociaciones de reivindicación llingüística.
Asina, los representantes del Conceyu Universitariu pol Asturianu, esplicaron énte'l responsable como'l llabor d'esti coleutivu diba centrase na reivindicación llingüística na Universidá d'Uviéu, como vienen faciendo n'otros ámbitos Periodistes pol Asturianu, Aconceyamientu de Xuristes pol Asturianu, Artistes pol Asturianu...
Nesti conceyu abriéronse espeutatives pa futures collaboraciones en campañes comunes.
Asina mesmo, el CUPA quixo amosar el so sofitu a la Manifestación en defensa del asturianu na enseñanza primaria que va celebrase esti sábadu a les 13,00 h. n'Uviéu y quier facer estensivu esti mensaxe a la presencia del asturianu na enseñanza universitaria.
22/01/2007
Güei entamó la campaña de presentación del Conceyu Universitariu pol Asturianu (CUPA) cola pegada de cartelos en toles facultaes del Campus de Viesques de Xixón. Nos díes vinientes va continuase nesa llinia cola pegada en tolos campus de la Universidá d'Uviéu.
Per otru llau, la estructura del CUPA va conformándose y yá cuntamos con representantes na mayor parte de les facultaes, el mes que vien van presentase públicamente.
Siguimos esperando la collaboración de más miembros de la comunidá universitaria. El nuesu corréu ye conceyu-universitariu@hotmail.com
20/01/2007
Copia l'archivu del cartelu, impréntalu toles vegaes que quieras y pégalu pel to campus. ¡Sofita la campaña pa danos a conocer y lluchar por una universidá más asturiana!
Trabaya con nós pol asturianu, escríbenos a conceyuasturianu@gmail.com
Consulta equí'l programa de trabayu del CUPA.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
