POR UNA UNIVERSIDÁ DAVERES ASTURIANA
31/05/2008
d'asturies.com
30/05/2008 Los datos de les eleiciones al Claustru de la Universidá d'Uviéu, que cuntaron con un índiz de participación del 13'01 por cientu, apurrieron la presencia de cuatro representantes de calter asturianista, conocíos pola so abierta defensa de la presencia de la llingua asturiana nel ámbitu universitariu: Rodrigo Fernández Joglar, Iyán González Castro y Rubén Rodríguez Quiñones, pela parte de los alumnos; y Ramón d'Andrés Díaz y Xosé Antón González Riaño, pel llau de los profesores.
Rodrigo Fernández Joglar ya Iyán González Castro pertenecen a la organización Fai!, demientres que Rubén Rodríguez Quiñones yera'l representante del CUPA na Escuela d'Inxeniería Téunica de Mieres.
El Claustru ta formáu por 159 representantes del sector A, formáu polos profesores doctores de los cuerpos docentes universitarios; 36 del sector B, integráu pol restu del personal docente ya intestigador; 75 del sector C, formáu por Estudiantes y 30 del sector D, integráu pol Personal de Alministración y Servicios.
31/05/2008
d'asturnews.com 30/05/2008
Representante electu del CUPA nel Claustru
L’asturianismu universitariu algamó dellos representantes nes elecciones celebraes ayeri xueves na Universidá d’Uvieú. El Conceyu Universitariu pol Asturianu y la organización Fai!, de recién creación, sumen trés representates electos pal Claustru de la universidá asturiana.
Nunes votaciones marcaes pola escasa participación de los alumnos el Conceyu Universitariu pol Asturianu “celebra los resultaos consiguíos pola formación, pesie a les acciones de manipulación feches dende delles candidatures”, que fueron denunciaes pol CUPA y reconocíes pola Xunta Electoral esta mesma selmana.
Rubén Rodríguez Quiñones, estudiante na Escuela d’Inxenieríes Técniques de Mieres, convirtióse dempués de les elecciones d’esti xueves en miembru del Claustru de la Universidá d’Uviéu pol Conceyu Universitariu pol Asturianu, mientres que Rodrigo Fernández Joglar foi escoyíu miembru del Claustru, dende la candidatura de Fai! en Pedagoxía, pa los próximos dos años.
Per otru llau, Iyán González Castro, de Fai! foi escoyíu yá va díes como representate nel Claustru de la Universidá d’Uviéu, como únicu miembru presentáu na Facultá de Xeoloxía, colo que la suma de les candidatures asturianistes na Universidá d’Uviéu algama los trés representantes.
Dambes organizaciones celebraron los resultaos, de los que van facer "un balance más fondu nos próximos díes" y quixeron dar les gracies a los estudiantes que-yos dieron la so confianza n’estos comicios.
Destaca tamién la presencia, ente los miembros electos na estaya de profesores, de Ramón d’Andrés, destacáu defensor del asturianu, que foi escoyíu na Facultá de Filoloxía.
31/05/2008
Infoasturies.net
Xueves, 29 de Mayu de 2008 01:09
El Conceyu Universitariu pol Asturianu algamó un represetante nel Claustru de la Universidá d'Uviéu, másimu muérganu de representación de la Insititución, "pesie a les acciones de manipulación feches dende delles candidatures, yá denunciaes pol CUPA y reconocíes pola Xunta Electoral".
El candidatu Rubén Rodríguez Quiñones, estudiante na Escuela d'Inxenieríes Técniques de Mieres, convirtióse en miembru del Claustru de la Universidá d'Uviéu. Con esti nuevu llugar nes instituciones universitaries, "el Conceyu Universitariu pol Asturianu va poder llevar les reinvidicaciones asturianistes al Claustru y trabayar dende ellí con más fuercia pa que la llingua asturiana dea pasos na Universidá d'Uviéu y los asturfalantes vean reconocíos los sos drechos na institución educativa asturiana".
29/05/2008
Uviéu, 29 de mayu de 2008
El Conceyu Universitariu pol Asturianu celebra los resultaos consiguíos pola formación nel procesu electoral lleváu alantre ayeri pa la elección de los miembros del Claustru de la Universidá d’Uviéu, máximu órganu de representación de la Insititución, pesie a les acciones de manipulación feches dende delles candidatures, yá denunciaes pol CUPA y reconocíes pola Xunta Electoral.
El candidatu Rubén Rodríguez Quiñones, estudiante na Escuela d’Inxenieríes Técniques de Mieres, convirtióse dempués de les elecciones d’esti xueves 29 de mayu en miembru del Claustru de la Universidá d’Uviéu y poro, en representante del CUPA nesti órganu.
