¿Cuándo vas colar d'esi chigre?
31/01/2006
Un combustible amañoso. La comida ye eso. Hai unos años un fabricante d'autos entrugaba, dende les páxines d'un periódicu, si mercaríemos un camión pa llevar la reciella al colexu. Evidentemente el mensaxe yera que más que la cantidá (ya inda la calidá) hai qu'emplegar lo razonable, lo afayaízo, al fin perseguíu.
Vivir ye munches coses, pero nun ye la menos importante aquel aspeutu que cinca al conceutu d'intercambéu. Vivir ye eso, un continu fluxu, un camudar cada milisegundu en daqué imperceptible pero, fundamentalmente, naquello que ye moneda común, dalgo que tá nel mesmu tueru de tou procesu vital: llámase "enerxía". Fortunosamente tenemos esa máxica pallabra que tá en llabios de tol mundu, la enerxía, del llatín "energia" y ésti del griegu "energeia", la fuerza d'aición. Como toles pallabres nun pasa de ser un compromisu conceutual que pué tar valero de contenío, neto qu'un comodín. Los antiguos emplegaben otros términos pa definir "eso" que posibilita la vida y que pué ser la vida mesmo. Falaben de "sostancia", d'esencia, de fluíu esencial. Los pensaores atoparen munches pallabres pa definir eso. Nós, anguaño, gracies a la relixón que llamamos ciencia, podemos emplegar la pallabra "enerxía".
Nel nuesu universu cercanu, pa la Tierra y tolos seres que l'habiten, el gran apurrior d'enerxía ye'l Sol. Y nun ye otra cosa qu'enerxía del Sol lo que mos mantién vivos físicamente. Cierto que cuando llega a nós, omnívoros, esa enerxía aporta degradao. Primero les plantes tresformaron la vibración luminoso en polímeros carbonaos. Siguieron los hervívoros y, darréu, los carnívoros. Cuando xintes un filete carne la enerxía del Sol ta mui adulterao, pero la comes. El Sol ye más importante de lo que creen dalgunos científicos respective la criación de la vida. Ye xusto ésti el que configura la realidá físico-química d'un cuerpu físicu y, efectívamente, toles operaciones relacionaes cola vida física, tanto de criación como d'evolución necesiten de la enerxía de la estrella, ello ye, de la so espurría gama de frecuencies vibracionales, como comentaré notru llugar.
Lo razonable, lo amañoso, cuando vas entamar un camín d'autoconocimientu, ye evitar aquello que pué torgar l'entendimientu. Entre otres torgues, tan los velenos alimenticios. Si vamos a usar lo único que conocemos pal viaxe, esto ye, el cuerpu físicu, convién que tea el meyor combustible posible. El más puru o, si se prefier, el menos porcono. Naide gastaría les perres nun carísimu coche toutarrén si tien l'enfotu d'echa-y mala gasolina o va a calzalu con probes neumáticos por aquello de lo muncho caro que tan. Nun automóvil, cursiosamente, son eses dos coses les más importantes y cuido que les menos valoraes. Una pila perres de chapa y pintura descansen nun humilde productu d'orixe vexetal: la goma.
El primer pasu del viaxe va ser el racionalizar la inxesta d'alimentos y el so orixe. Da lo mesmo lo que te guste, lo te preste o te vuelva llocu. Naide debería elexir un mal combustible pa la so vida. Lo primero ye disminuir progresivamente la carne animal de la dieta. Les carnes animales (tanto terrestres como marinos) apurren una enerxía mui contaminao ya que gran parte d'ella usáronla pa fabricar les sos proteínes, grases y glucóxenos. Amás, y dende 'l puntu vista de la enerxía sutil, nun solo mos train esos productos sinón tamién otros compuestos non deseables. Podemos comeles, claro ta, pero si se pué elexir ye meyor esplorar el campu dietéticu vexetariano ensin cayer nos escesos de la "mafio-biótica". Nun se trata d'adherise a una nueva relixón sinon de vivir lo más sano posible al bolsu, fuxendo de les munches toxines qu'aporten les carnes, y más nesti periodo d'evolución económica na que la masiva producción alimentario trai l'usu d'axentes químicos y farmacolóxicos qu'acaben na mesa del común comensal en forma de guapu filete y futuros problemes de colesterolemia, diabetes, reaiciones cruzaes d'antibióticos y, en suma, enfermedaes metabóliques que dexeneren, les más les veces, en neoplasies, cáncanos, sorprendentes.
Yo tomábame a broma lo de nun comer carne. La verdá ye que nun hai llei, positiva o moral, que lo desixa. Pero, como siempre, foi la "enfermedá" la que, como mediu que tien el cuerpu d'avisate de que daqué nun furrula, punxome les coses clares. Si hai malures evitables ¿por qué nun les obviar? Si podemos disfrutar d'una dieta sano ¿por qué aneciar en xintar basoria? Propuesta: ¿Qué tal si un día a la selmana fais toles comides con base vexetal?