Dende la Xunta Directiva del CUPA, qu’esta fin de selmana va aconceyar pa facer un balance fondu de los resultaos electorales, queremos dar la norabona a los candidatos polos resultaos, n’especial a Rubén Rodríguez Quiñones y les gracies a tolos estudiantes que participaron de la campaña y que confiaron na nuesa formación pa representalos nos próximos dos años.
Con esti nuevu llugar nes instituciones universitaries, el Conceyu Universitariu pol Asturianu va poder llevar les reinvidicaciones asturianistes al Claustru y trabayar dende ellí con más fuercia pa que la llingua asturiana dea pasos na Universidá d’Uviéu y los asturfalantes vean reconocíos los sos drechos na institución educativa asturiana. Pa ello siguiremos trabayando na Universidá.
CONCEYU UNIVERSITARIU POL ASTURIANU
27/05/2008
El Conceyu Universitariu pol Asturianu (CUPA), la organización independiente asturianista y universitaria na que participen alumnos, maestros, personal d’alministración y servicios y vieyos alumnos, preséntase pa llevar la voz de los universitarios asturianistes al Claustru.
Por ello, dende’l CUPA, queremos pidite’l votu nestes elecciones col envís de que l’asturianismu garre pesu na nuesa universidá y l’asturianu s’afite y esparda’l so usu y enseñu dientro de la Universidá d’Uviéu.
Lluchamos polos drechos de los asturfalantes na Universidá, pola visibilidá y promoción del idioma, porque que se cree la filoloxía asturiana, pol estudiu y difusión de la cultura y la música tradicional asturianes nel ámbitu universitariu…
El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria. Demuéstra-yos que ye asina esti 29 de mayu.
EL XUEVES 29 DE MAYU: VOTA CUPA
27/05/2008
UVIÉU, 28 de mayu de 2008
El Conceyu Universitariu pol Asturianu (CUPA), organización universitaria independiente y asturianista, quier facer públiques les denuncies feches énte la Xunta Electoral, dirixida pol profesor Leopoldo Tolivar, por esta organización por mor de los fechos asocedíos na campaña electoral al Claustru de la Universidá d’Uviéu, que van celebrase esti xueves 29.
La denuncia del CUPA llama l’atención sobre la situación d’acosu, insultos y amenaces a la que se vio sometíu’l candidatu d’esta formación nel Campus del Milán, que foi rematada, esti vienres pasáu cola pegada de falsos cartelos electorales* nos que se llanzaben mensaxes cola fin de desprestixar a los candidatos del CUPA, como “Demuestra que en el Milán no somos todos unos malditos rojos. Por una candidatura de derechas como Dios manda”, “Ya está bien de tanto progre. Por una candidatura de derecha auténtica” y “Por una misa todos los días en bable en tu Facultad”.
Amás, sufrióse tamién la manipulación de los cartelos electorales del CUPA, nos que pudieron vese escritos insultos como “fascistas”.
Dende la Dirección del Conceyu Universitariu queremos condergar estos fechos y llamentar la falta de cultura democrática de les persones que participen d’esta campaña d’amenaces y desprestixu, que yá apeciere nel trescursu de les elecciones a Rector de la Universidá d’Uviéu, momentu nel que yá pudieron vese comportamientos asemeyaos.
El CUPA yá denunció entós, énte la Xunta Electoral, como miembros de la plataforma d’apoyu a Paz Andrés repartía papeletes y facía campaña nel mesmu día de les elecciones y xunto a les meses electorales, con total impunidá.
Les amenaces que denunciamos nesta campaña, fueron sufríes tamién por Javier López Espinosa, cabezaleru d’otra de les candidatures presentaes nel Campus del Milán y presidente de la conocida asociación cultural “La Brisa de Japón”, col que mos solidarizamos.
*Axuntamos semeyes de los cartelos a los que se refier la nota
En casu de querer más información nun dulden en ponese en contactu con nós
Dirección del Conceyu Universitariu pol Asturianu
26/05/2008
26/05/2008
Uviéu, 25 de mayu de 2008
Mui bones tardes, candidatos y candidates, amigos y amigues que mos acompañáis:
Güei celebramos los 200 años d’una fecha perimportante p’Asturies, d’una fecha que supunxo l’entamu de la hestoria contemporanea d’esti país y que permanez nel olvidu del poder establecíu n’Asturies. El 25 de mayu de 1808 la Xunta Xeneral d’Asturies, declaróse soberana y decidió enfrentase a la invasión francesa pola presión del pueblu asturianu y l’enfotu de dellos dirixentes de la dómina.