Nel viaxe necesitarás tener bon motor. Entama queriéndote más. Date 'l meyor combustible posible: la enerxía del Sol en forma de más y meyor fruta, verdures, hortalices... En resume, vexetales, cuidandote de que sían más exolóxicos, frescos y xintaos en crudo. Aliña con bon aceite d'oliva. En fin, trátase de viaxar cómodo y sano. Lo de les recetes déxolo al to petite. Yo llevo l'autobús pero nes paraes tú decides lo que vas comer. Ye la to llibertá.
30/01/2006
Tamos preparaos pal viaxe, cierto, pero tovía falta daqué. ¿Qué llevamos pa comer nel viaxe?
Dicin los vieyos que los vezos fain lleis. Eso ye tan cierto como que tolos derechos continentales reconocen daqué puxu a la costume como fonte obligacional nes relaciones xurídiques. Pero ye que nun solo fain lleis. Los vezos permiten a la xente llevar una vida, digamos, automático; ensin pensar muncho de lo que fai durante la vida. Eso ye útil cuando trátense d?aiciones cafiantemente repetitives. Nun fai falta perder tiempu ordenando a caún de los músculos d?ún qu?enroñen o espurran durante la bipedestación, por exemplu. Pero tá claro que lo bono de l?automatización nun tien de xeneralizase a tou comportamientu. Respective la comida los vezos tienen muncho pa dicir.
Hai que llevar daqué pa xintar pero ¿qué cosa? El vezu alimenticiu va dicinos lo que ?prestaría? llevar pero ¿ye comeniente face-y casu?
Nun viaxe d?autoconocencia hai que tener claro que vamos a un paixase nuevu, un nuevu mundu que tenemos escaecío. En realidá vamos a RE-descubrir lo que yá sabemos y, poro, nun parez afayaízo llevar con nós aquellos comportamientos que, xusto, mos tienen ?arreyaos? a una ?cotidianidá automático?, cotidianidá que, por selo, nun participa del esencial requisitu de la conciencia del intre, del momentu. Si te presten les galletes de xocolate ta bien sabelo pero va ser meyor que les dexes pa la vida que lleves agora, enantes de viaxar, pues esi petite guarda relación con esa vida, non cola que vas descubrir. Pero, claro ta, nun se trata d?una prohibición. Yes llibre pa llevar lo que te pete. Trátase d?un amistosu encamientu pues ¿qué bien s?algama faciendo mal al otru? Nengunu.
Primero de preparar la merendera convien saber daqué cosa más.
La comida cumple una función aparentemente obvia: dar enerxía pa la vida. Sicasí, nun mundu opulentu, la función ye más el cumplir un ritu que tien muncho que ver con un conceutu conocíu: consumismu. Agora el comer ye una vezu más qu?una biolóxica necesidá. Vivimos pa comer ya que la comida mueve una industria, que mueve una economía, que produz unes ganancies y pérdides financiero-económiques nun movimientu espiral espansivu ayenu a la función vital de la comida. La situación ye que, agora, nós nun controlamos lo que queremos ser físicamente. Somos lo que comemos y la comida ta controlao pol ?Sistema?, lo que lleva a un razonamientu simplayu pero tan cierto como que les piedres pesen: el sistema nos controla. De mano, pol banduyu.
Pal ?Sistema? el ciudadanu morrió. Agora llámase ?consumidor? y ?usuariu?. Trátase d?un perversu círculu d?emborricamientu fínamente trazáu polos malos de la película.
Tendríes de parate un migayu a pensar sobre lo que comes. Xulgar si lo que xintes ye lo que realmente necesites como ser vivu o ye una engayifa consumista que, a la llarga, pué llevate a ser lo que nun yes: un amaláu. Esa ye la to llibertá, tamién.
14/01/2006
Si quies vinir comigu tienes de prepate y preparar ciertes coses. Unes van sobrate. Por exemplu, los zapatos de domingu. Otres van facete falta: una bona fardela. Un viaxe ye dexar un paisaxe y encarar otru, pero el viaxe nun entama cuando soltamos el polvu del llugar que dexamos. Anicia muncho enantes: queriendo viaxar. Ya inda muncho enantes de querelo: creyendo nesi viaxe. Poro, primero de viaxar vas sentate y reflesionar sobre lo que creyes. Ye importante saber cuánto d'inutil vas llevate al colar. Agora ye l'intre afayaízu pa elexir viaxar rápido, con pocu pesu, o despacino, por llevar los cáncamos tarecos colos qu'avezamos vivir.