Por eso güei equí, nel edificiu onde aconceyó aquella Xunta Xeneral va agora dos sieglos ufrimos estes flores n’homenaxe a les persones qu’entós defendieron a Asturies y tuvieron el valor d’enfrentase a los que queríen suplantar al poder reconocíu pol pueblu asturianu.
Pero nun queremos qu’esta seya una celebración na que se faiga alcordanza d’aquel tiempu ensin más, dexando aquellos importantes fechos estáticos, como daqué disecao pa enseñar nun muséu, NON. L’exemplu del 25 de mayu tien que sirvir güei pa dalgo más, tien que
El 25 de mayu tien que mos recordar qu’un día fuimos un pueblu que quería ser un pueblu, qu’Asturies taba dispuesta a defendese como país a pesar (y escontra) el sucursalismu de la mayor parte de la oligarquía.
El 25 de mayu tien que sirvir pa sacar a la sociedá asturiana d’esti estáu de conformismu na que vive.
Pero sobremanera, el 25 de mayu tien que ser el momentu pa entamar la recuperación del camín que perdimos como pueblu. La sociedá asturiana necesita d’instituciones verdaderamente representatives y enrraigonaes na nuesa tradición hestórica.
La Xunta Xeneral tien que ser una d’elles. Nun pue siguir asturies con un parllamentu que nun s’asemeya a la Xunta Xeneral de 1808 más que nel nome, pues por poner solo un exemplu, nun pue nin siquiera aconceyase de forma autonóma ensin consultar a madrid, dalgo que si podia la vieya xunta.
Nun podemos siguir los asturianos sufriendo unes instituciones que viven dando la espalda asturies, cuando non, atacando directamente a la nuesa identidá, a la nuesa hestoria y a la nuesa llingua.
Por eso tamién, ye bien importante, que la nuesa universidá, qu’esti añu cumple 400 años siendo mui distinta a aquella na que’l rector fermín canella celebró en 1908 los 300 años d’universidá asturiana.
Les cróniques del momentu recuerden como en toos aquellos actos de celebración, en 1908, el pueblu llanu asturianu participaba de los actos de celebración. Les gaites, los testos de los escritores en llingua asturiana, la nuesa gastronomía, too esto yera parte y protagonista d’aquelles ceremonies. Por embargu, los actos entamos pa esti 400 aniversariu bien poco tienen que ver con aquel respetu pol país al que pertenez esta Universidá. Foi en 1908, naquelles celebraciones cuando ente’l pueblu asistente a un actu se sintió a una muyer qu’al altu la lleva dixo: ¡Viva la nuestra universidá!.
Los asturianos tamos deseando poder volver a sentir esi amor por esta institución, pero pa ello munches coses tienen que cambiar n’ella.
Como sabéis, nes pasaes elecciones apoyamos la candidatura del nuevu rector, Vicente Gotor. El compromisu que mos treslladó pa cola llingua y la cultura asturianes dientro de la Universidá d’Uviéu paeznos sinceru. Pero’l nuesu apoyu en nengún casu ye un cheque en blancu. El nuesu apoyu ta condicionáu polos pasos que vayan dándose na política llingüística na Universidá asturiana.
Que nadie nun lo dulde, taremos ehí apoyando y ayudando a que too a esto se lleve alantre, pero tamién taremos ehí pa reclamar que los drechos de los asturfalantes seyan reconocíos na Universidá d’Uviéu y por que los estatutos de la mesma se cumplan. El nuesu programa electoral, un programa ampliu d’oxetivos en política llingüística plantéase como un borrador de lo qu’ha ser un plan de normalización llingüística pa la nuesa universidá na que s’impliquen toles estayes de la insitución col compromisu de facer normal al nuesu idioma milenariu.
Esperando que la oficialidá traiga la defenitiva reconocencia de los drechos de los asturianos, siguiremos trabayando pa que d’equí a un añu podamos dicir xuntos aquello de ¡viva la nuestra universidá! Pa ello, pidímosvos el votu pal Conceyu Universitariu pol Asturianu nes elecciones al Claustru que van celebrase esti martes 29 en toles facultaes y escueles. Con estes persones nel Claustru, el máximu órganu de la Universidá d’Uviéu, tendremos más capacidá de trabayu y l’asturianismu verá reforciada la so presencia na universidá asturiana al travies d’esi frente xunitariu que tamos construyendo desde el CUPA penriba de les estériles lluches de sigles que siempres se dieron y que tantu mal ficeron a la causa asturiana.