Mira, esto vas entendelo bien. Cuando nacemos somos una fueya por escribir. Careciendo de pre-xuicios vamos inxerimos bien fácil nuna cultura, nun sistema de creencies, nuna fala y nun pais. Lo que facemos ye asumir como propio un sistema de valores, un paradigma siempre ayenu. Esi sistema acompañaá a la mayoría de los humanos tola vida. Amás, al espuxigar en tiempu y esperiencia l'humanu perdi plasticidá y adaptación mentales. Diríase que de la qu'emborronamos aquella fueya que yéremos queda menos sitiu pa escribir nueves coses, pa adeprender o desendolcar nueves estratexes vitales. La sabencia popular resume la situación asina: les conocencies nueves concasen mal con mañes de perru vieyu. Pero esto nun va con nós ¿eh? Si llegasti hasta equí ye porque necesites rempuestes. Porque tovía quédate papel en blanco y ganes d'escribilu. Porque quies viaxar.
Bien. Vamos dexar la ropa de tolos díes. Nun vamos meter en polvu de caleya esa ropa tan guapo que tenemos tol añu. Pal viaxe hai que preparar otra. De mano, tenemos de dexar el ropax mental de los apriorismos. Tamién el los pre-xuicios que tan bono furrularon, o furrulen, pa cola vida cotidiano. Nun digo que nun sían útiles éstos y aquéllos pa la vida que lleves, pero van ser una estorbisa nesti camín. Meyor guardalos. Mángalos a manu, si quies pero, por agora, dixébrate d'ellos. La distancia permite meyor y mayor panorámica. Y, darréu facelo, vamos abrir y pesllar unes cuantes portielles. Abramos la de la dulda y la del "¿por-qué-non?". Tamién hai otra, la del "pué-ser". Éstes, y otres, dexarán pasar aire abondo como pa alendar nuevos arumes. Lluz abondo pa ver otros paisaxes: Soníos enforma como pa sentir otres voces y músiques. Porque viaxar ye, tamién, conocer. Y d'eso ye de lo que se trata.
Pongámonos ropa cómodo. El viaxe tien de ser agradable y un pantalón que se meta pela regata'l culu o una guapa bota que faiga angüeñes nun son cosa prestoso. Ya abrimos dalguna portiella. Agora toca pesllar otres. De mano faigámoslo cola del "xulgar". Hasta que nun la tranques nun vas decatate de la muncha enerxía que pierdes tolos díes comparando y comparándote colos otros. Lo muncho que cansa vivir como xuez. Dexa esi llabor a quien-y paguen por ello. Déxalo a quien nun sabi facer otra cosa o nun tien otru enfotu na vida que, precisamente, ési por vivir "alienáu", esto ye, habitar fuera del so propiu centru de poder, del so propiu "yo". Xulgar ye comparar al otru con una norma, propia o ayena pero ¿por qué eses normes van a ser úniques o meyores? Déxalo pa prau. que too eso pesa muncho en camín y nun val un res.
¿Tas preparáu? Nun escaezas la fardela. Resúmote lo que dexasti: pre-xuicios y paradigmes. Y lo que preparasti: la dulda y l'apertura. Too esto nun ye poca cosa y pocos son los humanos que tan dispuestos a facelo. Pero eso ye l'usu lexítimo del llibre determín y ye tan válido el quedase como el colar.
Si nun t'avaga, colemos, pues.
C.
13/01/2006
INTRO
Podemos vivir la vida que mos pete porque ?l tueru de ?lo humano? ye ?l llibre albedríu. Si te fadia falar de ?dios? fala d?otra cosa, superior siempre a la to persona y realidá, pues parte del contratu de la vida como animal humanu inclui aquélla facultá, facultá qu?apurrió esi ente superior que nadie nun conoz sinón fai por ello. Se que dicir esto tan llueo va empapizar a munchos, pero si eso pasa ye porque esi ye?l so llímite d?entendederes, lo cualo nin ye bono nin malo.
La historia de los humanos ye un camín yá caleyao por otros entes biolóxicos con esi privilexu de llibre determín. Los humanos nun van ser los primeros nin los últimos nesa guiadera porque, al fin, tolo que vemos y, lo más importante, lo que non, cumple un fin precisu, determináu y determinable. Conocelu ye trabayu de munches vides, tanto propies como ayenes, y nun ye obligación o enfotu necesario el facelo. Pero pal que-y presten les rempuestes entamemos camín con unes afirmaciones.
?La llibertá inclui la realidá de ñegala. Naide nun pué ser obligáu a non-ser. La esistencia ye imbaltable nel planu enerxéticu. Too ye vibración?.