Pa rematar, dalgunos de los candidatos al Claustru pol CUPA, van entrargar un ramu de flores delantre de la que foi la sede de la Xunta Xeneral d’Asturies. Suena a la gaita de Xaime Menéndez la marcha procesional de Llanes.
Güei, n’homenaxe a los asturianos que protagonizaron el 25 de mayu de 1808, glayemos xuntos:
¡Puxa’l 25 de mayu! ¡Puxa Asturies!
Agora sintamos l’Himnu d’Asturies .
(suena l’himnu)
Ensin más, gracies pola vuesa asistencia.
26/05/2008
26/05/2008
El CUPA celebró’l 25 de mayu reclamando “una Universidá d’Uviéu qu’asuma la llingua y la cultura d’Asturies”
d'asturnews.com
Uviéu acoyó ayeri, 25 de mayu, un emocionáu actu n’homenaxe del 25 de mayu de 1808. El Conceyu Universitariu pol Asturianu entamó un actu na tarde del domingu nel que se fizo una visita hestórica y cultural pelos espacios onde asocedieron los fechos del llevantamientu contra los franceses en 1808.
Yá na puerta de la catedral diose llectura a un comunicáu nel que se reclamó que la Universidá d’Uviéu “vuelva a convertise nuna institución que mire p’Asturies y respete y asuma la llingua y cultura asturianes”. Darréu pudieron sentise dellos temes rellacionaos col 25 de mayu, na gaita de Xaime Menéndez, pa darréu rematar l’actu cola entrega d’una ofrenda floral.
El CUPA preséntase a les elecciones al Claustru de la Universidá d’Uviéu, que van celebrase esti xueves 29 de mayu. L’actu del domingu yera tamién l’actu central de la campaña pa estos comicios. Los miembros del CUPA van tar faciendo campaña, mañana pela mañana nel campus de Xixón y el martes nel de Mieres.
22/05/2008
L’eventu va convertise nel actu central de la campaña del CUPA pa les elecciones al Claustru de la Universidá d’Uviéu
UVIÉU, 20/05/2008
El 29 de mayu que vien, celébrense les elecciones al Claustru de la Universidá d’Uviéu y el Conceyu Universitariu pol Asturianu (CUPA), organización independiente asturianista y universitaria na que participen alumnos, maestros, personal d’alministración y servicios y vieyos alumnos, va presentase pa llevar la voz de los universitarios asturianistes al Claustru. Pa dar a conocer el so programa la organización va entamar una serie d’actos de campaña.
L’actu central de la campaña, va celebrase esti domingu 25 de mayu a les 17:00 hores, frente al EDIFICIU HESTÓRICU UNIVERSIDÁ D’UVIÉU, asitiáu nel centru d’Uviéu. Dende esi llugar va salise nun circuitu hestóricu-cultural pol Uviéu del 25 de mayu de 1808, al cargu del historiador Javier Cubero de Vicente.
Media hora más tarde, a les 17:30, na PUERTA DE LA CATEDRAL D’UVIÉU va facese una ufierta floral na alcordanza de los 200 años del 25 de mayu, darréu van dicir unes pallabres los candidatos del CUPA y va interpretase l’Himnu d’Asturies y la Marcha Procesional de Llanes a la gaita, que va tocar Xaime Menéndez.
Xunto a estos actos, el CUPA va organizar otros nos campus de Xixón (el 26 de mayu pela mañana) y de Mieres (el martes 27 de mayu, tamién pela mañana).
El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria.
El CUPA ta acabante colgar nesta web (www.conceyu.tk) el so programa electoral.
Dirección del Conceyu Universitariu pol Asturianu
YÁ TAMOS TRABAYANDO POL ASTURIANU DENDE'L CLAUSTRU.
GRACIES POL VUESU APOYU
Consulta equí'l programa del CUPA pa les Eleiciones al Claustru 2008.
El Conceyu Universitariu pol Asturianu (CUPA) ye una asociación abierta a los alumnos, personal docente y d'alministración y servicios de la Universidá d'Uviéu. Nun ta venceyada a nengún partíu políticu nin grupu de presión.
L’oxetivu del CUPA ye afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana.
El CUPA tien anguaño presencia en tolos campus y trabaya na realización de campañes de reivindicación y sensibilización y nel asesoramientu d’aquelles persones ya instituciones que mos requieren.
Dende mayu de 2008 tenemos representación nel Claustru de la Universidá d'Uviéu, l'órganu cimeru de representación de la comunidá universitaria.
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