Estes proposiciones nun son axiomes nin pretenden costruir paradigma dalgún, ciertamente, pero tá bien calteneles en mente si vamos a iniciar el viaxe de la autoconocencia. Nesi camín hai qu?espise de los falampernios que costruin los sistemes de referencia cotidianos, culturales, vitales, aquéllos que filtren la información y mos la presenten talo como la queremos y, poro, como la reconocemos. Cuando Tomás d?Aquino recibió la respuesta del nenu que taba carretando l?agua del mar nel pozu que fexere na sablera col envís de llenalu con tola mar, tuvo una bona lleción. Si quies entender un movimientu primero de too tienes de saber si aquello que caltién l?entendimientu ye congruente colo que quies entender. Los finxos del conocimientu enraigonen nun sistema de creencies que podemos dicir axiomático, esto ye, verdaes que nun necesiten demostración Cuando un sistema asina encara una realidá fuera del contestu pal que foi criáu, aparez la ñegación o, nel meyor de los casos, el mitu.
Los sistemes de creencies, nomémoslos paradigmes, tienen, ente otres característiques una gran inercia frente al cambiu. Pero equí nun vamos a falar de la naturaleza d?esos sistemes. Abástemos dicir que son ellos los que mos fain lo que somos o, meyor, lo que creemos ser. Lo cualo ta bien según el nivel de discernimientu qu?habitemos.
La mayoría de los humanos nun van necesitar camudar el paradigma de la so vida. La esperiencia vital (previamente escoyío) nun va xustificar l?enfrentar esi trabayu pues caún tien la so misión nel fabulosu puzzle que ye la esistencia humano. Sicasí, unos pocos van necesitar rempuestes. Un ciertu porcentax d?humanos faise entrugues dende mui temprana edá y entamen un camín estráu de pericuetos, prebes y fracasos. Esta xente sigui esi camín porque, tamién, escoyó esa esperiencia vital. Pa los que vivir en sueños nun ye abondo, aquellos que prefieren tomar la píldora roxa qu?ufre Morphaeus nel filme ?Matrix? de los hermanos Wachowski, van estes reflesiones.
----
Pa espurrir info: MATRIX
http://www.alohacriticon.com/elcriticon/modules.php?name=News&file=article&sid=877
13/01/2006
...la cuestión ye, poro, apurrir opciones pa alcuentros con entendimientos y non sentase a adeprender. El qu?adeprende, cuanto más sabi más esmolez y ello pué convertise en tormentu. Cuanto más aumente la sabencia, o la búsqueda d?esi saber, más lo fadrá ?l dolor pues el saber crea enfotu de saber y naide nun fartuca de saber. Digamos que nun conozo científicu dalgún que trabaye por saber más de lo qu?esiste y diga que yá valió de sabencia. Esta xente, como la mayor parte los humanos durmientes, nun habita l?universu de la SO propia esistencia sinon que, por embargu, utilicen esa sabencia pa, cola sida de comunicase colos otros, fardar; y, cola disculpa d?informar, privilexase perriba los demás. Y con esa sida de que la sabencia ye lo importante los que saben o, quieren saber, siempre anden engardíos con sigo y los otros y, amás, en marraces colos que dicin y por aquello que dicin saber; midiéndose unos con otros por decidir quién d?ente ellos sabi más, too nuna espiral que namai lleva a mayor congoxa y esmolgamientu.
Non ye que nun sía comeniente investigar y saber naquello que ye necesario saber sinon que tolo que se necesita nun ye, solo, esi movimientu d?emulación, esternu a la propia esistencia y esencia del home.
L?enfotáu nel saber nun se decata de qu?eso ye una pequeña parte de la SO esistencia y fai d?esi cachín de vida un tou que lu emburria al engañu. Y l?engañu vivi nesa congoxa, nesi esmolecimientu, na midida en que caún lo vivi hasta facese la esistencia bramente insoportable.
Si l?adeprender queda solo nel saber, córrese ?l gran riesgu de cayer nel farde, la exhibición y tolo que sía ésto coarta la profundidá del discernimientu porque lleva a la frivolidá entendida, non como midida moral na sociedá moralista, sinon nel sentíu de que ún queda namai na superficie de tou. Esa superficie nun ye más que una primera manifestación de tola profundidá que tá per baxo d?aquella. Esa profundidá la pescanciamos dafechu cuando mentalmente la vivimos en movimientos d?entendimientos, non d?emulaciones, farde o desafuegu. Pa desgracia, éstos últimos son los movimiento nos qu?habiten la mayoría de los homes durmiyosos
Comer Trabajo Pues bocatas de fiambre y demas es lo [...]
Combustible Amañoso Trabajo En que zona de la peninsula esta pasando [...]
esllarigase Gerri ! I cant guess about that. !
Comer zack hardy chillz buddy!!!!!!!
Combustible Amañoso Raziya ChillZ BuddY! ~~~~~~ :) niche writers kill sinus
Amestar feed a:
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
